កំពូលតារា​សម្តែង Katsu Shintaro ជា​តួអង្គ​ដែល​មិន​អាច​បំភ្លេច​បាន​នៃ​ភាព​យន្ត​ជប៉ុន

នៅពេលដែលរំលឹកដល់ភាពយន្តជប៉ុន មិនអាចមិនរំលឹកដល់តារាសម្តែងដែលមានភាពទាក់ទាញ និងឥទ្ធិពល ជា​អ្នក​ដែលបានរួមចំណែក​បង្កើត​យុគសម័យ​មាស​នៃ​វិស័យ​ភាព​យន្ត។ ក្នុងចំណោមនោះមានតារាសម្តែង Katsu Shintaro ហើយកំពូលស្នាដៃល្បីបំផុតគឺ – Zatoichi ។

ខ្សែភាពយន្តនិយាយពី Zatoichi ជាអ្នកកាន់ដាវដ៏ពូកែមួយរូបធ្វើដំណើរជុំវិញប្រទេសជប៉ុន ប្រព្រឹត្តអំពើសុចរិត និងកម្ចាត់មនុស្សអាក្រក់។

ដោយសារឥទ្ធិពលដ៏ធំធេង Zatoichi ត្រូវបានចាក់ផ្សាយតាមបណ្តាប្រទេសជាច្រើន និងទាក់ទាញទស្សនិកជនយ៉ាងច្រើន។

ចូរយើងស្វែងយល់អំពីកំពូលរឿងរ៉ាវរបស់ Katsu Shintaro ។

“ខ្ញុំនឹងមិនស្លៀកខោទ្រនាប់ទៀតទេ”

នៅឆ្នាំ ១៩៩០ លោក Katsu ត្រូវចាប់ខ្លួននៅអាកាសយានដ្ឋានអន្តរជាតិ Honolulu, Hawaii ព្រោះរក្សាទុក​កូកាអុីន និង​កញ្ឆា។ 

ព័ត៌មានខ្លះបានឲ្យដឹងថា​ លោក Katsu បានលាក់ថ្នាំញៀនក្នុងខោទ្រនាប់របស់ខ្លួន។

យ៉ាង​ណា​មិញ អ្វីដែលទាក់ទាញចំណាប់អារម្មណ៍សាធារណៈជនគឺសម្តីរបស់លោក Katsu ​ក្នុង​សន្និសីទ​កាសែត​បន្ទាប់​ពី​​ត្រូវ​ចាប់​ខ្លួន។

“ដើម្បី​ការពារ​កុំ​ឲ្យ​មាន​ហេតុការណ៍​ស្រដៀង​គ្នា​នេះ​កើត​ឡើងម្តងទៀត​ ខ្ញុំនឹងលែងស្លៀកខោទ្រនាប់” ។

តើឈប់ជក់បារីហើយឬនៅ?

លោក Katsu Shintaro ត្រូវបានគេស្គាល់ថាជាមនុស្សជក់បារីយូរឆ្នាំ ហើយត្រូវបានធ្វើរោគវិនិច្ឆ័យថាមានជំងឺមហារីកបំពង់ក​នៅ​ឆ្នាំ ១៩៩៦ ។

ក្នុង​សន្និសីទ​កាសែត គាត់​​បាន​ជក់​បារីមួយដើមហើយនិយាយថា “ខ្ញុំបាន​ឈប់​ជក់​ព្រោះកំពុង​ទទួល​ការ​ព្យាបាល​មហារីក” ។

ល្បីដោយសារចិត្តទូលាយ

លោក Katsu Shintaro តែងតែនាំក្រុមថតរឿងទាំងមូលទៅផឹក ហើយទូទាត់វិក្កយបត្រទាំងអស់។

ប្រសិនបើពួកគេប្តូរទៅហាងទីពីរ លោក Katsu ក៏នឹងអញ្ជើញគ្រប់គ្នាក្នុងហាងទីមួយទៅជាមួយផងដែរ។

