អត្ថន័យ​ដែល​គួរ​ឲ្យ​ខ្លាច​បង្កប់​នៅ​ពី​ក្រោយ​រឿង​ព្រេង​និទាន​ជប៉ុន

នៅលើពិភពលោកមានរឿងព្រេងនិទានជាច្រើន។

ទោះបីជាមានចំណុចមួយចំនួនមិនជាក់ស្តែង ប៉ុន្តែចុងបញ្ចប់រឿងនៅតែល្អ ដែលជាទម្រង់រឿងព្រេងនិទានសម្រាប់កុមារ។

យ៉ាងណាមិញ ប្រសិនបើពិចារណាលម្អិតពីអត្ថន័យលាក់កំបាំងនៅពីក្រោយ នៅពេលខ្លះយើងមានអារម្មណ៍ថាខ្លាច។

នៅថ្ងៃនេះ ខ្ញុំចង់ចែករំលែកប្រាប់អ្នកទាំងអស់គ្នារឿង “Momotaro” (កុមារាផ្លែប៉េស) – គឺជារឿងដែលប្រជាជនជប៉ុន​គ្រប់​រូប​សុទ្ធ​តែ​ដឹង។

រឿងដែលកុមារដឹង

រឿងចាប់ផ្តើមដោយទិដ្ឋភាពបុរសចំណាស់ និងស្ត្រីចំណាស់ពីរនាក់រស់នៅជាមួយគ្នាតែគ្មានកូន។

នៅពេលដែលស្រ្តីចំណាស់កំពុងបោក​ខោអាវ​លើទន្លេ ស្រាប់តែមានផ្លែប៉េសយក្សមួយអណ្តែតតាម​ទឹក​នៅចំពោះមុខ​គាត់។

ស្ត្រី​ចំណាស់​យក​ផ្លែ​ប៉េសទៅផ្ទះ ហើយបុរសចំណាស់កាត់ចេញ។ រឿងដែលគួរឲ្យភ្ញាក់ផ្អើលបានកើតឡើង នៅខាងក្នុង​ផ្លែ​ប៉េស​មិន​មាន​សាច់​ផ្លែ​ប៉េស​ទុំ​នោះ​ទេ ប៉ុន្តែជាទារកតូចថ្លោសគួរឲ្យស្រលាញ់ម្នាក់។

ក្មេងប្រុសមានឈ្មោះថា Momotaro ព្រោះចាប់កំណើតចេញពីផ្លែប៉េស។

នៅពេលដែលធំដឹងក្តី Momotaro បានក្លាយជាយុវជនដែលមានកម្លាំងរឹងមាំ និងក្លាហានមួយរូប។

នៅពេលនោះ មានបិសាចមួយក្បាលកំពុងបង្កបញ្ហាដល់ប្រជាជន Momotaro ក៏​សម្រេចធ្វើដំណើរទៅកម្ចាត់ពួក​វា។

នៅតាមផ្លូវ Momotaro ធ្វើជាមិត្តជាមួយឆ្កែ ស្វា និងចាបមួយក្បាល។ ដោយពឹងលើជំនួយពីមិត្តភក្តិទាំងនេះ Momotaro បាន​យក​ឈ្នះ​ពួក​បិសាច ហើយ​នាំ​មក​នូវ​សន្តិភាព​ដល់​ប្រជាជន។

ពិតជារឿងរ៉ាវដែលមានអត្តន័យល្អធ្វើឲ្យមនុស្សគ្រប់គ្នារីករាយ។

តើទារកកើតចេញមកពីផ្លែប៉េស? ផ្លែប៉េសអណ្តែតតាមទន្លេ?

