ឥទ្ធិពលនៃប្រព័ន្ធផ្សព្វផ្សាយ តើ​មតិ​យោបល់​ដោយ​ចៃដន្យ​អាច​ផ្លាស់​ប្តូរ​ពិភព​លោក​បាន​ដែរ​ទេ?

តើអ្នកដឹងទេថាគ្រាន់តែមតិយោបល់ដោយចៃដន្យក្នុងកម្មវិធីទូរទស្សន៍ជប៉ុននៅឆ្នាំ ១៩៨៨ បានរួមចំណែកស្តារវត្ថុ​បុរាណ​នៅ​ប្រទេស Chile ដែរទេ?

ក្នុងអត្តបទថ្ងៃនេះ យើងនឹងស្វែងយល់អំពីកម្លាំងនៃមតិយោបល់នោះ និងឥទ្ធិពលវិជ្ជមានមកលើពិភពលោក។

មតិយោបល់នោះបានមកពីកម្មវិធី​ទូរទស្សន៍ដែល​មាន​ឈ្មោះ​ថា “ស្វែងយល់អាថ៌កំបាំងពិភពលោក” ដែលសំណួរទាក់​ទង​នឹងអាថ៌កំបាំង​នៅជុំវិញពិភព​លោក។ ប្រធានបទនៅថ្ងៃនោះលើកយករូបសំណាក Moai នៅកោះ Easter ប្រទេស Chile ។

Moai គឺជារូបសំណាកថ្មធំដែលស្ថិតនៅលើកោះ Easter ប្រទេស Chile ។ ដោយកម្ពស់ជាមធ្យម ៣,៥ ម៉ែត្រ និងរូបសំណាកដែលខ្ពស់បំផុតគឺ ២០ ម៉ែត្រ រូបសំណាក Moai មានទម្ងន់អតិបរមារហូតដល់ទៅ ៩០ តោន។

គេជឿជាក់ថា រូបសំណាកថ្មអាថ៌កំបាំងទាំងនេះត្រូវបានសាងសង់ឡើងដើម្បីបម្រើដល់ពិធីសាសនា ប៉ុន្តែចំណុចនេះនៅតែជាអាថ៌កំបាំងមិនទាន់មានចម្លើយ។

រូបសំណាកថ្មទាំងនេះត្រូវបានធ្វើ និងដឹកជញ្ជូនយ៉ាងណាក៏ជាអាថ៌កំបាំងផងដែរ។ គេនិយាយថា នៅលើកោះ Easter មាន​ដល់​ទៅ ៩០០ រូបសំណាក Moai រួមទាំងរូបសំណាកដែលកំពុងបង្ហើយ។

ចូរស្រមៃមើល កោះដែលមិនធំប៉ុន្មាន បែរជាមានរូបសំណាកថ្មជាច្រើននៅរាយប៉ាយគ្រប់កន្លែង បង្កើតបានជាទិដ្ឋភាពដែលគួរឲ្យចាប់អារម្មណ៍។

ពិតជាគួរឲ្យសោកស្តាយណាស់ពេលដឹងថា Moai ដែលជាបេតិកភណ្ឌវប្បធម៌ពិសេស និងមិនអាចកាត់ថ្លៃបាននៃ​កោះ Easter បែរជាត្រូវបំផ្លាញដោយការដណ្តើមអំណាចរវាងកុលសម្ព័ន្ធនៅលើកោះទៅវិញ។ ចំនួនរូបសំណាក Moai ដែល​ត្រូវ​គេ​ផ្តួល​​រំលំ​មានច្រើនណាស់ ដោយធ្វើឲ្យយើងមានអារម្មណ៍សោកស្តាយ។

នៅពេលដែលព័ត៌មាននេះត្រូវបានចាក់ផ្សាយក្នុងកម្មវិធី មតិយោបល់បង្ហាញពីភាពសោកស្តាយរបស់អភិបាលស្រុកនិយាយថា “ប្រសិនបើមានរថយន្តស្ទូចមួយ…” បានទាក់ទាញចំណាប់អារម្មណ៍របស់មនុស្សគ្រប់គ្នា។

បន្ទាប់ពីបានស្តាប់ការលើកឡើងនេះ តារាសម្តែងស្រី Kuroyanagi Tetsuko ដែលជាអ្នកចូលរួមកម្មវិធីនេះបាននិយាយ​ដូច​ត​ទៅ៖

“តើ HITACHI មិនមានម៉ាសុីនស្ទូចទេឬ? ប្រសិនបើ HITACHI មានម៉ាសុីនស្ទូចពិតជាល្អណាស់…” ។