ចំនួនអ្នកចូលរួមអាចនឹងឡើងដល់ ១០០ នាក់ ប៉ុន្តែលោក Katsu នៅតែជាអ្នកទូទាត់ទាំងអស់។

ការចំណាយផឹកស្រារបស់លោក Katsu Shintaro អាចនឹងច្រើនជាង ១០០ លានយ៉េនក្នុងមួយឆ្នាំ។

បើ​គណនា​តាម​តម្លៃ​សព្វថ្ងៃ ប្រហែលជាអាចនឹងឡើងដល់ ៥០០ លាន​យ៉េន។

របៀបបង្រៀនកូនសិស្សចេះបង្ហាញពីអារម្មណ៍ពិត

លោក Katsu នាំកូនសិស្សសាលាសម្តែងដែលខ្លួនបង្កើតទៅកាន់ភោជនីយដ្ឋានលំដាប់ខ្ពស់មួយ។

មុខម្ហូបសាច់គោលំដាប់ខ្ពស់ត្រូវបានលើកចេញ លោក Katsu ខាំមួយមាត់ ហើយស្រែកឡើង។

“តើភោជនីយដ្ឋាន​នេះ​ចាប់​ផ្ដើម​បម្រើ​មុខម្ហូបអន់បែប​នេះ​តាំង​ពី​ពេលណា?”

នៅពេលនោះបុគ្គលិកខ្លាច​ស្លន់ស្លោរត់គេចចេញ មេចុងភៅបានមកសុំទោស។

លោក Katsu បានពន្យល់ថា គាត់ចង់ឲ្យកូនសិស្សរៀនអំពី “ការបង្ហាញពីអារម្មណ៍ភ្ញាក់ផ្អើលពិតរបស់មនុស្ស” ។

លោក Katsu បញ្ជាក់ប្រាប់ចុងភៅដែលកំពុងសុំទោសថា “មិនអីទេៗ” ហើយ​ប្រគល់​ឲ្យ​ចុងភៅស្រោមសំបុត្រ​ដែល​ពេញ​ទៅ​ដោយ​ប្រាក់។

នៅមានរឿងជាច្រើននិយាយពីលោក Katsu ដូចជាលោកបានជួបមិត្តភ័ក្តិតារាសម្តែងម្នាក់ដែលកំពុងទៅផឹកស្រា​ជា​មួយបុគ្គលិកប្រហែល ៣០ នាក់ ហើយលោកបានទូទាត់វិក្កយបត្រទាំងអស់ឲ្យពួកគេ ឬគាត់ចាប់អារម្មណ៍យ៉ាង​ខ្លាំង​ចំពោះការសម្តែងវេទមន្ត ហើយជូនប្រាក់អ្នកសម្តែងវេទមន្តចំនួន ៥០ ម៉ឺនយ៉េននៅនឹងកន្លែង។

ប្រភេទរឿងដែលគាត់សម្តែងមានឈ្មោះថា Jidai-geki (សម័យកាលល្ខោន) ឬគេហៅថារឿងបុរាណជប៉ុន។ ទោះជាយ៉ាងណា ចាប់ពីដើមទសវត្សរ៍ឆ្នាំ ២០០០ ការផលិតភាពយន្តប្រភេទនេះកាន់តែតិចទៅៗ ធ្វើឲ្យលោក​ Katsu ធ្លាក់ក្នុង​ស្ថាន​ភាព​លំបាក។

យ៉ាងណាមិញ លោក Katsu នៅតែមិនបោះបង់របៀបរស់នៅដោយសេរីរបស់ខ្លួន។

នៅទីបំផុត ក្រុមហ៊ុនរបស់លោកបានក្ស័យធនជាមួយនឹងបំណុលចំនួន ១,២ ពាន់លានយ៉េន ទុកឲ្យប្រពន្ធដែលនៅរស់របស់លោកសងបំណុល។

លោក Katsu ជាមនុស្សចិត្តទូលាយមួយរូប។ ទោះ​បី​ជា​លោក​បានទទួលមរណៈភាព ប៉ុន្តែរឿងរ៉ាវរបស់លោកនៅតែត្រូវបានបន្សល់ទុក។

ប្រជាជនជប៉ុនជាច្រើនមានអារម្មណ៍សោកសៅដែលមនុស្សដូចជាលោក Katsu មិនមាននៅជប៉ុនសព្វថ្ងៃ។

លោក Katsu Shintaro នឹងស្ថិតនៅក្នុងការចងចាំប្រៀបដូចជានិមិត្ត​រូប​នៃ​ទឹកចិត្តទូលាយ និងក្តីស្រលាញ់ ជាមនុស្សដែល​បាន​បំផុស​គំនិត​ដល់​ប្រជាជន​ជប៉ុន​ជំនាន់​ក្រោយៗ។

Abe Kengo