ស្មារតី Bushido (ភាគ ៤)

អ្នកប្រាកដជាធ្លាប់ឆ្ងល់ចង់ដឹងអំពីជីវិតនៃកំពូលសាមូរ៉ៃ – ដែល​ជា​អ្នក​ចម្បាំង​ដ៏​ក្លា​ហាន និង​ស្មោះ​ត្រង់​នៅប្រទេស​ជប៉ុន។

ដូច្នេះចូរយើងបន្តស្វែងយល់អំពីជីវិតរបស់សាមូរ៉ៃ ហើយស្វែងយល់ពីចំណុចខុសគ្នារវាងជីវិតរបស់ពួកគេ និងជីវិតរបស់​យើង​សព្វ​ថ្ងៃ​តាម​រយៈ​អត្ថបទ​នេះ។

នៅសម័យ Edo គឺជាសម័យកាលចុងក្រោយរបស់សាមូរ៉ៃ។ នេះជាអំឡុងពេលនៃសន្តិភាពដែលមានរយៈពេលប្រហែល ២៦០ ឆ្នាំ ដោយ​​មិន​​មាន​​សង្គ្រាម​​ធំ​​កើត​​ឡើង​​ឡើយ។

យើងអាចស្វែងយល់អំពីជីវិតរបស់សាមូរ៉ៃក្នុងអំឡុងពេលនេះតាមរយៈកំណត់ហេតុដែលពួកគេបានបន្សល់ទុក។

សាមូរ៉ៃក្រោកពីគេងនៅម៉ោង ៤ ព្រឹក ហើយមិនដែលធ្វេសប្រហែសលើការហ្វឹកហាត់នោះទេ។ ពួកគេហ្វឹកហាត់​ដាវ​ឈើ​ចំនួន ១០០០ ដង បន្ទាប់មកងូតទឹកត្រជាក់មិនថារដូវណាក៏ដោយ ដើម្បីហ្វឹកហាត់ទាំងផ្លូវកាយ និងស្មារតី ពិត​ជា​អស្ចារ្យ​ណាស់។

បន្ទាប់ពីហ្វឹកហាត់រួច ពួកគេនឹងរៀបចំខ្លួនប្រាណឲ្យបានស្អាតបាត។ ប្រាកដណាស់ គ្រប់គ្នាដឹងហើយថា ស្ទីលម៉ូដ​សក់​ពិសេស​របស់​សាមូរ៉ៃ​គឺ chonmage ហើយ​នេះ​ជា​ចំណុច​សំខាន់​ក្នុង​ការ​បង្កើត​រូប​រាង​ផ្ទាល់​ខ្លួន ពួកគេក៏កោរ​សក់ផ្នែក​ខាង​មុខ​យ៉ាង​​ប្រុង​​ប្រយ័ត្ន​​ជា​​រៀង​​រាល់​​ថ្ងៃ​ផង​ដែរ។

បន្ទាប់មកទៀត គឺជាពេលវេលាសមាធិ។ សមាធិ ឬគេហៅថា Zen ដូចដែលគ្រប់គ្នាបានដឹង ត្រូវបានគេចាត់ជាវិធីសាស្ត្រ​ហ្វឹក​ហាត់​យ៉ាង​មាន​ប្រសិទ្ធភាព ដើម្បី​រក្សាលំនឹងចិត្ត ហើយប្រឈមមុខនឹងខ្លួនឯង។

ក្រោយពេលធ្វើសមាធិ ទើបពួកគេចាប់ផ្តើមបរិភោគអាហារពេលព្រឹក។

របបអាហាររបស់សាមូរ៉ៃមានភាពសាមញ្ញណាស់។ បើប្រៀបធៀបទៅនឹងប្រជាជនធម្មតាជាទូទៅបរិភោគមី soba ស៊ូស៊ី អន្ទង់ ។ល។ ចំណែក​ឯអាហារ​របស់​សាមូរ៉ៃ​ភាគច្រើនមានតែបាយសពេញមួយចាន បន្លែជ្រក់ និងស៊ុប miso ប៉ុណ្ណោះ។

ទាំងនេះគឺជាទម្លាប់ពេលព្រឹករបស់សាមូរ៉ៃចាប់ពីម៉ោង ៤ ដល់ម៉ោង ៨ ព្រឹក។

សម្រាប់អាហារថ្ងៃត្រង់ និងអាហារពេលល្ងាច ពួកគេគ្រាន់តែបន្ថែមមុខម្ហូបស្ងោរ និងត្រីអាំងជាដើម។ យ៉ាង​ណា​មិញ ភាគ​ច្រើន​នៅ​តែ​បរិភោគ​បាយ​ស​ច្រើន​ដើម្បី​ឆ្អែត។

បន្ទាប់មក ពួកគេទៅកន្លែងធ្វើការដើម្បីបំពេញភារកិច្ច។ នៅសម័យសន្តិភាព ការប្រយុទ្ធមិនមែនជាតួនាទីរបស់​សាមូរ៉ៃ​នោះ​ទេ ពួក​គេ​ទទួល​ខុស​ត្រូវ​ការ​ងារ​ជា​ច្រើន។ បុគ្គលម្នាក់ៗមានមុខតំណែងរៀងខ្លួន ការងារសំខាន់មានដូច​ជា កត់​ត្រា​នយោបាយ អនុវត្ត​ពិធី យាម និង​សម្អាត។