ឈប់សិន ត្រង់ចំណុចនេះដូចជាមិនត្រូវ។

រឿងរ៉ាវផ្លែប៉េសយក្សអណ្តែតលើទន្លេ ហើយចាប់កំណើតចេញជាទារកម្នាក់ពិតជាចម្លែកណាស់? ទោះជារឿងប្រឌិតក៏​ដូច​ជា​មិន​សម​ហេតុ​​ផល​ទាល់​តែ​​សោះ។

ទោះជាយ៉ាងណា ប្រសិនបើយើងក្រឡេកមើលរឿងនេះក្នុងបរិបទប្រវត្តិសាស្រ្តដ៏ខ្មៅងងឹតរបស់ជប៉ុន យើងអាចនឹងមើលឃើញអត្ថន័យ​លាក់​កំបាំងនៅពីក្រោយ។

ការ​សម្លាប់​ទារកជា​ទំនៀមទម្លាប់​ដ៏​ឃោរឃៅ ធ្លាប់ពេញនិយមនៅកន្លែងជាច្រើនលើពិភពលោក។

ទំនៀមទម្លាប់នេះផ្អែកលើទស្សនៈឲ្យតម្លៃបុរសមើលងាយស្រ្តី ដែលចាត់ទុកក្មេងប្រុសជាបុគ្គលមានកម្លាំងធ្វើការ​ងារ ហើយ​ចាត់ទុកក្មេងស្រីដូចជាបន្ទុកសម្រាប់គ្រួសារ។ គួរឲ្យសោកស្តាយ ទំនៀមទម្លាប់នេះធ្លាប់មាននៅប្រទេស​ជប៉ុន។

វិធីមួយក្នុងចំណោមនោះដែលគេប្រើសម្រាប់ចាត់ចែងក្មេងស្រីគឺ​ទម្លាក់តាមទន្លេ។

ជាការពិតណាស់ ជំនួសដោយផ្លែប៉េស រឿងរ៉ាវអាចនឹងជាក់ស្តែងជាងនេះប្រសិនបើយើងនិទានថា ទារកស្រីត្រូវបានគេដាក់ក្នុងវត្ថុប្រើប្រាស់ណាមួយ ហើយអណ្តែតតាមទឹកទៅដល់ស្ត្រីចំណាស់។

តើមិត្តភ័ក្ដិ​របស់​ក្មេង​ប្រុសទន់ខ្សោយពេកទេ?

នៅតាមផ្លូវទៅកម្ចាត់បិសាច Momotaro មានមិត្តភក្តិរួមដំណើរចំនួនបីគឺ៖ ឆ្កែ ស្វា និងចាប។ ទោះជាយ៉ាងណា មើល​ទៅ​ពួក​វា​ពិត​ជា​ទន់​ខ្សោយ​ណាស់​មែន​ទេ? តើពួកវាអាចរួមចំណែកដល់ការប្រយុទ្ធដែរទេ? មនុស្សមួយចំនួនយល់​ថា ការដែល Momotaro ទៅ​ជា​មួយ​ឆ្កែ ស្វា និងចាប បែរជាមិនទៅជាមួយខ្លាឃ្មុំ ឬចចកបង្កប់អត្តន័យណា​មួយ។

• 犬 (Inu) – ឆ្កែ និង 居ぬ (Inu) – មិនមាន៖ ការពន្យល់នេះបង្ហាញថា ឈ្មោះ “Inu” (ឆ្កែ) បង្កប់អត្តន័យ “មិន​មាន” ។
• 猿 (Saru) – ស្វា និង 去る (Saru) – ចាកចេញ៖ ការពន្យល់នេះបង្ហាញថា ឈ្មោះ “Saru” (ស្វា) បង្កប់អត្តន័យ “ចាក​ចេញ” ។
• 雉 (Kiji) – ចាប និង 帰じ (Kiji) – មិនត្រឡប់៖ ការពន្យល់នេះផ្អែកលើរបៀបបញ្ចេញសំឡេង “Kiji” (ចាប) ដែល​ស្រដៀង​នឹង “Kijinai” (មិន​ត្រឡប់) ។

ពិតមែនហើយ ប្រសិនបើយើងពិចារណាមើលឈ្មោះទាំងនេះដូចជាពាក្យសម្ងាត់សំដៅលើការសម្លាប់ទារក គ្រប់យ៉ាងនឹងកាន់​​តែ​​ងាយ​​យល់។

ការដែលថាមិត្តរួមដំណើររបស់ក្មេងប្រុសផ្លែប៉េសមិនមែនខ្លាឃ្មុំ ឬចចកខ្លាំងក្លាបង្ហាញពីអត្ថន័យប្រៀបធៀបនៃឈ្មោះទាំងនេះ។

តើបិសាចជានរណា?

