សាមញ្ញតែ​មាន​ប្រសិទ្ធភាព៖ អាថ៌កំបាំងកាត់​បន្ថយ​កំហុសឆ្គង​របស់​ជប៉ុន

ជប៉ុនជាប្រទេសដែលល្បីថាបរិយាកាសការងារកម្រនឹងកើតមានគ្រោះថ្នាក់ អាថ៌កំបាំងដែលពួកគេតែងតែអនុវត្ត​គឺ​ត្រួត​ពិនិត្យ​គ្រប់​យ៉ាង​ឱ្យ​បាន​ហ្មត់​ចត់។ 

អ្នកក៏អាចអនុវត្តវិធីសាស្រ្តត្រួតពិនិត្យនេះក្នុងការងាររបស់ខ្លួនផងដែរ ដើម្បីទទួលបានប្រសិទ្ធភាពកាន់តែខ្ពស់។

ការដ្ឋានសំណង់ កន្លែងដំណើរការរថភ្លើង និងហ្ការ៉ាស់ជួសជុលយាន្តជំនិះ គឺជាកន្លែងដែលងាយនឹងកើតមានគ្រោះថ្នាក់។

ទោះជាយ៉ាងណា ជប៉ុនជាប្រទេសដែលត្រូវបានគេចាត់ទុកថា អត្រាគ្រោះថ្នាក់ការងារមានកម្រិតទាប។ ចំណុចនេះមិន​មែន​ដោយ​សារ​ប្រជាជន​ជប៉ុន​មាន​ជំនាញ​ពិសេស ឬ​គ្រឿង​ចក្រ​នៅ​​ជប៉ុន​​ទំនើប​​ជាង​បណ្តា​ប្រទេស​ផ្សេង​ទៀតនោះ​ទេ។

អ្វីដែលពួកគេធ្វើគ្រាន់តែត្រួតពិនិត្យឱ្យបានហ្មត់ចត់ប៉ុណ្ណោះ ទោះបីជាមើលទៅងាយស្រួល ប៉ុន្តែដើម្បីធានាថាគ្រប់​យ៉ាង​ត្រូវ​បាន​ត្រួត​ពិនិត្យ​ច្បាស់​លាស់​មិន​ងាយ​នោះ​ទេ។

ជាទូទៅ អ្នកដែលមានបទពិសោធន៍ការងារងាយនឹងបង្កកំហុសក្នុងដំណើរការត្រួតពិនិត្យណាស់។

ខ្ញុំនឹងចែករំលែកអាថ៌កំបាំងទាំងនេះប្រាប់អ្នកទាំងអស់គ្នា។

បញ្ជាក់ដោយការចង្អុលដៃ

ប្រសិនបើអ្នកធ្លាប់ជិះរថភ្លើងនៅជប៉ុន អ្នកប្រហែលជាធ្លាប់ឃើញអ្នកបើករថភ្លើងចង្អុលសញ្ញា និងកុងតាក់ ហើយ​និយាយ​ខ្លាំងៗ​ដើម្បី​បញ្ជាក់។ នោះ​គឺ​ជា​សកម្មភាព “ចង្អុល​​ដៃ​​បញ្ជាក់” ។

វិធីសាស្រ្តនេះត្រូវបានគេចាត់ទុកថា បង្កើតឡើងដោយក្រុមហ៊ុនផ្លូវ​ដែក​រដ្ឋមួយ​ប្រហែល​ក្នុង​ឆ្នាំ ១៩០០ ។ លទ្ធផល​គួរ​ឱ្យ​ភ្ញាក់​ផ្អើល វិធីសាស្ត្រ​នេះបាន​ជួយ​កាត់​បន្ថយ​កំហុស​ដល់​ទៅ ១/៣ ។

ដោយសារតែប្រសិទ្ធភាពខ្ពស់ ទើបវិធីសាស្រ្តនេះមិនត្រឹម​តែត្រូវបានប្រើខាងវិស័យផ្លូវដែកប៉ុណ្ណោះទេ រួមទាំងការ​ដ្ឋាន​សំណង់ រោង​ចក្រ និង​វិស័យ​ជា​ច្រើន​ទៀត ដែល​រួម​ចំណែក​កាត់​បន្ថយ​គ្រោះ​ថ្នាក់​នៅ​ជប៉ុន។

ទោះជាយ៉ាងណា ការត្រួតពិនិត្យការងាររបស់ខ្លួនឡើងវិញគឺជារឿងដែលគួរឱ្យធុញទ្រាន់ណាស់។ មនុស្សជាច្រើនតែង​តែ​គិត​ថា “ខ្ញុំ​បាន​ធ្វើ​រួច​ហើយ ប្រាកដ​ជា​មិន​អី​ទេ” ដូច្នេះ​ការ​បញ្ជាក់​តាម​បញ្ជី​ត្រួត​ពិនិត្យក៏​មិន​ច្បាស់​លាស់ដែរ។

ប៉ុន្តែការចង្អុល​ដៃ​បញ្ជាក់បែរជាជួយឱ្យយើងត្រួតពិនិត្យការងារនីមួយៗបានច្បាស់។

ទោះបីជាមានអារម្មណ៍ថារាងអៀនបន្តិចពេលធ្វើសកម្មភាពបែបនេះនៅចំពោះមុខអ្នកដទៃ ប៉ុន្តែបើប្រៀបនឹងកំហុសគឺល្អជាងដល់ទៅ ១០០ ដង។

