Miso មាន​អត្ថប្រយោជន៍ល្អ​ចំពោះ​សុខ​ភាព ហើយ​ជា​រូប​មន្ត​ចម្អិន​មុខ​ម្ហូប​យ៉ាង​ពិសេស

Miso ត្រូវបានគេប្រើច្រើនក្នុងមុខម្ហូបជប៉ុនមានដូចជា ស៊ុបមីសូ មីរ៉ាមេនមីសូជាដើម។

ថ្វីត្បិតតែ មើលទៅមិនមានភាពទាក់ទាញ ប៉ុន្តែ miso ត្រូវបានគេចាត់ទុកថាល្អចំពោះសុខភាព និងកំពុងទាក់​ទាញ​ការ​ចាប់​អារម្មណ៍​ទូទាំង​ពិភព​លោក។

នៅថ្ងៃនេះ ចូរយើងស្វែងយល់អំពីអត្ថប្រយោជន៍របស់ miso ចំពោះសុខភាព។

គ្រឿងផ្សំ miso

Miso ជាប្រភេទគ្រឿងទេសខាប់ ដែលត្រូវបានធ្វើឲ្យឡើងជូរ ហើយផ្អាប់នឹងសណ្តែកសៀងចំហុយ ឬដាំឆ្អិនជាមួយ Koji និង​អំបិល។ 

Koji គឺជាគ្រឿងផ្សំសំខាន់មួយសម្រាប់ធ្វើ miso ។ នេះជាផលិតផលដែលប្រើអង្ករ ស្រូវបាឡេ ឬសណ្តែកសៀងធ្វើឲ្យឡើង​ជូរ។

Miso មានប្រភពមកពីប្រទេសចិន គឺជាផលិតផលអំបិលសណ្តែកសៀងដែលត្រូវបាននាំចូលជប៉ុន ហើយ​ផ្លាស់​ប្តូរក្លាយទៅជាទម្រង់ដូចសព្វថ្ងៃ។

ទោះបីជាប្រទេសកូរ៉េក៏មានមុខម្ហូបស្រដៀងគ្នា ប៉ុន្តែរបៀបចម្អិនខុសគ្នា ដូច្នេះត្រូវបានគេចាត់ទុកថាជាមុខម្ហូបដាច់​ដោយ​ឡែក។

អត្ថប្រយោជន៍របស់ Miso

Miso មានផ្ទុកជាតិសរសៃច្រើន ដូច្នេះជួយសម្រួលដល់ចលនាពោះវៀន និងគ្រប់គ្រងស្ថានភាពពោះវៀន។

ក្រៅពីនេះ miso ថែមទាំងមានមុខងារកម្ចាត់ជាតិស្ករ ខ្លាញ់ និងសូដ្យូមដែលលើសចេញពីរាងកាយ ដូច្នេះអាចជួយគ្រប់​គ្រង​ជាតិ​ស្ករ និង​សម្ពាធ​ឈាម។

សណ្តែកសៀង – គ្រឿងផ្សំសំខាន់របស់ miso – មានផ្ទុកសារធាតុ lecithin ច្រើន ដែលជួយទប់ស្កាត់ការស្រូបយក​កូឡេស្តេរ៉ុល ពង្រឹង​ប្រព័ន្ធ​ភាព​ស៊ាំ និង​បង្ការ​ជំងឺ​សរសៃ​ឈាម​បេះ​ដូង។

Miso ថែមទាំងត្រូវបានគេចាត់ទុកជាកំណប់អាហារូបត្ថម្ភ ជាមួយនឹងវីតាមីន B1, B2, B6, B12, E, ជាតិដែក និង​ម៉ាញ៉េស្យូម​ផង​ដែរ។

ជាយូរណាស់មកហើយ Miso ត្រូវបានប្រជាជនជប៉ុនចាត់ទុកជា “គ្រូពេទ្យតាមផ្ទះ” ព្រោះតែអត្ថប្រយោជន៍ដ៏អស្ចារ្យ​ចំពោះ​សុខ​ភាព។

របៀបបរិភោគ Miso មានច្រើន និងសម្បូរបែប

តើអ្នកមិនបានចម្អិនមុខម្ហូបជប៉ុននៅផ្ទះញឹកញាប់ឬ?