បិសាចតែងតែបង្ហាញខ្លួនក្នុងរឿងព្រេងនិទានជប៉ុន។ ពួកវាមានមាឌធំ កែវភ្នែកធំ ហើយមានកម្លាំងខ្លាំងអស្ចារ្យ​មិន​មែន​វេទមន្ត​ពិសេស​នោះទេ។

ទិដ្ឋភាពបិសាចកាចសាហាវបញ្ចូលតាមរយៈរឿងរ៉ាវបែបនេះ។ ទោះជាយ៉ាងណា មានទ្រឹស្តីមួយនិយាយថា រូបភាពបិសាច​ទាំងនេះផ្តើមមកពីជនជាតិអឺរ៉ុបរសាត់ទៅដល់ជប៉ុន។

ម្យ៉ាងវិញទៀត ប្រភេទបិសាចទាំងពីរដែលបង្ហាញខ្លួនក្នុងរឿងគឺ Aka Oni (បិសាចក្រហម) និង Ao Oni (បិសាច​ខៀវ) ។

ជនជាតិស្បែកសងាយនឹងប្តូរពណ៌ស្បែកជាជាងជនជាតិជប៉ុន ហើយនៅពេលដែលពួកគេរលាកស្បែកដោយសារកម្តៅ​ថ្ងៃ ពួក​គេ​មើល​ទៅ​​ស្លេក​ស្លាំងជា​ជាង​ស្បែកស។

ដូច្នេះហើយ មានទ្រឹស្តីនិយាយថា រូបភាពរបស់ Aka Oni និង Ao Oni អាចនឹងមានប្រភពមកពីភាពខុសគ្នារវាងប្រជាជន​ជប៉ុន និង​ជន​ជាតិ​ស្បែក​ស។

ទោះបីជាពួកគេមិនមានស្នែង ប៉ុន្តែជនជាតិជប៉ុនសម័យនោះមានមាឌតូច ដូច្នេះមិនអាចមើលឃើញក្បាលរបស់​ជន​ជាតិអឺរ៉ុបដែលមានមាឌខ្ពស់នោះទេ។ ដូច្នេះហើយ ពួកគេប្រហែលជាស្រមៃពីរូបភាពស្នែងនៅលើក្បាលរបស់​ជន​​ជាតិ​អឺរ៉ុប។

អ្នកដែលរសាត់អណ្តែតមិនអាចប្រាស្រ័យទាក់ទង ហើយដើម្បីរស់នៅ ពួកគេគ្មានជម្រើសអ្វីក្រៅពីប្លន់យកអាហារ​ពី​ភូមិ​ឡើយ។

នេះគ្រាន់តែជាសម្មតិកម្មមួយក្នុងចំណោមសម្មតិកម្មជាច្រើនទៀត។ យ៉ាងណាមិញ នៅពេលដែលក្រឡេកមើលរឿង​ព្រេង​​និទាន​​ក្រោម​ទស្សនៈ​បរិបទ​ប្រវត្តិ​សាស្ត្រ យើងអាចរកឃើញការពិតដែលគួរឲ្យភ្ញាក់ផ្អើល។

នៅពេលដែលយើងអានរឿងព្រេងនិទាន ក៏ដូចជាទេវកថា ប្រៀបដូចជាមធ្យោបាយដែលបង្ហាញពីប្រវត្តិសាស្ត្រ យើង​អាច​ទទួល​បានការយល់ដឹងកាន់តែច្បាស់អំពីប្រវត្តិសាស្ត្រពិត។

តើប្រទេសរបស់អ្នកមានរឿងរ៉ាវអាថ៌កំបាំងដែលបង្កប់នៅពីក្រោយរឿងព្រេងនិទានដូចនេះដែរទេ?

សូមចែករំលែកប្រាប់ JAPO ផង!

Abe Kengo