សិទ្ធិពិសេសរបស់ Oiran នៅ​តំបន់​ភ្លើង​ក្រហម និង​ការ​ដាក់​ពិន័យ​ចំពោះ​បុរស​ដែល​ផិត​ក្បត់

មិនថាពេលវេលា ឬទីកន្លែងណាក៏ដោយ នៅកន្លែងដែលមានបុរស និងស្រ្តី តែងតែមានឧស្សាហកម្មកម្សាន្តសម្រាប់​មនុស្ស​ពេញ​វ័យ។ នៅ​ជប៉ុន​ពី​មុន តំបន់ភ្លើងក្រហមដែលត្រូវបាន​រដ្ឋាភិបាល​ទទួល​ស្គាល់គឺ Yoshiwara នៃទីក្រុង​​តូក្យូ។ ក្នុង​ទីក្រុង​មានតំបន់កម្សាន្តសម្រាប់មនុស្សពេញវ័យ ហើយ Yoshiwara ជាតំបន់ដ៏ធំមួយ។

Edo (ដែលសព្វថ្ងៃគឺតូក្យូ) ក្នុងសម័យសាមូរ៉ៃ មានមនុស្សជាច្រើនធ្វើចំណាកស្រុកពីតំបន់ផ្សេងមកធ្វើការនៅទីនេះ ហើយ​ខ្ញុំ​គិត​ថា អត្រាបុរសខ្ពស់ជាមូលហេតុ​ដែលធ្វើឲ្យតំបន់នេះមានការអភិវឌ្ឍ។ តើអ្នកដឹងទេថានៅ Yoshiwara បង្កប់​ច្បាប់​មួយ​គឺ “ហាមឃាត់អំពើផិតក្បត់” ដែរទេ?

កុំក្បត់នារីដែលធ្លាប់ស្គាល់

នេះជាច្បាប់ពិសេស ដែលមានតែស្រ្តីរកសុីផ្លូវភេទ និងស្រ្តីពេស្យាលំដាប់ខ្ពស់ ឬគេហៅថា Oiran ប៉ុណ្ណោះទើបមាន ហើយ​នៅ​ពេល​ដែល​អ្នក​សប្បាយនឹងស្រ្តីលំដាប់ខ្ពស់ម្នាក់ អ្នកមិនអាចស្គាល់ស្រ្តីផ្សេងទៀតក្នុងតំបន់ Yoshiwara ឡើយ។

អ្វីដែលចម្លែកគឺថានៅ Yoshiwara ជាកន្លែងដែលមនុស្សមកក្នុងគោលបំណងផិត​ក្បត់ បែរជាមានច្បាប់ហាមឃាត់​អំ​ពើ​ផិត​​ក្បត់​ ចំណុចនេះពិតជាពិបាកយល់ណាស់មែនទេ?

ដូច្នេះតើនឹងមានអ្វីកើតឡើងប្រសិនបើអ្នកផិតក្បត់?

ទុកឲ្យបុរសនោះមានអារម្មណ៍អាម៉ាស់ និងបាក់មុខ

ប្រហែលនេះគ្រាន់តែជាពាក្យចចាមអារ៉ាមដែលគេនិយាយតៗគ្នានៅតំបន់ Yoshiwara ប៉ុណ្ណោះ។ យ៉ាងណាមិញ រឿង​ពិត​ឬ​យ៉ាង​ណា​នៅតែជាអាថ៌កំបាំងនៅឡើយ។ 

គេនិយាយតៗគ្នាថា បុរសដែលផិតក្បត់អាចនឹងបង្ហាញខ្លួននៅចំពោះមុខមនុស្សគ្រប់គ្នាក្នុងស្ថានភាពដូចខាងក្រោម៖

・ត្រូវកាត់សក់បួង

・ត្រូវបង្ខំឲ្យស្លៀកសម្លៀកបំពាក់ស្រ្តី

ពិតជាពិបាកណាស់មែនទេ…

ថ្វីត្បិតតែ មិនច្បាស់ថារឿងបែបនេះធ្លាប់កើតឡើងដែរឬអត់ក៏ដោយ ប៉ុន្តែហាក់បីដូចជាការហាមឃាត់ចូលហាង និង​បង់​ប្រាក់​ពិន័យ​ធ្លាប់​​កើត​ឡើង​យ៉ាង​ហោច​ណាស់ប៉ុន្មានករណីដែរ។

