អាថ៌កំបាំង​ដែល​គេ​ចាត់​ទុក​ទាហាន​ជប៉ុន​ថា “អមតៈ” តួអង្គ Anime ដ៏​អស្ចារ្យ

តើអ្នកធ្លាប់បានមើល Manga/Anime “Golden Kamuy” ដែរទេ?

តួអង្គឯក Sugimoto ក្នុងរឿងនេះយកតាមរឿងពិតរបស់ទាហានជប៉ុនម្នាក់មានឈ្មោះថា Funasaka Hiroshi ។

ចូរយើងស្វែងយល់រឿងរ៉ាវដែលលើសពីសមត្ថភាពរបស់មនុស្សម្នាក់តាមរយៈអត្តបទនេះ។

ម្នាក់ឯងកម្ចាត់ទាហាន​អាមេរិក​ជាង ១០០ នាក់

ទីកន្លែងប្រយុទ្ធរបស់គាត់ស្ថិតនៅលើកោះតូចមួយនៅ Palau នៃប៉ាស៊ីហ្វិកខាងត្បូង។

នៅពេលនោះ បរាជ័យរបស់ជប៉ុនស្ទើរតែជាក់ស្តែងទៅហើយ។ ការប្រយុទ្ធនៅលើកោះក៏មានភាពខុសគ្នាយ៉ាងខ្លាំងខាង​ផ្នែក​កង​កម្លាំង ហើយ​កង​ទ័ព​ជប៉ុន​ដែល​នៅ​ជុំវិញ​គាត់​កំពុង​ថយ​ចុះ​បន្តិច​ម្តងៗ។ 

ទោះ​បី​ជា​មាន​ការ​លំបាក​ក៏​ដោយ Funasaka បានបន្តប្រយុទ្ធដោយកាំភ្លើងបាញ់គ្រាប់បែកដៃ។

កាំភ្លើងបាញ់គ្រាប់បែកដៃនឹងក្តៅក្រោយពេលបាញ់ម្តងៗ ដូច្នេះមិនអាចបាញ់ជាបន្តបន្ទាប់នោះទេ។ ទោះជាយ៉ាង​ណា​ក៏​ដោយ Funasaka មិន​ខ្វល់​ចំពោះ​គ្រោះ​ថ្នាក់​ឡើយ បាន​ប្រយុទ្ធ​ដោយ​ប្រើ​កាំភ្លើង​បាញ់​គ្រាប់​បែកដៃក្តៅ ហើយសម្លាប់​ទាហាន​អាមេរិក​ជាង ១០០ នាក់​តែ​ម្នាក់​ឯង។ 

បានរួចផុតជីវិតបន្ទាប់ពីត្រូវកាត់ទោសប្រហារជីវិត

នៅថ្ងៃទី ៣ នៃការប្រយុទ្ធ Funasaka រង​របួស​ធ្ងន់​ត្រង់​ភ្លៅ​ខាង​ឆ្វេង​ដោយ​សារ​គ្រាប់​កាំភ្លើង​ធំ​របស់អាមេរិក។

ដោយសារ​ស្ថានការណ៍​ប្រយុទ្ធ​តានតឹង គាត់ត្រូវរង់ចាំអស់ជាច្រើនម៉ោងទើបត្រូវបានគ្រូពេទ្យយោធាពិនិត្យមើល។ នៅ​ពេល​ដែល​មើល​ឃើញ​មុខ​របួស គ្រូពេទ្យ​យោធា​បាន​កំណត់​ថា មិន​អាច​ជា​សះស្បើយ​បាន​ទេ ហើយឲ្យលោកគ្រាប់​បែក​ដៃ​មួយ​គ្រាប់​សម្រាប់​ធ្វើ​អត្តឃាត។

