កាំបិតជប៉ុន “លក្ខណៈ​ពិសេស និង​ភាព​ទាក់​ទាញ” គ្រាន់​តែ​ប្រើ​ម្តង​អ្នក​ប្រាកដ​ជា​ពេញ​ចិត្ត

ភាគច្រើនភ្ញៀវទេសចរណ៍ដែលទៅលេងជប៉ុនចូលចិត្តទិញកាំបិតទុកជាវត្ថុអនុស្សាវរីយ៍។ មូលហេតុដែលចំនួនអ្នកទិញកាំបិតជប៉ុនកាន់តែច្រើនឡើង ព្រោះនៅពេលដែលអ្នកប្រើកាំបិតជប៉ុន អ្នក “នឹងមិនអាចប្រើប្រភេទកាំបិត​ផ្សេង​ទៀត” ឡើយ។

កាំបិតជប៉ុនផលិតឡើងដោយប្រើបច្ចេកទេសលត់ដាវជប៉ុន ដោយល្បីថា កាំបិតមុតល្អ និងមានច្រើនប្រភេទ ដែល​ប្រើ​សម្រាប់​គោលបំណងខុសៗគ្នា។

ជាពិសេសកម្រិតមុតស្រួច របៀបប្រើកាំបិតជប៉ុនខុសនឹងកាំបិតនៅប្រទេសផ្សេងទៀត។ កាំបិតនៅប្រទេសផ្សេងតែងតែប្រើវិធីកាត់ “Oshikiri” (រុញកាំបិតទៅមុខហើយកាត់) ចំណែកឯកាំបិតជប៉ុនប្រើវិធីកាត់ “Hikikiri” (កាំបិត​កាត់​ពី​មុខ​ត្រឡប់​ក្រោយ) ។

ប្រសិនបើអ្នកមានកាំបិតជប៉ុន ចូរសាកល្បងមើល។

គ្រាន់តែទាញកាំបិតកាត់ត្រឡប់ក្រោយដោយមិនចាំបាច់ប្រើកម្លាំង អ្នកអាចកាត់គ្រឿងផ្សំបានយ៉ាងងាយ។ អារម្មណ៍​បែប​នេះ​ជួយឲ្យការចម្អិនអាហារកាន់តែមានភាពងាយស្រួល។

ម្យ៉ាងវិញទៀត ប្រើរបៀបកាត់ “Hikikiri” នេះ អ្នកអាចកាត់គ្រឿងផ្សំដែលទន់ងាយបែក។ ជាប្រភេទកាំបិតដែលមិន​អាច​ខ្វះ​បាន​ប្រើសម្រាប់កាត់ sashimi ។

និយាយពីរបៀបកាត់ Hikikiri តើអ្នកដឹងថាដាវជប៉ុនរាងកោងបន្តិចដែរទេ?

កម្រិតកោងរបស់កាំបិតជួយសម្រួលដល់របៀបកាត់ “Hikikiri” ជាកត្តាដែលធ្វើឲ្យដាវជប៉ុនមុតស្រួចធម្មជាតិ។ ដូច្នេះ​ហើយ “Hikikiri” ជា​បច្ចេក​ទេស​សំខាន់​សម្រាប់ប្រើកាំបិតជប៉ុនកាត់អ្វីម្យ៉ាង។

ហេតុអ្វីបានជាកាំបិតជប៉ុនមុតស្រួចបែបនេះ?

ដោយសារបច្ចេកទេស​ធ្វើ​កាំបិត​បាន​មក​ពី​បច្ចេកទេសលត់ដាវជប៉ុន ដូច្នេះខ្ញុំ​នឹង​ពន្យល់​ដោយ​ផ្អែក​លើ​ដាវ​ជប៉ុន។

វត្ថុធាតុដើមសំខាន់ដែលប្រើសម្រាប់លត់ដាវជប៉ុនគឺដែក (hagane) ដែលបង្កើតឡើងដោយរបៀបដុតរលាយ និងធ្វើ​ឲ្យ​ត្រជាក់​ដែក។ បរិមាណកាបូនក្នុងដែកថែបកាន់តែខ្ពស់កាន់តែរឹង និងផ្ទុយមកវិញ។ ដែកដែលរឹងខ្លាំងងាយនឹង​បាក់ ដែកដែលទន់ពេកមិនមុតនោះទេ។

ដូច្នេះហើយ វត្ថុធាតុដើមដែលប្រើសម្រាប់ធ្វើដាវជប៉ុនគឺដែកថែម “tamahagane” ដែលជាលក្ខណៈពិសេសរវាងកម្រិត​មុត​ស្រួច និងភាពបត់បែន។

លក្ខណៈពិសេសមួយផ្សេងទៀតគឺការរួមបញ្ចូលរវាងដែកថែម tamahagane មានកម្រិតទន់ និងរឹងខុសគ្នា។ ផ្នែកស្នូល​ខាង​ក្នុង​ប្រើ​ដែក​ថែម tamahagane ទន់ ចំណែកឯផ្នែកខាងក្រៅប្រើដែកថែម tamahagane រឹង។

តើអ្នកធ្លាប់មើលឃើញគំនូសបន្ទាត់ស្អាតដែលគេហៅថា hamon នៅលើដាវជប៉ុនដែរទេ? ដែលជាភស្តុតាងបង្ហាញ​ថា មាន​ច្រើន​ស្រទាប់​លោហធាតុ​ទន់រឹងត្រួតលើគ្នា។