អ្នកឧបត្ថម្ភធំសម្រាប់កម្មវិធីនេះគឺ HITACHI ។

បុគ្គលម្នាក់ដែលបានមើលការផ្សាយចាប់ផ្តើមធ្វើសកម្មភាព។ លោកជាបុគ្គលិកក្រុមហ៊ុន TADANO LTD., ដែលមានទីស្នាក់ការនៅខេត្ត Kagawa ប្រទេសជប៉ុន។ នេះជាក្រុមហ៊ុនផលិតរថយន្តស្ទូចផ្នែកសំណង់ដ៏ធំបំផុតនៅលើពិភព​លោក។

ដោយផ្អែកលើសំណើរបស់លោក គម្រោងស្តារនៅលើកោះ Moai ត្រូវបានចាប់ផ្តើម។ នៅ​ពេល​នោះ ជប៉ុន​កំពុង​ស្ថិត​ក្នុង​សម័យកាលសេដ្ឋកិច្ចពពុះ។ ទោះបីជាសេដ្ឋកិច្ចមានភាពរីកចម្រើន និង​មាន​ប្រាក់​ច្រើនសម្រាប់អនុវត្ត​សកម្មភាព​​ដែល​រួម​ចំណែក​ដល់​សង្គម ប៉ុន្តែទីតាំង​គម្រោង​នេះ​ជា​កោះ​ដាច់ស្រយាល​​ដែល​មាន​ចម្ងាយ ៣.៧០០ គីឡូម៉ែត្រ​​ពី Chile ដែលបង្កើតជាបញ្ហាជាច្រើនសម្រាប់គម្រោង។

ក្រៅពីនេះ មិនមានកំពង់ផែសម្រាប់នាំយកឧបករណ៍ធុនធ្ងន់នោះទេ ហើយនៅពេលនោះ Chile កំពុងស្ថិតក្នុងស្ថាន​ភាព​ចលាចល ដូច្នេះ​ពិបាក​ទទួល​យក​ជំនួយ។

ទោះជាយ៉ាងណា ការស្តាររូបសំណាក Moai ប៉ុណ្ណោះមិនគ្រប់គ្រាន់នោះទេ ប៉ុន្តែត្រូវមានការស្ទង់មតិផ្នែកបុរាណវិទ្យា ចំណុចនេះបង្កើតជាបញ្ហាប្រឈមយ៉ាងខ្លាំង។ ក្រុមហ៊ុន TADANO បានផ្តល់ជាអំណោយរថយន្តស្ទូចចំនួន ៣ គ្រឿង និង​​ស្តារ​​រូប​សំណាក Moai ជា​បន្ត​បន្ទាប់។

ទន្ទឹមនឹងនេះ ក្រុមហ៊ុន​ក៏បានបង់ថ្លៃចំណាយទាំងអស់សម្រាប់​រថយន្ត​ស្ទូច​ ថ្លៃដឹកជញ្ជូន និងគម្រោងជួសជុលទាំង​មូល​ផង​ដែរ។

នៅទីបំផុត កោះទាំងមូលត្រូវបានទទួលស្គាល់ជាបេតិកភណ្ឌពិភពលោក។

តារាសម្តែងស្រី Kuroyanagi Tetsuko ដែលជាអ្នកបញ្ចេញមតិបំផុសគំនិតដល់គម្រោងនេះ ដំបូងឡើយមិនដឹងពីសកម្មភាពស្តារឡើងវិញនោះទេ ហើយប្រហែលជានៅឆ្នាំ ២០១០ ទើបគាត់ដឹងថា មតិយោបល់ធម្មតារបស់ខ្លួនបានផ្លាស់​ប្តូរ​ពិភព​លោក។

ប្រសិនបើមិនមានកម្មវិធីនេះ ហើយបើសិនជាអ្នកស្រី Kuroyanagi Tetsuko មិនបានបញ្ចេញមតិបែបនេះ ប្រហែល​ជា​រូប​សំណាក Moai ដែល​នៅ​លើ​កោះ Easter នឹង​នៅ​ដដែល។

អាច​និយាយ​បាន​ថា​ នេះជាមតិយោបល់ដែលបាន​ផ្លាស់​ប្តូរ​ពិភពលោក។ ក្រៅ​ពី​នេះ បុគ្គលិក​ក្រុមហ៊ុន TADANO LTD., ដែល​ជា​អ្នក​ទទួល​យក​គំនិត ហើយចាប់ផ្តើម​អនុវត្ត​គម្រោង​នេះ​ក៏​អស្ចារ្យ​ណាស់​ដែរ។

ប្រសិនបើអ្នកមានឱកាសទៅដល់កោះ Easter សូមចងចាំដល់ប្រជាជនជប៉ុនដែលបានចូលរួមក្នុងគម្រោងនេះ។

Abe Kengo