ចំពោះប្រាក់ពិន័យមិនអាចកំណត់ច្បាស់លាស់នោះទេ ប៉ុន្តែដើម្បីទទួលបានសេវាកម្មរបស់ Oiran លំដាប់ខ្ពស់ អ្នកត្រូវ​ចំណាយ​ប្រាក់​យ៉ាង​ច្រើន ដូច្នេះប្រហែលជាប្រាក់ពិន័យមិនតិចឡើយ។

ការចំណាយ និងកម្សាន្តជាមួយ Oiran

នេះជាចំណុចដែលគួរឲ្យចាប់អារម្មណ៍នៅជប៉ុន ម្យ៉ាងអ្នកមិនអាចដោះស្រាយគ្រប់យ៉ាងដោយផ្អែកលើប្រាក់នោះទេ។ ខ្ញុំ​នឹង​ពន្យល់​ពី​ការ​ទទួល​យក​សេវាកម្មរបស់កំពូលស្រីស្អាតនៅជប៉ុន។

ជាដំបូង អ្នករើសយកម្នាក់ក្នុងចំណោមស្រីស្អាតដែលគេនិយាយតៗគ្នា។ នៅសម័យកាលដែលមិនមានរូបថត ពាក្យ​ចចាម​អារ៉ាម​ប្រហែលជាប្រភព​ព័ត៌មាន​គួរឲ្យទុកចិត្តបំផុត។ បន្ទាប់មក អ្នកគ្រាន់តែរង់ចាំ នោះ Oiran នឹងរៀបចំយ៉ាងដិតដល់ ហើយទទួលស្វាគមន៍អ្នកតាមរយៈក្បួនដង្ហែ។

Oiran Dochu គឺជាព្រឹត្តិការណ៍ដ៏ល្បីនៅ Yoshiwara កន្លែងដែលភ្ញៀវកិត្តិយសទទួលការស្វាគមន៍តាមរយៈក្បួនដង្ហែ​យ៉ាង​ឧឡារិក។ បន្ទាប់មក ពួកគេត្រូវបានអញ្ជើញឲ្យចូលបន្ទប់របស់ Oiran នាងនឹងបម្រើអាហារ និងស្រាដែល​ឆ្ងាញ់​បំផុត។

យ៉ាង​ណា​មិញ ភ្ញៀវទាំងនេះមិនអាចធ្វើអ្វីក្រៅពីទទួលយកពិធីជប់លៀងនោះទេ។ បើតាមតម្លៃសព្វថ្ងៃនេះ ពិធី​ជប់​លៀង​ជា​មួយ Oiran បែបនេះមានតម្លៃចន្លោះពី ៣ ទៅ ៥ លានយ៉េន។

ហើយក្រោយមក គ្រប់យ៉ាងនឹងបញ្ចប់ត្រឹមនេះ។

សូម្បីតែប៉ះ Oiran ក៏មិនត្រូវបានអនុញ្ញាតដែរ។ ម្យ៉ាងវិញទៀត មានព័ត៌មានមួយចំនួនបានឲ្យដឹងថា Oiran អាច​បដិសេធ​អតិថិជន។ ដូច្នេះអ្វីដែលសំខាន់គឺអំណាចស្ថិតលើ Oiran ។ នៅជប៉ុនមានច្បាប់តឹងរ៉ឹងខាងផ្នែកឧស្សាហកម្ម​កម្សាន្ត​សម្រាប់​មនុស្សពេញវ័យ ដូច្នេះតើ​នៅ​ប្រទេស​ផ្សេង​ទៀត​មាន​ច្បាប់​បែប​នេះ​ដែរ​ទេ?

បន្ទាប់ពីធ្វើបែបនេះម្តងហើយម្តងទៀត គេនិយាយថា ក្រោយលើកទី ៣ ទើបអ្នកមានឳកាសចូលដល់គ្រែរបស់ Oiran ។ មូលហេតុ​ដែលស្មុគស្មាញបែបនេះដោយសារគេ​និយាយ​ថា មាន​ប្រភព​មក​ពី​ការ​យកតម្រាប់តាមពិធី​មង្គល​ការ​នៃ​វណ្ណៈ​អភិជន​​បុរាណ។

សាកស្រមើល អាចនៅជាមួយ Oiran អ្នកត្រូវចំណាយចាប់ពី ៩ ដល់ ១៥ លានយ៉េន។ ជាមួយនឹងចំនួនទឹកប្រាក់ច្រើន​ដូច​នេះ តើ​​អ្នក​មានអារម្មណ៍ញញើត​ពេលគិតដល់ប្រាក់ពិន័យដែរទេ?

Abe Kengo