Chonmage ៖ កំពូល​​​ម៉ូដ​សក់​ពិសេសប្លែកដែលផ្តើម​​ដោយ​​ភាព​ឈឺ​ចាប់​បង្ហូរ​ឈាម

ជូនចំពោះសុភាពបុរសទាំងអស់ដែលនៅលើពិភពលោកកំពុងចូលចិត្តសាមូរ៉ៃ។

ទិដ្ឋភាពសាមូរ៉ៃស្លៀកឈុត Kimono ស្រស់សង្ហា ដៃកាន់ដាវ Katana ចំណែកឯរូបរាង និងកាយវិការសមរម្យបានទាក់​ទាញ​ចិត្ត​របស់​មនុស្ស​ជា​ច្រើន។

យ៉ាងណាមិញ ប្រាកដជាមានចំណុចមួយដែលអ្នកមិនចង់យក​តម្រាប់​តាម ដែលនោះគឺជាម៉ូដសក់​មែនទេ?

Chonmage គឺជាម៉ូដសក់ពិសេសប្លែក និងមានលក្ខណៈអាថ៌កំបាំងរបស់ជប៉ុន។ តើអ្នកដឹងទេថា ដើម្បីទុកម៉ូដ​សក់​បែប​នេះ គេ​ត្រូវ​បង្កើត​ម៉ូដ​សក់​ទាំង​ដែល​ក្បាល​ពេញ​ទៅ​ដោយ​ឈាម​ដែរ​ទេ?

ពិតជាគួរឲ្យភ្ញាក់ផ្អើលណាស់។

ហេតុអ្វីបានជាសាមូរ៉ៃជ្រើសយកម៉៉ូដសក់ chonmage នេះ?

ដំបូង​ឡើយ សាមូរ៉ៃមានតួនាទីប្រយុទ្ធនៅលើសមរភូមិ នៅពេលដែលពាក់អាវពាសដែក និងមួកសម្រាប់ប្រយុទ្ធ ផ្នែក​ខាង​ក្រោម​ស្រទាប់​ពាស​ដែក​ប្រាកដជាក្តៅខ្លាំងដោយសារតែញើស សីតុណ្ហភាពរាងកាយ និងពន្លឺព្រះអាទិត្យ។

ញើសស្រក់ចុះអាចនឹងហូរចូលភ្នែក ដែលបង្កឲ្យមានបញ្ហាក្នុងការប្រយុទ្ធ។ ដូច្នេះហើយ ដើម្បីឲ្យមានចន្លោះខ្យល់ចេញ​ចូល គេ​បាន​បង្កើត​ជា​ម៉ូដ​សក់​នេះ។ ព្រោះតែមុខងារចាំបាច់នេះហើយ ទើបគេច្នៃជាម៉ូដសក់ចម្លែកដូចនេះ។

ថ្វីត្បិតតែ យើងដឹងពីមូលហេតុ​នេះ ប៉ុន្តែការយកតម្រាប់តាមម៉ូដសក់ដូចនេះជាចំណុចដែលមនុស្សជាច្រើនមិនចង់។

តើកន្លែងដែលមិនមានសក់ព្រោះតែកោរមែនទេ?

លក្ខណៈពិសេសនៃស្ទីលម៉ូដសក់នេះត្រង់ថា ផ្នែកខាងលើក្បាលគ្មានសក់ទាល់តែសោះ ដែលកន្លែងនេះគេហៅថា “月代” (sakayaki) ។

តើអ្នកដឹងទេថាពួកគេបានធ្វើយ៉ាងណាត្រង់កន្លែងទំពែកនោះដែរទេ?

គ្រប់គ្នាប្រហែលជាគិតថា ពួកគេប្រើកាំបិតកោរសម្អាតសក់ក្បាល ប៉ុន្តែតាមពិតទៅមិនមែននោះទេ។ ពួកគេដក​សក់​មួយ​សរសៃរៗ ដោយ​​សារ​​តែ​កន្លែង​ដែល​គ្មាន​សក់ ដូច្នេះចំនួនសក់ដែលត្រូវដកពិតជាច្រើនណាស់ ច្រើនជាងដក​​ពុក​​ចង្កា​​ទៅ​​ទៀត។ 

ឈាមស្រក់ហូរទើបអាចបង្កើតបានជាស្ទីលម៉ូដសក់ chonmage

មិនត្រឹម​តែឈឺប៉ុណ្ណោះទេ ប៉ុន្តែដំណាក់កាលនេះថែមទាំងធ្វើឲ្យឈាមហូរច្រើនផងដែរ។

អ្នកដែលធ្លាប់ដកពុកមាត់ប្រាកដជាយល់ សូម្បីតែដកពុកមាត់ក៏អាចនឹងចេញឈាមដែរ។ កុំថាតែដកសក់នៅលើក្បាលច្រើនដូច្នេះ ថែម​ទាំង​ជាក​ន្លែង​ដែល​មាន​សក់​ដុះ​ក្រាស់។ ប្រហែល​ជា​មានមនុស្សជា​ច្រើន​ហូរ​ឈាម​អំឡុងពេល​ដក​សក់។

