តើស្ទីលសម្លៀកបំពាក់ “Yankee” បាន​ត្រឡប់​មក​វិញ និង​ពេញ​និយម​នៅ​ជប៉ុន​មែន​ទេ?

នៅពេលដែលនិយាយពីឯកសណ្ឋានសិស្សក្នុង anime អ្នកគាំទ្រប្រាកដជាមិនអាចរំលងឈុតសម្លៀកបំពាក់ដែលគួរ​ឲ្យ​ចាប់​អារម្មណ៍​នោះ​ទេ។

ជាពិសេសឯកសណ្ឋានក្នុងស្នាដៃល្បីដូចជា Tokyo Revengers, WIND BREAKER ឬ CROWS ។

ចំណុចលេចធ្លោពិសេស ឯកសណ្ឋាន​មិន​ត្រឹម​តែ​ជា​សម្លៀក​បំពាក់​ប៉ុណ្ណោះ​ទេ ថែមទាំងបង្ហាញពីបុគ្គលិកលក្ខណៈ និង​ភាព​ខុស​គ្នា​របស់​តួអង្គ​នីមួយៗ​ផង​ដែរ។

រូបភាពយុវជនបើកម៉ូតូស្លៀកសម្លៀកបំពាក់ពិសេសដែលគេហៅថា “Tokko-fuku” ស្រដៀងទៅនឹងអាវក្រៅវែងបាន​​ទាក់​ទាញ​​ចំណាប់​​អារម្មណ៍។

ស្ទីលម៉ូដសម្លៀកបំពាក់នេះមានឈ្មោះថា “Yankee” ដែលធ្លាប់ពេញនិយមនៅជប៉ុនកាលពី ៤០ ឆ្នាំមុន។

សម្រាប់អ្នកដែលកើតនៅទសវត្សរ៍​ឆ្នាំ ១៩៧០ ដូចជាខ្ញុំ ស្ទីលនេះអាចនឹងនាំមកនូវអារម្មណ៍ដូចជាហួសសម័យបន្តិច។

យ៉ាង​ណា​មិញ អ្វីដែលគួរឲ្យភ្ញាក់​ផ្អើល​នោះ​គឺថា ឈុតសម្លៀកបំពាក់នេះកំពុងតែពេញនិយមសម្រាប់យុវវ័យនៅសម័យ​សព្វ​ថ្ងៃ។

ការផ្លាស់ប្តូរឯកសណ្ឋានសិស្ស

នៅជប៉ុនជាទូទៅសិស្សប្រុសស្លៀកពាក់ឯកសណ្ឋានពេលរៀនអនុវិទ្យាល័យ និងវិទ្យាល័យ។ ប្រភេទឯកសណ្ឋានទូទៅបំផុត​គេ​ហៅថា “Gakuran” ។

នៅពេលដែលស្លៀក Gakuran មើលទៅសុភាពសង្ហា ប៉ុន្តែស្ទីល “Yankee” បែរជាផ្លាស់ប្តូរសម្លៀកបំពាក់នេះតាមរបៀប​ខុសៗ​គ្នា។

ស្ទីលដែលនិយមមានដូចជាកាត់ខ្លី ឬប្រែទៅជាវែងខ្លាំង។

តើការផ្លាស់ប្តូរ Gakuran មានអ្វីគួរឲ្យចាប់អារម្មណ៍?

ការផ្លាស់ប្តូរ​ឯកសណ្ឋានសាលាមានន័យថាបំពានបទបញ្ជាផ្ទៃក្នុងរបស់សាលា។

ចំណុចនេះបង្ហាញពីបំណងចង់គេចចេញពីការរឹតបណ្តឹងនៃបទបញ្ជាផ្ទៃក្នុង។

ទោះជាយ៉ាងណា ស្ទីលម៉ូដសម្លៀកបំពាក់នេះក៏តែងតែទាក់ទាញចំណាប់អារម្មណ៍ និងនាំឲ្យមានបញ្ហាដូចជាត្រូវរក​រឿង​​វាយ​​គ្នា​​ជា​​ដើម។