រហូតដល់ម៉ោង ១៨ ពួកគេបញ្ចប់ការងារ ហើយ​ត្រឡប់ទៅផ្ទះបរិភោគអាហារពេលល្ងាច។ ដូចដែលបានរៀបរាប់ខាង​លើ អាហារ​ពេល​ល្ងាច​របស់​ពួក​គេ​សាមញ្ញ​ណាស់។

ហើយនៅពេលយប់ ក្រោយ​ពេល​បាយ​ល្ងាច ពួកគេត្រូវចំណាយពេលរៀនសូត្រ។

សាមូរ៉ៃត្រូវមានទាំង “ចំណេះ និងក្បាច់គុន” ដែល​មាន​ន័យ​ថា ពួកគេត្រូវហ្វឹកហាត់ទាំងរាងកាយ និង​ជំនាញ​ដាវ​ផង​ដែរ ម្យ៉ាង​វិញ​ទៀត ត្រូវ​រៀន​គណិត​វិទ្យា អក្សរ​សាស្ត្រ និង​​មុខ​វិជ្ជា​​ផ្សេង​​ទៀត។

ជាទូទៅពួកគេចូលគេងនៅម៉ោង ២២ យប់។ ការដែលពួកគេចូលគេងយឺតនៅសម័យដែលមិនទាន់មានភ្លើងអាច​នឹង​ធ្វើ​ឲ្យ​មនុស្ស​ជា​ច្រើន​ភ្ញាក់​ផ្អើល។

នេះជាទម្លាប់ប្រចាំថ្ងៃរបស់សាមូរ៉ៃនៅសម័យ Edo ។

ថ្វីត្បិតតែ មមាញឹកនឹងការងារ និងការហ្វឹកហាត់ ក៏សាមូរ៉ៃមានថ្ងៃសម្រាកដែរ។ នៅថ្ងៃសម្រាក ពួកគេតែងតែចូលរួម​សកម្មភាព​កម្សាន្ត​ដូច​ជា​មើល​ល្ខោន Noh ល្ខោន Kabuki ឬ​ពិធីបុណ្យ​នៅ​ប្រាសាទ។

ទោះជាយ៉ាងណា សាមូរ៉ៃតែងតែត្រូវហាមមិនឲ្យចូលរួមពិធីបុណ្យប្រពៃណីដែលពួកគេចូលចិត្ត។

ក្រៅពីនេះ ស្ទូចត្រីគឺជាការកម្សាន្តដែលសាមូរ៉ៃនិយមចូលចិត្តបំផុត។ ស្ទូចត្រីជួយឲ្យចិត្តស្ងប់ស្ងាត់ និងការផ្តោតអារម្មណ៍​ខ្ពស់ ដែលគេចាត់ទុកជាវិធី​សាស្រ្ត​សម្រាប់​បណ្តុះ​បណ្តាល​ខ្លួនឯង។ អាចនិយាយបានថា ស្ទូចត្រីមានទំនាក់ទំនង​ស្និទ្ធ​ស្នាល​នឹង​ទស្សន​វិជ្ជា Zen ។

តើអ្នកយល់ថាកាលវិភាគពេញមួយថ្ងៃរបស់សាមូរ៉ៃដូចម្តេចដែរ? ពួកគេតែងតែហ្វឹកហាត់ទាំងផ្លូវកាយ និងផ្លូវចិត្ត។

ប្រហែល​ជា​អ្នក​នឹង​ភ្ញាក់​ផ្អើល​ពេល​ដឹង​ថា ពួក​គេ​ចំណាយ​ពេល​ច្រើនសម្រាប់បណ្តុះបណ្តាលខ្លួនឯង ហើយហ្វឹកហាត់ស្មារតី។

ទោះបីជាមានឋានៈ​ខ្ពស់​ជាងប្រជាជនធម្មតា សាមូរ៉ៃនៅតែរស់នៅបែបសាមញ្ញ។ ស្មារតីស្មោះត្រង់ចំពោះផ្នត់គំនិត​សាមូរ៉ៃ​របស់​ពួក​គេ ជា​អ្វី​ដែល​យើង​ស្ទើរ​តែ​មិន​អាច​រៀន និងយកតម្រាប់បាន។

ដូច្នេះតើជីវិតសព្វថ្ងៃរបស់អ្នកយ៉ាងម៉េចដែរ?

ដោយសារ​ភាព​មមាញឹក​នៃ​សង្គម​សម័យសព្វថ្ងៃ យើងគួរតែរៀនសូត្រតាមស្មារតី Bushido ហើយយកមកអនុវត្តក្នុង​ជីវិត​ប្រចាំថ្ងៃ ដើម្បី​បណ្តុះ​បណ្តាល​ខ្លួន​ឯង​ទាំង​​ផ្លូវ​កាយ និង​​ផ្លូវ​ចិត្ត ដូច្នេះ​អាច​លើកតម្កើងតម្លៃ​របស់មនុស្ស។

គ្រូបង្រៀនក្បាច់ដាវ Shiden Hiryu នៃសាលា Shidenryu