ក្រុមហ៊ុន Nintendo និងសេវាកម្មបម្រើអតិថិជនដែលល្អបំផុត

ជប៉ុនជាប្រទេសដែលកើតមានគ្រោះមហន្តរាយជាច្រើនដែលមិនអាចគ្រប់គ្រងបានដោយកម្លាំងមនុស្ស ដូចជា​រញ្ជួយ​ដី ខ្យល់ព្យុះ និង​រលក​យក្ស​ស៊ូណាមិ។ ប្រជាជន​ជប៉ុន​ទទួល​រងគ្រោះ​មហន្តរាយ​ទាំងនេះជា​យូរ​មក​ហើយ ដូច្នេះ​ហើយ ពួក​គេបានបង្កើតប្រព័ន្ធសហប្រតិបត្តិការយ៉ាងតឹងរុឹង។

ប្រព័ន្ធសហប្រតិបត្តិការនេះមិនត្រឹម​តែអនុវត្តសម្រាប់បុគ្គលប៉ុណ្ណោះទេ ថែមទាំងអនុវត្តសម្រាប់អាជីវកម្មផង​ដែរ។ ឧទាហរណ៍​​មួយ​នៃ​ប្រព័ន្ធ​នេះ​គឺ​ក្រុមហ៊ុន Nintendo ដែលជាក្រុមហ៊ុនហ្គេមដ៏ល្បីរបស់ជប៉ុន។

នៅថ្ងៃនេះ យើងនឹងលើកយករឿងចំនួនពីរនិយាយពីការផ្តល់សេវាកម្មអតិថិជនដ៏ល្អបំផុតរបស់ Nintendo ។

ម៉ាស៊ីន GAMEBOY សម្រាប់ជូនស្រ្តីចំណាស់ម្នាក់

តើអ្នកទាំងអស់គ្នាធ្លាប់ឮរឿងនេះដែរទេ?

រឿងនិយាយពីម៉ាសុីនលេងហ្គេមជំនាន់ដំបូងរបស់ Nintendo គឺ Game Boy ។ ម៉ាសុីនលេងហ្គេមដែលរំលឹកដល់វ័យនៅរៀនវិទ្យាល័យរបស់ខ្ញុំ ប៉ុន្តែរឿងដែលខ្ញុំនឹងរៀបរាប់និយាយពីបទពិសោធន៍​របស់​ស្ត្រី​ម្នាក់។

ម្តាយអាយុ ៩៥ ឆ្នាំរបស់អ្នកស្រីចូលចិត្តហ្គេម Tetris ដែលមានក្នុងម៉ាសុីន GAME BOY ។ លោកយាយនៅតែលេង​​ហ្គេម Tetris នេះ នៅពេលដែលម៉ាសុីហ្គេមខូច លោកយាយបានទិញម៉ាសុីនថ្មី ហើយម៉ាសុីនលេងហ្គេមទីបីរបស់​​លោក​​យាយក៏បានខូច។ យ៉ាងណាមិញ ម៉ាសុីន Game Boy បានបញ្ឈប់ការផលិត ដូច្នេះលោកយាយបានបោះ​បង់​​គំនិត​​ទិញ ឬ​ជួស​ជុល។

តាមការណែនាំរបស់កូនប្រុស អ្នកស្រ្តីបានផ្ញើសំបុត្រសរសេរដៃទៅដល់ Nintendo ហើយនិយាយប្រាប់ពួកគេថា “ខ្ញុំចង់ឲ្យម្តាយរបស់ខ្លួនអាចលេង GAME BOY នេះម្តងទៀត” ។

បន្ទាប់មក អ្នកស្រីទទួលបានសំបុត្រឆ្លើយតបពីក្រុមហ៊ុន Nintendo ។ ពួកគេបានបញ្ជាក់ថា “ម៉ាស៊ីន GAME BOY នេះមិនអាចជួសជុលបានទេ ព្រោះខ្វះគ្រឿងបន្លាស់ដែលចាំបាច់” ។

យ៉ាងណាមិញ អ្វីដែលគួរឲ្យភ្ញាក់ផ្អើលគឺថា ក្នុងសំបុត្រមានភ្ជាប់មកជាមួយម៉ាសុីន Game Boy ជំនាន់ដំបូងថ្មីមួយគ្រឿង។ បើតាមក្រុមហ៊ុន Nintendo ក្នុងឃ្លាំងរបស់ពួកគេនៅមានម៉ាសុីន Game Boy ថ្មីមួយគ្រឿង ដូច្នេះពួកគេបានសម្រេចចិត្តផ្ញើជូនលោកយាយ។

