ស្មារតី​អ្នក​ក្បាច់​គុន Bushido ក្នុង​ជីវិត​សព្វ​ថ្ងៃ (ភាគ ១)

សួស្តីអ្នកទាំងអស់គ្នា។

ខ្ញុំបាទឈ្មោះ Shiden Hiryu ជាគ្រូបង្រៀន ហើយក៏ជាស្ថាបនិកនៃសាលា Shidenryu ដែលជំនាញខាងផ្នែកបង្រៀន​សម្តែង​ក្បាច់​ដាវ​ជប៉ុន (殺陣 – Tate) ផង​ដែរ។

នៅពេលដែលរំលឹកដល់ជប៉ុន យើងតែងតែគិតដល់ទិដ្ឋភាពក្បាច់ដាវជប៉ុន ដូច្នេះបើប្រើពាក្យ “សាមូរ៉ៃ” អ្នកប្រាកដ​ជា​ងាយ​យល់។

មិនដូចជាប្រជាជនធម្មតានោះទេ សាមូរ៉ៃមានសិទ្ធិយកអាវុធតាមខ្លួនគ្រប់ពេលគ្រប់កន្លែង។ ចំណុចនេះបានកំណត់​គំនិត សកម្មភាព និងជះឥទ្ធិពលដល់​ការយល់ឃើញចំពោះ​តម្លៃ និង​សោភ័ណភាពរបស់ជនជាតិជប៉ុន។ នេះ​ជា​ចំណែក​សំខាន់​នៃ​ការ​យល់​ដឹង​អំពី​វប្បធម៌​ជប៉ុន ហើយរួមចំណែកដល់ឧត្តមគតិសន្តិភាពពិភពលោក។

ក្នុងអត្តបទដំបូងនេះនឹងផ្តោតលើការអនុវត្ត “Bushido” – ទស្សនៈជីវិតនៃវណ្ណៈសាមូរ៉ៃ – ក្នុងជីវិតសព្វថ្ងៃ។

គោលការណ៍ទាំង ១០ នៃ Bushido ជប៉ុនដែលសាមូរ៉ៃត្រូវអនុវត្តតាម។

១. មិនត្រូវនិយាយកុហក
២. យកឈ្នះភាពអាត្មានិយម
៣. បណ្ដុះ​ច្បាប់​សីលធម៌
៤. មិន​លើក​សរសើរ​ថ្នាក់លើ ​គោរព​អ្នកក្រោមបង្គាប់
៥. មិននិយាយអាក្រក់ពីអ្នកដទៃ
៦. រក្សាពាក្យសន្យា
៧. មិនបោះបង់ចោលអ្នកដែលត្រូវការជំនួយ
៨. ចេះបែងចែកខុសត្រូវ
៩. មិនរាថយចំពោះសេចក្តីស្លាប់ ហ៊ានលះបង់ខ្លួនដើម្បីកិច្ចការធំ
១០. ឲ្យតម្លៃសេចក្តីស្រឡាញ់

ទស្សនជីវិតរបស់ Bushido មានតម្លៃលើសពីពេលវេលា និងជាតិ ជាតម្លៃសីលធម៌ដែលមនុស្សគ្រប់រូបគួរប្រកាន់ខ្ជាប់។

នៅសម័យនោះ ជីវិតរបស់សាមូរ៉ៃតែងតែប្រឈមនឹងគ្រោះថ្នាក់ អាចនឹងបាត់បង់ជីវិតគ្រប់ពេល គ្រាន់តែខុសមួយ​ជំហាន​ត្រូវ​លះ​បង់​ជីវិត។

ដូច្នេះការ​គោរព​តាម​គោលការណ៍​សីលធម៌​ទាំងនេះ​មាន​សារៈសំខាន់​ខ្លាំង​ណាស់ ដើម្បី​ធានា​សុវត្ថិភាព និង​រក្សា​សណ្តាប់​ធ្នាប់​​ក្នុង​​សង្គម។

ឧទាហរណ៍ប្រសិនបើនិយាយកុហក បោកប្រាស់ ឬអាកប្បកិរិយាមិនគោរព សាមូរ៉ៃអាចនឹងត្រូវភាគីស្តីបន្ទោសភ្លាមៗ​ដោយ​និយាយ​ថា “អ្នកបានធ្វើឲ្យខូចកេរ្តិ៍ឈ្មោះរបស់សាមូរ៉ៃមួយរូប” ហើយត្រូវប្រហារនៅនឹងកន្លែង។