ក្នុងឯកសារនៅសម័យនោះក៏បានកត់ត្រាដែលថា “ឈាមហូរច្រើន ពិតជាគួរឲ្យខ្លាច​ណាស់” ។ ក្នុងឯកសាររបស់ផ្សព្វ​ផ្សាយ​សាសនា​ជន​ជាតិ​ព័រទុយហ្គាល់​ក៏​បាន​សរសេរ​ដែល​ថា “មើល​ទៅ​ពិត​ជា​ឈឺ​ចាប់​ណាស់…” ។

ហេតុអ្វីបានជាសាមូរ៉ៃត្រូវខំប្រឹងបែបនេះ? 

ប្រហែលជាការស៊ូទ្រាំនឹងភាពឈឺចាប់សម្រាប់ធ្វើស្ទីលម៉ូដសក់នេះ មានអត្ថន័យបង្ហាញពីស្មារតីត្រៀមខ្លួនប្រយុទ្ធដើម្បី​ស្តេច​ក្រាញ់​ជា​និច្ច។

មិនត្រឹម​តែប៉ុណ្ណឹង ត្រឹមមួយសរសៃរសក់ដែលដុះនៅ​ត្រង់កន្លែងទំពែកនោះក៏អាចនឹងត្រូវគេចាត់ទុកថាមិនរៀបរយ មិន​សម​សួន​ដែរ។

គ្រាន់តែឮដូច្នេះ តើអ្នកនៅតែអាចអស់សំណើចចំពោះម៉ូដសក់នេះទៀតដែរទេ? 

ថ្វីត្បិតតែ មិនអាចនិយាយបានថាស្អាតសង្ហា ប៉ុន្តែនៅសម័យសន្តិភាពគ្មានសង្គ្រាម សាមូរ៉ៃនៅតែបន្តរក្សាប្រពៃណី​​នេះ ពិត​ជា​គួរ​ឲ្យ​សរសើរ​ណាស់​មែន​ទេ?

ផ្ទុយ​ទៅ​វិញ ក៏មានសាមូរ៉ៃមួយចំនួនទុកសក់វែងដែរ ដោយមិនបានកោរសក់ផ្នែកខាងលើក្បាលនោះទេ។ ជាទូទៅ ពួក​គេ​ត្រូវ​បាន​គេ​ហៅ​ថា Ronin ជា​បុគ្គល​ដែល​មិន​បម្រើ​ម្ចាស់ ឬ​ស្តេច​ក្រាញ់​ណា​មួយ​ឡើយ។

ក្នុងរឿងនេះមិនអាចមិនរំលឹកដល់ Miyamoto Musashi នោះទេ ជាសាមូរ៉ៃមួយរូបដែលល្បីនៅលើពិភពលោក។

ទោះបីជា លោកល្បីដោយសារកម្លាំង និង​ជំនាញ​ប្រយុទ្ធ ប៉ុន្តែ​លោក​បែរ​ជា​មិន​ទុក​ម៉ូដ​សក់​បែប​បុរាណ chonmage នោះ​ទេ។

មូលហេតុ​ព្រោះថាក្បាលរបស់លោកមានដុំសាច់ធំមួយ។ ប្រសិនបើកោរសក់ នឹងឃើញដុំសាច់នោះ ហើយមើលទៅអាក្រក់​ណាស់។

ថ្វីត្បិតតែ ក្រោយមកដុំសាច់ជាសះស្បើយ គ្រាន់តែបន្សល់ទុកស្លាកស្នាម ប៉ុន្តែ​លោកនៅតែមិនកោរសក់ត្រង់កន្លែងនោះឡើយ។

ប្រហែលជាក្នុងចិត្ត លោកក៏ចង់ទុកម៉ូដសក់ chonmage ដូចជាសាមូរ៉ៃដទៃទៀតដែរ។

ដូច្នេះយើងអាចមើលឃើញថា ទោះបីជាមានបទប្បញ្ញតិ្តរួម ប៉ុន្តែសាមូរ៉ៃម្នាក់ៗបែរជាបង្ហាញពីបុគ្គលិក​លក្ខណៈផ្ទាល់​ខ្លួន​តាម​រយៈ​ម៉ូដ​សក់​របស់​ខ្លួន។ ម៉ូដ​សក់ chonmage មិន​ត្រឹម​តែ​ជាម៉ូត​សក់​មួយ​ប៉ុណ្ណោះ​ទេ ថែម​ទាំង​ជា​រឿង​រ៉ាវ​និយាយ​ពី​ជីវិត តម្លៃ និង​ក្តី​ស្រមៃ​របស់​មនុស្ស​ម្នាក់ៗ​ផង​ដែរ។

Abe Kengo