មាន​ន័យ​ថា គាត់ត្រូវធ្វើអត្តឃាតដាច់ខាត។

ទោះ​ជា​យ៉ាង​ណា Funasaka មិន​ចុះ​ចាញ់​ឡើយ។ គាត់ប្រើទង់ជាតិជំនួសឲ្យបង់រុំរបួស រួចរុំមុខរបួស ហើយចំណាយពេល​ពីរ​បី​ថ្ងៃ​ត្រឡប់​ទៅ​មូល​ដ្ឋាន​ជប៉ុន​ក្នុង​រូង​ភ្នំវិញ។

នៅ​ព្រឹក​បន្ទាប់ ថ្វីត្បិតតែ ដើរមិននឹងដោយសាររបួសត្រង់ជើងខាងឆ្វេង គាត់នៅតែអាចដើរទៅមក និងបន្តប្រយុទ្ធ។

ក្នុងការប្រយុទ្ធបន្ទាប់ គាត់រងរបួសធ្ងន់ជាច្រើនដង ដែលស្ទើរតែមិនអាចឆ្លងផុត ប៉ុន្តែ​បាន​ជា​សះស្បើយ​ដោយ​អព្ភូត​ហេតុ។

សមត្ថភាពជាសះស្បើយដ៏អស្ចារ្យដូចនេះគឺលើសពីដែនកំណត់របស់មនុស្សទៅហើយ។

មិនបោះបង់ទោះស្ថិតក្រោមស្ថានភាពអស់សង្ឃឹមក៏ដោយ

ទោះស្ថិតក្នុងស្ថានភាពអស់សង្ឃឹមក៏ដោយ Funasaka មិនដែលចុះចាញ់ឡើយ។

កងទ័ពជប៉ុនខ្វះអាវុធ លោកបាន​វាយ​ទាហាន​អាមេរិកដោយ​កាំភ្លើងខ្លី ដណ្តើមយកកាំភ្លើងយន្ត ហើយបន្តវាយប្រហារ​សត្រូវ ប្រើ​កាំបិត​ចាក់​មនុស្ស​ម្នាក់​ទៀត​រហូត​ដល់​ស្លាប់។

របួស​ជើង​ឆ្វេង និង​ដៃ​ទាំង​សងខាង ប៉ុន្តែគាត់នៅតែអាចកម្ចាត់ទាហានអាមេរិកចំនួន ៥ នាក់។

ប្រយុទ្ធទាំងមិនអាចដើរទៅមក

កងទ័ពជប៉ុនត្រូវបង្ខំឲ្យដើរដល់ផ្លូវទាល់បន្តិចម្តងៗ។

ដោយសារខ្វះខាតស្បៀងអាហារ ទឹក និងអាវុធ Funasaka – ដែលជាអ្នកប្រយុទ្ធមិនឈប់ក្នុងជួរកងទ័ពជប៉ុន – ក៏​ត្រូវ​ចាក់​ចូល​ពោះ ហើយ​ដង្កូវ​កំពុង​លូត​លាស់​លើ​មុខ​របួស។

គាត់មិនអាចបន្តធ្វើដំណើរទៅមក ត្រឹម​តែអាចវារប៉ុណ្ណោះ។

“សុខចិត្តទុកឲ្យដង្កូវសុីសាច់ប្រសើរជាង” គាត់ដកគ្រាប់បែកធ្វើអត្តឃាតចេញ ប៉ុន្តែវាមិនផ្ទុះ។

ដោយមើលឃើញពីភាពអស់សង្ឃឹមដែលមិនអាចជៀសផុត ហើយក្រុមកងទ័ពស្លាប់ជាបន្តបន្ទាប់ នៅទីបំផុតគាត់​សម្រេច​ចិត្ត​វាយ​លុក​មូល​ដ្ឋាន​ទ័ព​អាមេរិក។