ជាការពិតណាស់ ប្រសិនបើមិនរឹងមាំ អ្នកនឹងមិនអាច​ស្លៀក​សម្លៀក​បំពាក់​ប្រភេទ​នេះ​បាន​ទេ។ ព្រោះវាក៏ជានិមិត្តរូប​នៃ​កម្លាំង បង្កើត​បាន​ជា​រូប​រាង​ពិសេស​ប្លែក។

យ៉ាងណាមិញ បើគិតទៅលើម៉ូដសម្លៀកបំពាក់ តាមគំនិតរបស់ខ្ញុំវាមិន “ឡូយ” ប៉ុន្មានទេ។

អំពើហឹង្សាមានន័យថាអាក្រក់

នៅទីបំផុត ការយល់ឃើញដែលថា “អំពើហឹង្សាគឺអាក្រក់” បានផ្សព្វផ្សាយនៅទូទាំងប្រទេសជប៉ុន បានធ្វើឲ្យស្ទីល “Yankee” ក្លាយ​ទៅ​ជា​ម៉ូដ​សម្លៀក​បំពាក់​ដែល​លែង​ស្អាត។

ថ្វីត្បិតតែ អាចនិយាយបានថាជប៉ុនបានក្លាយជាប្រទេសស្រលាញ់សន្តិភាព ប៉ុន្តែនៅពេលដែលមនុស្សគ្រប់រូបដូចគ្នា សង្គម​ក៏​មិន​សូវ​មាន​គំនិត​ច្នៃ​ប្រឌិត និង​ថាមពល ធ្វើ​ឲ្យ​ប្រទេស​កាន់​តែ​គួរ​ឲ្យ​ធុញ​ទ្រាន់។

ដូច្នេះហើយ ទើបថ្មីៗនេះយុវវ័យចាប់ផ្តើមមានអារម្មណ៍មិនពេញចិត្តនឹងស្ថានភាពដ៏គួរឲ្យធុញនោះ។

នោះហើយជាមូលហេតុដែលម៉ូដ Yankee បែរជាមានប្រជាប្រិយភាពវិញ។

តើម៉ូដដែលពេញនិយមមុនសង្គ្រាមអាចជាមូលដ្ឋានគ្រឹះនៃស្ទីល “Yankee” នេះដែរទេ?

បន្ទាប់ពីសម័យសាមូរ៉ៃបានបញ្ចប់ របៀបរស់នៅរបស់ប្រទេសលោកខាងលិចត្រូវបាននាំចូលប្រទេសជប៉ុន។

ស្ទីលបែបប្រទេសលោកខាងលិចនេះគេហៅថា “Haikara” ។ យ៉ាងណាមិញ មានមនុស្សមួយចំនួនដើរផ្ទុយនឹងទំនោរ​នេះ។

ស្ទីលរបស់ពួកគេហៅថា “Bankara” ។ គឺជារូបភាពឈុត​គីម៉ូណូធម្មតា ពាក់ស្បែកជើងឈើ និងពាក់មួកសិស្ស។ នៅសម័យ​នោះ សម្លៀក​បំពាក់​រយៀក​រហែក​គឺ​ជា​​និមិត្ត​រូប​​នៃ​​កម្លាំង​ បង្ហាញ​ពី​ភាព​មិន​គោរព​តាម​បទ​បញ្ជា។

ខ្ញុំគិតថា ស្ទីលម៉ូដសម្លៀកបំពាក់នេះបានបង្កើតទៅជាម៉ូដ “Yankee” ។

ការវាយតប់ និងអំពើ​ហិង្សា​មិន​មែន​ជា​រឿង​ល្អ​នោះទេ។ ទោះជាយ៉ាងណា ការដែលបញ្ជាក់ពីខ្លួនឯងក៏មានសារៈ​សំខាន់​ណាស់​ដែរ។

មិនថាវា “ឡូយ” ឬអត់នោះទេ ប្រសិនបើស្ទីល Yankee ពេញនិយមឡើងវិញក្នុងសម័យសព្វថ្ងៃ ដូចជានិមិត្តរូបដែលបង្ហាញ​ពី​ខ្លួន​ឯង និង​បុគ្គលិក​លក្ខណៈ នេះ​អាច​ជា​រឿង​ល្អ​សម្រាប់​សង្គម​ជប៉ុន​ដែល​កំពុង​ខ្វះ​ថាមពល។

Abe Kengo