ចាប់ពីពេលនោះមក ម្តាយរបស់អ្នកស្រ្តីលេងហ្គេម Tetris បាន ៤ ឆ្នាំយ៉ាងសប្បាយ ហើយទទួលមរណភាពនៅអាយុ ៩៩ ឆ្នាំ។ លោកយាយអាចលេងហ្គេមរហូតដល់ថ្ងៃចុងក្រោយនៃជីវិត គាត់ប្រាកដជាសប្បាយចិត្តណាស់។

គ្រប់យ៉ាងនឹងកាន់តែប្រសើរឡើងតាមបែបរបស់វា

ជាទូទៅ ម៉ាសុីនលេងហ្គេមរបស់ Nintendo មានលក់ដោយម៉ូដែលមានកំណត់។

ដូច្នេះហើយ រឿងបន្ទាប់និយាយពីអតិថិជនម្នាក់ ដែលជាម្ចាស់ម៉ាសុីនលេងហ្គេមមានកំណត់ និងត្រូវបានបំផុសគំនិតដោយហ្គេម “Animal Crossing” ។ អតិថិជនរូបនេះយកចិត្តទុកដាក់យ៉ាងខ្លាំងចំពោះម៉ាសុីនហ្គេម ប៉ុន្តែកូន​ស្រ្តី​របស់​គាត់​បានធ្វើឲ្យខូច។

ទោះបីជាបានត្រៀមចិត្តដែលថា ជួសជុលហើយក៏មិនអាចត្រលប់ដូចការរចនាដើមវិញក៏ដោយ ប៉ុន្តែអ្វីដែលគួរឲ្យភ្ញាក់ផ្អើលនោះគឺ អតិថិជនរូបនេះទទួលបានម៉ាសុីនថ្មីដែលមានការរចនាស្រដៀងគ្នា។

អតិថិជន​ម្នាក់​នេះបានយកទៅជួសជុលមុន​ពេល​បញ្ចប់​សេវាកម្ម​ជួសជុល​សម្រាប់​ម៉ូដែល​ចាស់​នេះ។ គ្រឿងបន្លាស់សម្រាប់​ម៉ូដែល​នេះមិនច្រើននោះទេ ដូច្នេះខាងផ្នែកជួសជុលមិនអាចប្តូរគ្រឿងបន្លាស់​ដែល​​ខូច​​ទាំង​​ស្រុង​ឡើយ ប៉ុន្តែ​​​ប្រើ​​​គ្រឿង​​​បន្លាស់​ដែលអាចប្រើបាន ហើយជូតសម្អាតឲ្យស្អាត។

ក្រៅពីនេះ ក្មេងៗតែងតែចូលចិត្តបិទស្ទីគ័រនៅលើម៉ាសុីនលេងហ្គេមរបស់ខ្លួន។ ដូច្នេះហើយ សម្រាប់​ករណី​នេះ ពួក​គេ​​បាន​​ខំប្រឹង​អស់​ពី​​សមត្ថភាព​ដើម្បី​ជួសជុល​ម៉ាសុីនដោយមិនធ្វើឲ្យបាត់ស្ទីគ័របិទដ៏​មានតម្លៃ​ទាំងនោះ។

ពួកគេបាននិយាយថា “ស្ទីគ័រនីមួយៗរំលឹកដល់ការចងចាំពិសេសនៅពេលដែលអ្នកបិទវា” ។

ថ្វីត្បិតតែ ការងារនេះចំណាយកម្លាំងខាងផ្នែកសេវាកម្មច្រើន ប៉ុន្តែស្មារតីឲ្យតម្លៃអតិថិជន និងអនុស្សាវរីយ៍របស់អតិថិជន​ពិត​ជា​ល្អណាស់​មែនទេ? 

របៀបចាត់ចែងដ៏ល្អបែបនេះល្បី​នៅ​លើ​ពិភព​លោក ហើយ​បាន​ធ្វើ​ឲ្យ Nintendo មាន​កេរ្តិ៍​ឈ្មោះ​ល្បី​ជា​សកល។ ខ្ញុំ​គិត​​ថា យើង​​គួរ​​តែយកតម្រាប់តាមរឿងដែលល្អៗបែបនេះ។

Abe Kengo