សូមកុំបារម្ភ Miso មិនមែនសម្រាប់តែមុខម្ហូបជប៉ុនប៉ុណ្ណោះទេ ប៉ុន្តែអាចរួមផ្សំជាមួយនឹងឈីស ក្រែម និងគ្រឿងផ្សំ​ជា​ច្រើន​ទៀត បង្កើត​បាន​ជា​មុខ​ម្ហូប​ឆ្ងាញ់​ជា​ច្រើន។

សូមក្រឡេកមើលរូបមន្តដែលខ្ញុំចូលចិត្តមួយចំនួនខាងក្រោម៖

មុខម្ហូប hamburger miso

នៅពេលដែលចម្អិនសាច់ Hamburger ជំនួសឲ្យការដាក់អំបិល គ្រប់គ្នាអាចបន្ថែម miso ។

ក្លិន​ឈ្ងុយ​របស់ miso សាយភាយធ្វើឲ្យមុខម្ហូបកាន់តែឆ្ងាញ់។

ដើម្បីធ្វើឲ្យបន្ទះសាច់ Hamburger កាន់តែទាក់ទាញ អ្នកអាចរួមបញ្ចូលជាមួយនឹងទឹកជ្រលក់ miso ។ របៀបធ្វើងាយៗ៖ លាយ miso ស្រាសម្រាប់ចម្អិនម្ហូប និង mirin តាមបរិមាណ ១ៈ១ៈ១ បន្ថែមស្ករបន្តិចជាការស្រេច។

មីអុីតាលី Miso Carbonara

ស្រដៀងនឹង Hamburger ដែរ យើងប្រើ miso ជំនួសឲ្យអំបិលដែលដាក់ក្នុងមី Carbonara ។

ថ្វីត្បិតតែ ជាទូទៅមី Carbonara ចម្អិនជាមួយក្រែម ប៉ុន្តែការរួមបញ្ចូលគ្នារវាងក្រែម និង miso ក៏ពិសេសណាស់ដែរ។

ស៊ុបពោត miso

ស្រដៀង Hamburger និងមី Carbonara យើងក៏ជំនួសអំបិលដោយ miso ក្នុងស៊ុបពោតនេះដែរ។ បន្ទាប់ពីភ្លក់រស​ជាតិ​ផ្អែម​នៃ​ស៊ុប​ពោត រស​ជាតិ miso នឹង​សាយ​ភាយ​ក្នុង​មាត់ បង្កើតជាអារម្មណ៍ពិសេសទាក់ទាញបំផុត។

ការដែលប្រើ miso ជំនួសអំបិលបែបនេះនឹងបង្កើតរសជាតិដល់មុខម្ហូប។ សូមសាកល្បងរូបមន្តនេះជាមួយនឹងមុខ​ម្ហូប​ផ្សេង​ទៀត ហើយ​សង្ឃឹម​ថា អ្នកនឹងទទួលបានបទពិសោធរីករាយនៃមុខម្ហូប និងល្អចំពោះសុខភាព។

ទោះជាយ៉ាងណា សូមកត់សម្គាល់ចំណុចសំខាន់មួយ។

នៅពេលដែលចម្អិនម្ហូប ប្រសិនបើដាំឲ្យពុះនឹងបាត់បង់រសជាតិពិសេសរបស់វា។ ដូច្នេះ បន្ទាប់ពីដាក់ miso ចូលមុខ​ម្ហូប សូម​បន្ថយ​ភ្លើង ហើយ​កុំ​ដាំ​ឲ្យ​ពុះ ដើម្បី​ធានា​ថា​អាច​រក្សា​រស​ជាតិ​​ឆ្ងាញ់​។

Miso គឺជាគ្រឿងផ្សំចម្រុះ និងពិសេស អាចរួមបញ្ចូលនឹងមុខម្ហូបជាច្រើន។ អ្នកអាចស្វែងយល់ ហើយច្នៃមុខម្ហូបជា​មួយ​នឹង miso ។

ជាពិសេស អ្នកអាចសាកល្បងប្រើ miso ដើម្បីបង្កើតរសជាតិថ្មីសម្រាប់មុខម្ហូបប្រពៃណីនៃប្រទេសរបស់អ្នក។

Abe Kengo