ក្នុងស្ថានភាពដែលស្ទើរតែមិនអាចដើរបាន ដោយមានតែគ្រាប់បែកដៃ ៦ គ្រាប់ និងកាំភ្លើងខ្លី ១ ដើម គាត់បានវាយ​លុក​ចូល​ទី​បញ្ជាការ​យោធាអាមេរិក​តែ​ម្នាក់​ឯង។

នៅទីបំផុត គាត់បានចូលទៅជិតដល់តង់ទី​បញ្ជាការ​យោធា​អាមេរិកសល់ត្រឹម​ចម្ងាយ ២០ ម៉ែត្រ។ យ៉ាងណាមិញ រាងកាយ​របស់​គាត់មាន​របួស​ទាំង​តូច​ទាំង​ធំ ២៤ កន្លែង ក្នុងនោះរបួស ៥ កន្លែងធ្ងន់ធ្ងរ។ គាត់វារទៅដល់ទីនោះក្រោម​ស្ថាន​ភាព​ត្រូវ​បំណែក​គ្រាប់​កាំភ្លើង​ចំនួន ២០ បំណែក​ចាក់​ជាប់​ខ្លួន។

Funasaka រង់ចាំរហូតដល់ទាហានអាមេរិកប្រមូលផ្តុំកាន់តែច្រើនកាន់តែល្អ ហើយត្រៀមខ្លួនសម្រាប់វាយប្រហារ។ នៅពេលដែល Funasaka ក្រោកឈរដោយប្រើកម្លាំងទាំងអស់របស់ខ្លួន ទាហាន​អាមេរិក​មើល​ឃើញ​រូប​រាង​ទ្រុឌ​ទ្រោម​​របស់​​គាត់ ហើយ​គិត​ថា​ពួក​គេ​បាន​ឃើញ​ខ្មោច ដែល​ធ្វើ​ឲ្យ​ពួក​គេ​មិន​អាច​ធ្វើ​ចលនា​បាន។

Funasaka សម្រុកចូលទីបញ្ជាការ ហើយត្រូវទាហានអាមេរិកបាញ់។ នៅពេលដែលទាហានអាមេរិកបានបញ្ជូន Funasaka ជាបុគ្គលដែលជិតស្លាប់ទៅកាន់កន្លែងព្យាបាលយោធា ពួក​គេ​ខំប្រឹង​ដក​យក​អាវុធ​របស់​គាត់ រួម​មាន​គ្រាប់បែកដៃ និងកាំភ្លើងខ្លីមួយដើម ប៉ុន្តែ​គាត់​ក្តាប់​ជាប់​ពេក រហូតដល់ថ្នាក់ពួកគេមិនអាចបើកដៃរបស់​គាត់។

Funasaka និយាយប្រាប់ទាហាអាមេរិកនៅពេលដែលម្រាមដៃ​របស់​គាត់ត្រូវហែកចេញ។

“នេះគឺជា Harakiri (Seppuku) – របៀបស្លាប់ក្លាហានដែលមានតែសាមូរ៉ៃជប៉ុនប៉ុណ្ណោះដែលអាចធ្វើបាន” ។

នៅកន្លែងព្យាបាលយោធា Funasaka មានអារម្មណ៍ត្រូវគេអាណិត ទើបខឹងយ៉ាងខ្លាំង ហើយ​បំផ្លាញ​ឧបករណ៍​​ពេទ្យ។

គេនិយាយថា លោកបានភ្ជង់កាំភ្លើងយន្តរបស់ទាហានម្នាក់ដែលរត់ចូលទៅជិតគាត់ ហើយស្រែកថា “សម្លាប់ខ្ញុំទៅ” ចំណុច​នេះ​បានក្លាយជាប្រធានបទក្តៅក្នុងជួរកងទ័ពអាមេរិក។

ក្រោយមក គាត់ត្រូវឃុំក្នុងគុកសម្រាប់អ្នកទោសសង្គ្រាម ហើយត្រឡប់ទៅផ្ទះវិញក្រោយសង្គ្រាម។

តើលោកនៅរស់ដែរទេ?

