អាកាសយានដ្ឋានផ្តើមគំនិតដាក់អាហារ​បញ្ជូន​ជា​មួយ​នឹង​អីវ៉ាន់​ទាក់​​ទាញ​​ចំណាប់​​អារម្មណ៍​អ្នក​ដំណើរ

អាកាសយានដ្ឋានអន្តរជាតិ Chubu Centrair ស្ថិតនៅខេត្ត Aichi ប្រទេសជប៉ុន។ គឺជាច្រកទៅកាន់តំបន់ជុំវិញ Nagoya និង​តែងតែរៀបចំព្រឹត្តិការណ៍គួរឲ្យចាប់អារម្មណ៍ជាច្រើន។

ជួនកាល ក្នុងអំឡុងពេលរង់ចាំខ្សែក្រវ៉ាត់បញ្ជូនអីវ៉ាន់ អ្នកប្រាកដជាភ្ញាក់ផ្អើលចំពោះរបស់ដែលគួរឲ្យចាប់អារម្មណ៍បញ្ជូន​ចេញ​ជា​មួយ​អីវ៉ាន់ ក្លាយជាបទពិសោធន៍ដែលមិនអាចបំភ្លេចបាន។

ចំណុចដែលគួរឲ្យចាប់អារម្មណ៍គឺរូបភាពខាងក្រោម។

អូ តើនោះជាឈុតអាហារឬ? ខ្សែក្រវ៉ាត់បញ្ជូនអាហារខុសៗគ្នា ស្រដៀងភោជនីយដ្ឋានស៊ូសុី។ ប្រហែលជាអ្នកមិនអាច​ងាក​មក​មើលឡើយ មែនទេ?

ជាការពិតណាស់ ទាំងនេះមិនមែនជាអាហារពិតនោះទេ ប៉ុន្តែជាគំរូអាហារក្លែងក្លាយ។ ជប៉ុនជាប្រទេសដែលអភិវឌ្ឍ​ផ្នែក​គំរូ​អាហារ​ក្លែង​ក្លាយ សម្រាប់ដាក់តាំងក្នុងហាងលក់អាហារ និងភោជនីយដ្ឋាន ប៉ុន្តែគ្មាននរណាម្នាក់នឹក​​ស្មាន​​ថា គំរូ​អាហារ​ទាំង​នេះ​ត្រូវបានដាក់លើខ្សែក្រវ៉ាត់បញ្ជូនជាមួយអីវ៉ាន់នោះទេ។

Nagoya ជាតំបន់ដែលមានវប្បធម៌ម្ហូបអាហារពិសេសប្លែក ដូច្នេះកន្លែងនេះគេតែងតែហៅថា “Nagoya Meshi” ។ មុខម្ហូបពិសេសនៅ Nagoya មានដូចជាបង្គាបំពង (Ebi-Furai) សាច់ជ្រូកបំពងស្រោបទឹកជ្រលក់ miso (Miso-Katsu) មី ramen តៃវ៉ាន់ និងស្លាបមាន់បំពងហឹរ Nagoya (Tebasaki) ។

ក្រៅពីនេះ ថែមទាំងមានស៊ូសុីជាមុខម្ហូបដែល​គ្រប់​គ្នា​សុទ្ធតែចង់ភ្លក់ពេលទៅលេងជប៉ុន។ រំលឹក​ដល់​ចំណុច​នេះ អ្នក​​រាល់​​គ្នា​​ច្បាស់​​ជា​​ឃ្លាន ហើយ​ចង់ភ្លក់មុខម្ហូបទាំងនេះ។

គំនិតខាងលើមានបំណងចង់ឲ្យអ្នកទាំងអស់គ្នាស្គាល់ និងទទួលយកបទពិសោធន៍វប្បធម៌ម្ហូបអាហាររបស់ Nagoya ។ ផ្តើមដោយភាពនឿយហត់បន្ទាប់ពីចុះពីយន្តហោះ អង្គុយរង់ចាំយកអីវ៉ាន់ជាអ្វីដែលគ្រប់គ្នាមិនចូលចិត្ត។

យ៉ាងណាមិញ ប្រសិនបើមុខម្ហូបដែលទាក់ទាញភ្នែកទាំងនេះបង្វិលជុំនៅពីមុខអ្នក ប្រហែលជាពេលវេលារង់ចាំនឹង​លែង​ធុញ​ទ្រាន់។ អ្នក​ដែលគិតឃើញគំនិតនេះពិត​ជា​មាន​ទេពកោសល្យណាស់។

ខ្សែក្រវ៉ាត់បញ្ជូនអាហារដ៏ចម្លែកនេះ មាននៅត្រង់ខ្សែក្រវ៉ាត់បញ្ជូនអីវ៉ាន់ក្នុងស្រុកលេខ ២ និងលេខ ៣ ស្ថិតនៅជាន់​ទី ២ នៃស្ថានីយទីលេខ ១ អាកាស​យាន​ដ្ឋាន​អន្តរ​ជាតិ Chubu Centrair ។

គំនិតនេះប្រាកដជាទាក់ទាញជនបរទេស ដូច្នេះហើយ ខ្ញុំសង្ឃឹម​ថា អាចដំឡើង​នៅ​ស្ថានីយ​អន្តរជាតិ​ផងដែរ។ គំរូអាហារក្លែងក្លាយដែលរត់នៅលើខ្សែក្រវ៉ាត់បញ្ជូនបានទាក់ទាញចំណាប់អារម្មណ៍របស់អ្នកទាំងអស់គ្នានៅលើបណ្តាញ​សង្គម។

ខ្ញុំ​ប្រាកដ​ថា ខ្លួនមិនមែនជាមនុស្ស​តែម្នាក់ដែល​មាន​អារម្មណ៍ចង់​ទៅមើល​នៅ​អាកាស​យាន​ដ្ឋាន​នោះ​ទេ។

Abe Kengo