ប្រវត្តិ​នៃ​កាបូប “Randoseru” ដែល​សិស្ស​សាលា​ជប៉ុនចូលចិត្ត​ស្ពាយ

ចំណុចមួយដែលធ្វើឲ្យភ្ញៀវទេសចរណ៍បរទេសចាប់អារម្មណ៍ពេលទៅដល់ជប៉ុនគឺទិដ្ឋភាពសិស្សបឋម​សិក្សាស្ពាយ​កាបូប​​ស្បែក​​ដែល​​គេ​ហៅ​​ថា “Randoseru” នេះ។

សម្រាប់គ្រួសារប្រជាជនជប៉ុន កាបូប Randoseru គឺជាអំណោយដ៏មានអត្ថន័យដែលតាយាជូនចៅរបស់ខ្លួនពេលចូល​​រៀន​​ថ្នាក់​​ទី​មួយ។ ស្ទើរតែ ១០០% សិស្សសាលាបឋមសិក្សាប្រើកាបូបស្ពាយនេះសម្រាប់ទុកសៀវភៅ និងសម្ភារៈសិក្សា។

ថ្វីត្បិតតែ ការប្រើប្រាស់កាបូបស្ពាយ Randoseru មិនត្រូវបង្ខំតាមច្បាប់ ឬបទប្បញ្ញត្តិរបស់សាលាក៏ដោយ ប៉ុន្តែកាបូបស្ពាយនេះនៅតែជាជម្រើសរបស់គ្រួសារប្រជាជនជប៉ុន។ ម្យ៉ាងវិញទៀត ទោះបីជាកាបូបស្បែកនេះប្រើបានយូរ ប៉ុន្តែបែរជាធ្ងន់។

ក្រឡេកទៅមើលសិស្សសាលាបឋមសិក្សាជប៉ុនស្ពាយកាបូប Randoseru នៅលើស្មា មនុស្សជាច្រើនតែងឆ្ងល់ថា “តើ​នេះ​ជា “ការ​ដាក់​ទណ្ឌកម្ម” លើរូបរាងកាយតូចដែរទេ?”

យ៉ាងណាមិញ ហេតុ​អ្វីបានជាកាបូបស្ពាយ Randoseru បែរជាពេញនិយមបែបនេះ? ចូរយើងស្វែងយល់ពីអាថ៌កំបាំង​នេះ​តាម​រយៈ​ទស្សនៈ​ប្រវត្តិ​សាស្ត្រ។

ការបំផុសគំនិតដំបូងបានមកពីរបស់របរយោធា

តើអ្នកដឹងទេថា Randoseru គឺជាពាក្យដែលមានប្រភពមកពីភាសាហូឡង់ដែរទេ?

នៅលើសមរភូមិជាកន្លែងដែលគ្រប់ពេលអាចបញ្ចប់ជីវិតរបស់មនុស្សម្នាក់ ពិតជាសំខាន់ខ្លាំងណាស់ព្រោះដៃប្រើសម្រាប់ប្រយុទ្ធ ដូច្នេះការដែលស្ពាយកាបូបក្រោយខ្នងគឺជារឿងធម្មតាណាស់។

ដោយយល់អំពីសារៈសំខាន់របស់កាបូបស្ពាយក្នុងសង្គ្រាម គេបានផលិតកាបូបពីស្បែកដែលប្រើប្រាស់បានយូរ។

ព្រោះតែអត្ថប្រយោជន៍ទាំងនេះហើយ ទើបជប៉ុនចាប់ផ្តើមដាក់ឲ្យប្រើប្រាស់ Randoseru ក្នុងយោធា ដែលជាជំហាន​សំខាន់​ឆ្ពោះ​ទៅ​រក​ដំណើរ​ការ​ទំនើបកម្មយោធា។