ខាងជប៉ុនគិតថា Funasaka បានស្លាប់ក្នុងសង្គ្រាម ដូច្នេះចាត់ទុកគាត់ជាទាហាដែលបានលះបង់ជីវិត។ នៅ​ពេល​ដែល​ Funasaka ត្រឡប់មកផ្ទះ ក្រុម​គ្រួសារ​ភ្ញាក់​ផ្អើល​យ៉ាង​ខ្លាំង។ គាត់ថែមទាំងបានទៅមើលផ្នូររបស់​ខ្លួន ហើយ​រុះរើ​ផ្នូរ​ចេញ។

ក្រោយពេលត្រឡប់មកប្រទេសវិញ Funasaka យល់ថា ជប៉ុនចាញ់អាមេរិកដោយសារការអប់រំ និងវប្បធម៌របស់​ពួក​​គេ។ ដូច្នេះ​​ហើយ​ ទើប​​គាត់​​បើក​​ហាង​​លក់​​សៀវ​​ភៅ​​មួយ។ ហាង​​លក់​សៀវ​ភៅ​នោះ​គឺ Taiseido Bookstore (大盛堂書店) ដែល​​សព្វ​​ថ្ងៃ​​នៅ​​ទល់​​មុខ​​ស្ថានីយ៍ Shibuya ។

អ្នកប្រហែលជាធ្លាប់មើលឃើញ ប្រសិនបើអ្នកធ្លាប់ទៅដល់ Tokyo ។

វាស្ថិតនៅទីតាំងដែលលេចធ្លោ។

ជាងនេះទៅទៀត Funasaka ក៏ល្បីក្នុងនាមជាអ្នកប្រើដាវផងដែរ។ ក្រោយមក នៅពេលដែល Mishima Yukio ជា​បុគ្គល​ដែល​ខំប្រឹង​បង្កើតបដិវត្តន៍នៅជប៉ុនធ្វើអត្តឃាត ដាវដែលប្រើសម្រាប់កាត់ក្បាលរបស់គាត់ត្រូវបានគេចាត់ទុកជាអំណោយរបស់ Funasaka ជូនដល់ Mishima ។

Funasaka មិនត្រឹម​តែទៅដល់កោះដែលគាត់បានប្រយុទ្ធប៉ុណ្ណោះទេ ថែមទាំងទៅដល់កោះផ្សេងទៀត ហើយ​កសាង​​កន្លែង​​រំលឹក​​គុណ​​ផង​​ដែរ។ គាត់ក៏បានសរសេរសៀវភៅជាច្រើន ហើយចំណូលដែលបានមកពីការលក់​សៀវ​ភៅ​ត្រូវ​បាន​បរិច្ចាគ​ឲ្យ​កបាទ​ក្រហម​អន្តរ​ជាតិ ជា​មួយ​នឹង​គោល​បំណង​សន្តិភាព​ពិភព​លោក។

ថ្វីត្បិតតែ ត្រូវបានគេហៅថា “Funasaka អមតៈ” គាត់ក៏បានទទួលមរណភាពនៅឆ្នាំ ២០០៦ ក្នុងអាយុ ៨៥ ឆ្នាំ។ ផ្ទុយ​នឹង​តំណាល​រឿង គេ​និយាយ​ថា គាត់​ជា​មនុស្ស​ស្លូត​បូត​មួយ​រូប​ក្នុង​ជិវិត​ប្រចាំថ្ងៃ។

អ្វី​ដែល “បិសាចក្នុង​រឿងដ៏អស្ចារ្យ” ចង់បានគឺ​សន្តិភាព​សម្រាប់​ពិភពលោក​ និង​ប្រទេស​ជប៉ុន​។ យើងត្រូវបន្តគោរព និង​រក្សា​គោល​បំណង​របស់​ពួក​គេ។

Abe Kengo