ដោយភាពល្អិតល្អន់ និងការតាំងចិត្តរបស់សិប្បករ ដាវជប៉ុនបានក្លាយជាអាវុធដែលគេចាត់ទុកថា “មានដួងវិញ្ញាណ​របស់​សាមូរ៉ៃ” ។

ដែលជាកម្រិតសិប្បករកំពូល មិនមែន​កម្រិត​ធម្មតា​ទៀតឡើយ ហើយក៏ជាការបង្ហាញពីស្មារតី “Made in Japan” ផង​ដែរ។

ការច្នៃប្រឌិតដ៏អស្ចារ្យនៃកំពូលសិប្បករជប៉ុនមិនមែនមានតែប៉ុណ្ណឹងនោះទេ។ សិប្បករបានបង្កើតកាំបិតដែលបំផុស​ដោយ​រូប​ឆ្មា​នៅពីលើយ៉ាងស្អាត។

ជាការពិតណាស់ កាំបិតផ្ទះបាយមិនចាំបាច់ប្រើបច្ចេកវិទ្យាទំនើបទាំងអស់បែបនេះនោះទេ។ ផ្ទុយទៅវិញ ដោយផ្អែក​លើ​ការ​ច្នៃប្រឌិតបច្ចេកទេសជាច្រើន កាំបិតដែលមានគុណភាពខ្ពស់អាចផលិតបានក្នុងតម្លៃសមរម្យជាងមុន។

ប្រភេទនៃកាំបិត

លក្ខណៈពិសេសផ្សេងទៀតនៃកាំបិទជប៉ុនគឺវាមានរូបរាងខុសៗគ្នា ប្រើក្នុងគោលបំណងផ្សេងគ្នា។

ចូរយើងក្រឡេកមកមើលប្រភេទកាំបិតដែលពេញនិយមមួយចំនួន។

កាំបិត Deba

នេះជាប្រភេទកាំបិតដែលពេញនិយមបំផុតក្នុងចំណោមកាំបិតឯកទេស។ ផ្នែកចុងកាំបិតមានលក្ខណៈក្រាស់​ និង​ស្តើងផ្នែកខាងមុខកាំបិត។ កាំបិត Deba ប្រើសម្រាប់យកពោះវៀន ជម្រះ និងវះត្រី។ ផ្នែកខាងមុខកាំ​បិត​ស្តើង​ប្រើ​សម្រាប់​កាត់​ឆ្អឹង​ត្រី​វែង។

កាំបិត Yanagi

នេះជាប្រភេទកាំបិតសម្រាប់កាត់ sashimi ។ Yanagi ឬគេហៅថាកាំបិត sashimi ជាប្រភេទកាំបិតវែងហើយស្តើង ដែលជាទូទៅវែងជាង ១៨០ មីលីម៉ែត្រ។ កាំបិតប្រភេទនេះប្រើសម្រាប់ហាន់របស់ទន់ និងងាយបែកដូចជា sashimi ដោយ​របៀប​កាត់ “Hikikiri” ។ ដូច្នេះកម្រិតមុតស្រួចជា​កត្តាដែលសំខាន់បំផុត ហើយដាច់ខាតមិនត្រូវ​យក​កាំបិតនេះទៅហាន់របស់រឹងនោះទេ។ ដើម្បីធ្វើ sashimi គេតែងតែប្រើកាំបិតពីរប្រភេទគឺ កាំបិត Deba និង កាំបិត Yanagi ។

កាំបិត Nakiri

ដូចជាឈ្មោះរបស់វា កាំបិតប្រភេទនេះប្រើសម្រាប់ហាន់បន្លែ។

ក្រៅពីនេះ មានកាំបិតឯកទេសមួយចំនួនទៀត ដូចជាកាំបិត Takobiki ប្រើសម្រាប់កាត់ sashimi ត្រីមឹកធំ និង​កាំ​បិត Unagisaki ប្រើ​សម្រាប់​វះ​អន្ទង់។ យ៉ាងណាមិញ សម្រាប់គ្រួសារធម្មតាគ្រាន់តែប្រើកាំបិត ៣ ប្រភេទខាងលើគ្រប់​ហើយ។ ស្ទើរតែគ្មាននរណាធ្វើអន្ទង់នៅផ្ទះញឹកញាប់នោះទេ។

ណែនាំផលិតផលកាំបិតដែលគួរតែទិញ។

ប្រសិនបើជាខ្ញុំ ខ្ញុំនឹងទិញកាំបិត Deba មួយ។ នេះជាប្រភេទកាំបិតដែលមានមុខងារច្រើន និងអាចបត់បែនបាន អាច​ប្រើ​សម្រាប់​ហាន់​កាត់​គ្រឿង​ផ្សំ​ខុសៗ​គ្នា​ជាច្រើន។

បើសិនជាទិញថែមកាំបិតមួយទៀត ខ្ញុំនឹងរើសយក Yanagi ។ បើប្រើ Yanagiba ជួយឲ្យអ្នកមានអារម្មណ៍ស្រួលកាត់។

កាំបិតជប៉ុនបានឈានដល់កម្រិតគុណភាព និងបច្ចេកទេសកំពូល។

សូមប្រើកាំបិតជប៉ុនម្តងដើម្បីពិនិត្យមើលពីភាពខុសគ្នា។

Abe Kengo