Randoseru ត្រូវបានដាក់បញ្ចូលក្នុងសាលា

នៅឆ្នាំ ១៨៨៥ កាបូប Randoseru ត្រូវបានគេប្រើដំបូងនៅសាលាដែលមានឈ្មោះថា Gakushuin ។

នៅពេលនោះ នាយកសាលាគឺលោក Tani Tateki ជាបុគ្គលម្នាក់ដែលមានឥទ្ធិពលក្នុង​ការ​លើក​កម្ពស់​កម្លាំង​យោធា​​ក្នុង​​រដ្ឋាភិបាល។ លោកមើលឃើញពីគុណសម្បត្តិរបស់ Randoseru ហើយយល់ថា កាបូបស្ពាយនេះនឹងនាំមកនូវ​អត្ថប្រយោជន៍​ដល់​សិស្ស។

ដោយបទពិសោធន៍របស់ខ្លួន លោក Tani Tateki អាចយល់យ៉ាងច្បាស់អំពីអត្ថប្រយោជន៍ដែល Randoseru នាំ​មក។

និយាយអញ្ចឹង ខ្ញុំក៏ចង់ណែនាំបន្តិចអំពីសាលា Gakushuin ផងដែរ។ ដំបូងសាលានេះត្រូវបានបង្កើតនៅ Kyoto ហើយ​ជា​សាលា​សម្រាប់​សមាជិក​នៃ​គ្រួសារ​រាជវង្ស។

ថ្វីត្បិតតែ ក្រោយមកសាលាបានប្តូរទៅកាន់ទីក្រុង Tokyo ប៉ុន្តែសព្វថ្ងៃកូនៗនៃគ្រួសាររាជវង្សនៅតែរៀននៅសាលានេះ។

Randoseru កាន់តែពេញនិយមសម្រាប់ប្រជាជនធម្មតា

ដោយសារផលិតពីស្បែកបានជា Randoseru ក្លាយជារបស់ប្រើលំដាប់ខ្ពស់។ ជាការពិតណាស់ មានតែអ្នកមានទេដែលសមត្ថភាពទិញកាបូបនេះ ចំណែកសិស្សភាគច្រើនប្រើកាបូបក្រណាត់ ឬក្រណាត់រុំ Furoshiki (風呂敷) ។

Furoshiki គឺជាក្រណាត់ធំប្រើសម្រាប់រុំរបស់របរ អាចវេចនៅលើស្មា ឬកាន់ដៃ។ នៅពេលនោះ Randoseru បានក្លាយ​ជា​ក្តី​ស្រមៃរបស់សិស្សជាច្រើននាក់។

យូរៗទៅជាមួយនឹងការអភិវឌ្ឍបច្ចេកវិទ្យាផលិតស្បែកសិប្បនិម្មិត ជួយកាត់បន្ថយតម្លៃទិញ Randoseru ហើយប្រជាជន​ធម្មតា​ក៏​អាច​រក​ទិញបានយ៉ាងងាយផងដែរ។

កាលពីមុន Randoseru ត្រូវគេចាត់ទុកជានិមិត្តរូបនៃទ្រព្យសម្បត្តិ ជាមួយនឹងទស្សនៈ “Randoseru = កូនអ្នកមាន” ។

ដូច្នេះហើយ នៅពេលដែលតម្លៃ Randoseru ធ្លាក់ចុះ ឪពុកម្តាយជាច្រើនចង់ឲ្យកូនៗរបស់ខ្លួនអាចប្រើកាបូបក្នុង​ក្តី​ស្រមៃ​នេះ ដែល​បណ្តាល​ឲ្យ​តម្រូវ​ការ​កើនឡើង ហើយ Randoseru កាន់តែពេញនិយម។

Randoseru ចម្រុះពណ៌

កាលពីជាង ៤០ ឆ្នាំមុន នៅពេលដែលខ្ញុំនៅរៀនសាលាបឋមសិក្សា ពណ៌កាបូប Randoseru សាមញ្ញណាស់៖ ក្មេងប្រុស​ប្រើ​ពណ៌​ខ្មៅ ក្មេង​ស្រី​ប្រើពណ៌ក្រហម។

បងស្រីរបស់ខ្ញុំលើសខ្ញុំ ៣ ឆ្នាំ ដោយមូលហេតុ​ណាមួយបែរជាមានកាបូប Randoseru ពណ៌ផ្កាឈូក។ ប៉ុន្តែក្នុងចំណោម​សិស្ស​ក្នុង​សាលា មាន​តែ​ប៉ុន្មាន​នាក់​ប៉ុណ្ណោះដែលមានកាបូបពណ៌ខុសគ្នាបែបនេះ។