ឬអាចនឹងត្រូវរិះគន់ដូចខាងក្រោម។

“បុគ្គលនោះនិយាយសរសើរថ្នាក់លើ មើលងាយអ្នកក្រោមបង្គាប់ មិនអាចទុកចិត្តបានទេ” ។

នៅពេលនោះ សាមូរ៉ៃអាចនឹងធ្វើអត្តឃាតដោយការវះពោះ (切腹 – Seppuku) ព្រោះគិតថាកិត្តិយសរបស់ខ្លួនត្រូវប្រមាថ ឬ​ស្នើ​ឲ្យ​ភាគី​ប្រកួត​គ្នា។

គ្មាន​អ្នក​ណា​ចង់​ឲ្យ​ស្ថានភាព​បែប​នេះ​កើត​ឡើងនោះទេ ដូច្នេះ​មានន័យថា យើងត្រូវគិតឲ្យបាន​ល្អិតល្អន់​ និងប្រុងប្រយ័ត្ន​ជានិច្ច​មុន​​ពេល​​ធ្វើ​​សកម្មភាព។

“ក្នុងនាមជាមនុស្សម្នាក់ អ្នកចេះក្បាច់គុន ត្រូវចងចាំថាការនិយាយស្តី និងសកម្មភាពទៀងត្រង់” ។

តើគោលការណ៍​ទាំង​នេះ​នៅ​តែរក្សាតម្លៃដើមរហូតមកដល់សព្វថ្ងៃមែនទេ?

ឧទាហរណ៍ត្រឹម​តែគោលការណ៍ “មិនលើកសរសើរថ្នាក់លើ គោរពអ្នកក្រោមបង្គាប់” ក៏បង្ហាញឲ្យយើងឃើញថា មិន​ថា​កាល​ពី​សម័យ​មុន ឬសព្វថ្ងៃ ការត្អូញត្អែរ ការនិយាយដើម និងការច្រណែនអ្នកដទៃមិននាំមកនូវអ្វីល្អនោះទេ។ យ៉ាង​ណា​មិញ ទោះ​បី​ជា​ដឹង​ក៏​នៅ​តែមានមនុស្សជាច្រើននិយាយ​អាក្រក់​ពី​អ្នក​ដទៃ។

ខ្ញុំ​គិត​ថា អ្នកដែលគ្រប់គ្រងអាជីវកម្ម​ ឬយើងហៅថាអ្នកដឹកនាំ តែងយល់ច្បាស់ចំពោះបញ្ហានេះ។ ជាការពិតណាស់ មានមនុស្សជាច្រើនធ្លាប់ជាបុគ្គលិក ឬអ្នកក្រោមបង្គាប់បានចាកចេញពីពួកគេ ហើយក្លាយជាអតិថិជនរបស់ពួក​គេ។ 

ទោះបីជាដឹងរឿងនោះ ប៉ុន្តែយើងបែរជាពិបាកអនុវត្ត ហើយតែងតែអួតអាង។ នៅសម័យសព្វថ្ងៃ ការ​ប្រមូល​យក​បទ​​ពិសោធ​ និង​​កែ​​​លម្អ​​​ខ្លួន​​​ឯង​​ពិត​ជា​ចាំបាច់ខ្លាំងណាស់។

ប្រាកដណាស់ នោះហើយជាមូលហេតុដែលស្មារតី Bushido នៅតែចាំបាច់ក្នុងសម័យសព្វថ្ងៃ។

គ្មាននរណាម្នាក់នៅលើលោកនេះល្អឥតខ្ចោះនោះទេ ប៉ុន្តែស្មារតី Bushido តែងតែឆ្ពោះទៅរកសកម្មភាពដូចជាអ្នក​ក្បាច់​គុន​ពិត​ប្រាកដ​មួយ​រូប ជាអ្វីដែលយើងគួរតែរៀនសូត្រ។

ស្មារតី Bushido គឺជាមរតកដ៏មានតម្លៃរបស់ជប៉ុន។ តាមរយៈការយកតម្រាប់ ​និង​អនុវត្ត​តាមស្មារតីនេះក្នុងជីវិត យើង​អាច​នឹង​ក្លាយ​ជា​មនុស្ស​ល្អ​ជាង​មុន ហើយរួមចំណែក​កសាង​សង្គម​ឲ្យកាន់​តែល្អ​ប្រសើរ។

គ្រូបង្រៀនក្បាច់ដាវ Shiden Hiryu – នៃសាលា Shidenryu ។