ការរួមបញ្ចូលទ្រឹស្តី

មានទ្រឹស្តីមួយនិយាយពីការយល់ដឹងរបស់មនុស្សហៅថា “ការរួមបញ្ចូលទ្រឹស្តី” ។

តាមទ្រឹស្តីនេះ ការយល់ដឹងរបស់មនុស្សត្រូវបានបែងចែកជា ៥ កម្រិត ចាប់ពី ០ ដល់ ៤ ។ មិនថាការយល់ដឹងមានកម្រិត​ខ្ពស់ ឬទាបសុទ្ធតែអាចបណ្តាលឱ្យកើតមានកំហុស។

កម្រិត ០ – គ្មានគំនិត៖ ស្ថានភាពមិនដឹងអំពីខ្លួនឯង និងបិរស្ថានជុំវិញ។ ឧទាហរណ៍៖ នៅពេលដែលកំពុងគេងលក់​ស្កប់​ស្កល់ សន្លប់។

កម្រិត ១ – ស្មារតីមិនច្បាស់លាស់៖ ស្ថានភាពពាក់កណ្តាលដឹងខ្លួន ពាក់កណ្តាលមិនដឹងខ្លួន ពិបាកផ្តោតអារម្មណ៍ ប្រតិកម្ម​យឺត​យ៉ាវ។

កម្រិត ២ – ធម្មតា៖ ស្ថានភាពមានការប្រុងប្រយ័ត្ន ផ្តោតអារម្មណ៍ ប្រសិទ្ធភាពធ្វើការងារខ្ពស់បំផុត។ នេះជាស្ថាន​ភាព​ដែល​ល្អ​អាច​អនុវត្ត​ការ​ងារ​ប្រ​ចាំ​ថ្ងៃ។

កម្រិត ៣ – ច្បាស់លាស់៖ ស្ថានភាពផ្តោតអារម្មណ៍ខ្ពស់ ប្រុងប្រយ័ត្ន ស័ក្តសមនឹងការងារដែលទាមទារភាពច្បាស់​លាស់​​ខ្ពស់ ប៉ុន្តែ​​ងាយ​​នឹង​​បង្ក​ឱ្យ​មាន​សម្ពាធ។

កម្រិត ៤ – មានសម្ពាធខ្លាំង៖ ស្ថានភាពព្រួយបារម្ភ តានតឹង បាត់បង់ការគ្រប់គ្រង។ ក្នុងស្ថានភាពនេះ សមត្ថភាព​ផ្តោត​អារម្មណ៍​ធ្លាក់​ចុះ ងាយ​នឹង​បង្ក​កំហុស។

ទោះបីជាទ្រឹស្ដីនិយាយថា ស្ថានភាព “ច្បាស់លាស់ ផ្តោតអារម្មណ៍ខ្ពស់” គឺល្អបំផុត ប៉ុន្តែជាក់ស្តែង នៅពេលដែលធ្វើការ​ងារ​ដដែលៗ មនុស្ស​ច្រើន​តែ​ធ្លាក់​ក្នុង​ស្ថាន​ភាព “ធម្មតា” ហើយ​មាន​ទំនោរ​ប្រព្រឹត្ត​កំហុស​ដែល​មិន​គួរ​មាន។

ចូរសាកល្បងអនុវត្តក្នុងជីវិតប្រចាំថ្ងៃ

តើអ្នកតែងតែភ្លេចរបស់របរមែនទេ?

ទោះបីជាខំប្រឹងចាំយ៉ាងណាដ៏ដោយ នៅតែភ្លេចសោ និងទូរស័ព្ទ។

ដូច្នេះសូមសាកល្បងបិទតារាងបញ្ជីត្រួតពិនិត្យរបស់របរដែលត្រូវយកតាមនៅមាត់ទ្វារចេញចូល។

បន្ទាប់មក ចូរអ្នកចង្អុលរបស់របរនីមួយៗក្នុងតារាងបញ្ជី ហើយនិយាយខ្លាំងៗថា៖ “សោ OK!” “ទូរស័ព្ទ OK!” ។ល។

វិធីសាស្រ្តនេះអាចជួយឱ្យអ្នកកាត់បន្ថយការភ្លេចភ្លាំងបានច្រើន។

ការអនុវត្តវិធីសាស្រ្តនេះក្នុងការងារអាចនឹងជួយឱ្យអ្នកធ្វើការកាន់តែមានប្រសិទ្ធភាព កាត់បន្ថយកំហុសឆ្គង ហើយ​ប្រាកដ​ជា​ទទួល​បាន​ការ​វាយ​តម្លៃ​ខ្ពស់​ពី​ថ្នាក់​លើ។

កែលម្អគុណភាពជីវិតទាំងនៅកន្លែងធ្វើការ និងក្នុងជីវិតផ្ទាល់ខ្លួន ដោយអនុវត្តវិធីសាស្រ្តចង្អុលដៃបញ្ជាក់។

Abe Kengo