ពិត​ជា​ស្តាយ​ណាស់! ពិធី​បុណ្យ​ប្រពៃណី​ជប៉ុន​ដែល​មាន​អាយុ​កាល ១០០០ ឆ្នាំ​ត្រូវ​បញ្ចប់

ពិធីបុណ្យប្រពៃណីជប៉ុនដែលជិតនឹងបាត់បង់។

ពិធីបុណ្យនោះហៅថា “អាក្រាត” Somin-sai នៅទីក្រុង Oshu ខេត្ត Iwate ដែលមានប្រវត្តិ ១០០០ ឆ្នាំមកហើយ។

ពិធីបុណ្យ Somin-sai ក្នុងទីក្រុង Oshu ខេត្ត Iwate នេះប្រារព្ធធ្វើឡើងអំឡុងពេលដែលប្រទេសនៅលើពិភពលោកកំពុង​​ទទួល​​ឆ្នាំ​ថ្មី។

ពិធីបុណ្យនេះទាក់ទាញភ្ញៀវទេសចរណ៍ដោយទិដ្ឋភាពបុរសៗស្លៀកសំពត់ប៉ឹង Fundoshi (ដូចជាប្រភេទសំពត់ដែល Sumo តែង​តែ​ស្លៀក​ពេលប្រកួត) ដណ្តើម​គ្នា​ថង់​ក្រចៅ​មួយ។ អ្នក​ឈ្នះ​គឺ​ជា​អ្នក​ដែល​ចាប់​បានមាត់ថង់ក្រចៅ។

ដោយមានអត្តន័យបួងសួង​សុំ​ឲ្យ​មាន​សុខភាព​ល្អ ការប្រមូលផលបានច្រើន ដូច្នេះហើយ Somin-sai គឺជាពិធីបុណ្យដ៏​​ពិសិដ្ឋ។ បើតាមជំនឿ នៅតំបន់ដែលអ្នកឈ្នះរស់នៅការប្រមូលផលបានល្អនៅឆ្នាំនេះ។

ក្នុងថង់ក្រចៅមិនត្រឹម​តែមានយ័ន្តការពារប៉ុណ្ណោះទេ ថែមទាំងមានបន្ទះឈើដែលគេប្រើក្នុងពិធីបួងសួងប្រាសាទ​​ផង​​ដែរ។ ប្រជាជន​ជឿ​ថា គ្រាន់តែប៉ះបន្ទះឈើនេះនឹងនាំមកនូវសំណាងល្អ។

នៅ Oshu រដូវរងាសីតុណ្ហភាពពេលយប់អាចនឹងក្រោម ០ អង្សារសេ។ ប៉ុន្តែទិដ្ឋភាពដែលបុរសៗស្លៀកសំពត់ប៉ឹងដណ្តើម​គ្នាថង់ក្រចៅធ្វើឲ្យ​បរិយាកាស​កក់​ក្តៅជាងពេលណាៗទាំងអស់។

ជាការពិតណាស់នេះពិធីបុណ្យសម្រាប់បុរសៗ។

នៅឆ្នាំនេះ ពិធីបុណ្យ Somin-sai ត្រូវបានប្រារព្ធឡើងវិញ បន្ទាប់ពីផ្អាកអស់រយៈពេល ៤ ឆ្នាំដោយសារជំងឺកូវីដ ១៩ ។

ពិធីបុណ្យឆ្នាំនេះត្រូវបានរៀបចំឡើងក្នុងទម្រង់ថ្មី ដោយកាត់បន្ថយពេលវេលាបើធៀបនឹងឆ្នាំមុនៗ ដើម្បីសម្រួលបន្ទុកក្នុងការរៀបចំ។ ជាក់ស្តែង ពិធីបុណ្យនេះ ធ្វើឡើងចាប់ពីម៉ោង ៦ល្ងាច ដល់ម៉ោង ១១យប់ មិនធ្វើឡើងពេញមួយ​យប់​ដូច​កាល​ពី​មុន​នោះ​ទេ។

យ៉ាងណាមិញ នៅឆ្នាំនេះក៏ជាឆ្នាំចុងក្រោយនៃពិធីបុណ្យ Somin-sai ផងដែរ។

ថ្វីត្បិតតែ ពិធីបុណ្យប្រពៃណីនេះមានអាយុកាលជាង ១០០០ ឆ្នាំមកហើយ ប៉ុន្តែជាក់ស្តែងយុវជនមិនច្រើនទេដែលបន្ត ដោយសារស្ថានភាពប្រជាជនវ័យចំណាស់កាន់តែច្រើនឡើងតាមតំបន់មូលដ្ឋាន ដែលធ្វើឲ្យពិធីបុណ្យមិនអាចបន្តបាន។

ចំនួនប្រជាជនទីក្រុង Oshu បានបន្តធ្លាក់ចុះចាប់ពីពេលឡើងដល់ចំនួន ១៣០.០០០ នាក់ក្នុងឆ្នាំ ១៩៩៥ និងបច្ចុប្ប​ន្ន​មានចំនួន ៨៦.០០០ នាក់។ ជាតំបន់ដែលមានចំនួនប្រជាជនថយចុះ ចំនួនមនុស្សចាស់កើនឡើង ចំណែក​ឯ​យុវជន​ធ្លាក់​ចុះ។

ប្រជាជនគិតថា ប្រសិនបើទំនោរនេះនៅតែបន្ត ប្រជាជន Oshu អាចនឹងធ្លាក់ចុះសល់ ៦០.០០០ នាក់នៅឆ្នាំ ២០៦០ ។

ជប៉ុនថែរក្សាប្រពៃណី និងពិធីបុណ្យប្លែកៗជាច្រើនក្នុងទីក្រុងតំបន់មូលដ្ឋាន។ ទោះជាយ៉ាងណា តំបន់ជាច្រើនក្នុងចំណោមនោះស្ថិតក្នុងស្ថានភាពចំនួនប្រជាជនធ្លាក់ចុះ ហើយប្រហែលជាមិនអាចបន្តវប្បធម៌ដ៏ល្អដល់មនុស្សជំនាន់​ក្រោយ​បាន។

ពិធីបុណ្យប្រពៃណីជប៉ុនជាច្រើនផ្សេងទៀតអាចនឹងត្រូវបាត់បង់។ ប្រសិនបើអ្នកមិនចូលរួមពិធីបុណ្យទាំងនេះ អ្នក​​ប្រហែល​ជា​លែងមានឳកាសនៅឆ្នាំក្រោយទៀតហើយ។

ដូច្នេះនៅចាំអ្វីទៀត ចូររៀបចំគម្រោងដំណើរកម្សាន្តទៅកាន់ប្រទេសជប៉ុនឥឡូវនេះ។ នេះជាឳកាសដ៏ល្អសម្រាប់ដែល​​ចង់​​ស្វែង​​យល់​​ពី​​វប្បធម៌​​ជប៉ុន។

Abe Kengo