ប៉ុន្តែសព្វថ្ងៃនេះ សម័យកាលបានផ្លាស់ប្តូរ សិស្សអាចជ្រើសរើសពណ៌កាបូប Randoseru ខុសៗគ្នាដូចជាពណ៌លឿង បៃតង ខៀវ ផ្កាឈូក ស។ល។

កូនស្រីរបស់ខ្ញុំរើសយកពណ៌ខៀវ។ កាបូបមានច្រើនពណ៌បង្ហាញពីបុគ្គលិកលក្ខណៈរបស់កុមារ ពិតជាល្អណាស់។ យ៉ាង​ណា​មិញ ខ្ញុំ​នៅ​តែមិនយល់ថាហេតុអ្វីបានជាពីមុនកាបូប Randoseru មានពណ៌ខ្មៅ និងក្រហម។

ឯកសណ្ឋាននាវិកផ្សារភ្ជាប់នឹងរូបភាពរបស់សិស្សជប៉ុន

ក្រៅពីលក្ខណៈ​វប្បធម៌​ពិសេស ជប៉ុនថែមទាំងផ្សារភ្ជាប់នឹងទិដ្ឋភាពសិស្សស្លៀកឯកសណ្ឋាន​នាវិក។

ដូចដែលមនុស្សជាច្រើនបានដឹងហើយថា ឯកសណ្ឋាននាវិកត្រូវបានបំផុសគំនិតដោយសម្លៀកបំពាក់របស់នាវិក​កង​នាវាចរ​អង់​គ្លេស។

កអាវធំត្រូវបានរចនាឡើងដើម្បីជួយឲ្យនាវិកងាយស្តាប់ឮសំឡេងនិយាយគ្នានៅលើកប៉ាល់ដែលមានសម្លេងរំខាន ចំណែកឯ​កន្សែង​រុំកត្រូវគេចាត់ទុកថាប្រើសម្រាប់ជូតញើស។

ពិតជាគួរឲ្យភ្ញាក់ផ្អើលណាស់ដែលដឹងថា មនុស្សដំបូងដែលពាក់ឯកសណ្ឋាននាវិកនៅជប៉ុនជាបុរស នោះគឺអធិរាជ Taisho ។

ក្រោយមកនៅឆ្នាំ ១៩២៣ រញ្ជួយដីធំមួយដែលមានឈ្មោះហៅថា “គ្រោះមហន្តរាយរញ្ជួយដី Kanto” បានកើតឡើងនៅតំបន់ខាងត្បូង Kanto ភាគច្រើននៅ Tokyo ។

នៅពេលនោះ ភាគច្រើនប្រជាជនជប៉ុនស្លៀក kimono ប៉ុន្តែ kimono បែរជាពិបាកសម្រាប់ការធ្វើដំណើរ ដែលបណ្តាល​ឲ្យ​មនុស្ស​ជា​ច្រើន​មិន​អាច​រត់​គេច​ខ្លួន​​ពេលមានគ្រោះមហន្តរាយ ធ្វើឲ្យមនុស្សបាត់បង់ជីវិត។

ព្រឹត្តិការណ៍នេះបានជម្រុញឲ្យសាកលវិទ្យាល័យសិស្សស្រី Ochanomizu យកឯកសណ្ឋាននាវិក។ ចាប់​តាំង​ពី​ពេល​នោះ​​មក ឯក​សណ្ឋាន​​នាវិក​​កាន់​តែ​ពេញ​និយម​ទៅៗ ហើយ​​ក្លាយ​​ជា​និមិត្ត​រូប​របស់​សិស្ស​ស្រី។

សុភាពបុរសដែលចូលចិត្តឯកសណ្ឋាននាវិក ចូរទប់អារម្មណ៍ឲ្យបាន។

សូមកុំ​រំភើប​ពេក​ពេល​ដឹង​ថា ដំបូងឡើយឯកសណ្ឋាន​នេះ​សម្រាប់បុរស។

Abe Kengo