អ្នកដឹងទេថាឈុត Kimono និងស្បែក​ជើងក​វែង​គឺ​ជា​ការ​រួម​បញ្ចូល​រវាង​វប្បធម៌​ជប៉ុន និង​ប្រទេស​លោក​ខាង​លិច

នៅជប៉ុននិទាឃរដូវជារដូវកាលបញ្ចប់ការសិក្សា អំឡុងពេលនោះ សិស្សានុសិស្សស្លៀកសំលៀកបំពាក់ប្រពៃណីជប៉ុន​ហៅ​ថា “Hakama” ដោយ​នាំ​មក​នូវ​ភាព​រីករាយ និងសង្ឃឹមនាពេលអនាគត។

តើ Hakama ខុសនឹង Kimono ដូចម្តេច? ជាទូទៅ Hakama ស្រដៀង Kimono ប៉ុន្តែ Hakama គឺ​ជា​ផ្នែក​ខាង​ក្រោម​​ចង្កេះ អាច​​និយាយ​​បាន​​ថា Hakama គឺជាខោវែងខាងក្រៅ Kimono ។

អ្នកអាចក្រឡេកមើលរូបភាព Hakama ខាងក្រោមនេះ។

សូមពិនិត្យមើលត្រង់កន្លែងជើង នាងកំពុងពាក់ស្បែកជើងកវែង។ ស្បែកជើងកវែងទាំងនេះមិនមានក្នុងវប្បធម៌​​ជប៉ុន​​នោះ​​ទេ ប៉ុន្តែការរួមបញ្ចូលនេះពិតជាពិសេស និងល្អខ្លាំងណាស់។

ការរួមបញ្ចូលរវាង Hakama និងស្បែកជើងកវែងបានក្លាយជាការពេញនិយម ដែលគេចាត់ទុកដូចជារឿងធម្មតា។ តាមពិតទៅ ការរួមបញ្ចូលរវាងវប្បធម៌ប្រទេសលោកខាងលិច និងវប្បធម៌ជប៉ុនបុរាណមានតាំងពីយូរ​យារ​ណាស់​មក​ហើយ។ នៅឆ្នាំ ១៨៧០ ជាពេលដែលសាមូរ៉ៃបញ្ចប់ការគ្រប់គ្រង ហើយវប្បធម៌ថ្មីនៃប្រទេសលោកខាង​លិច​ចាប់​ផ្តើម​ចូល​ជប៉ុន។

វប្បធម៌អង្គុយលើកន្ទេល tatami បានប្តូរទៅជាអង្គុយលើកៅអី។ នៅសម័យនោះឯកសណ្ឋានរបស់សិស្សស្រីគឺឈុត Hakama ។ ក្នុង​សម័យ​កាល​ដែល​មនុស្ស​ស្រី​ទៅ​រៀន​ជារឿងដែលកម្រ មនុស្សស្រីដែលមានឱកាសបានចូលរៀនជាវណ្ណៈ​អភិជន មាន​ឋានៈ​សង្គមខ្ពង់ខ្ពស់។ ចំណុចនេះជា​ការ​បំផុស​គំនិត​ដ៏​អស្ចារ្យ​សម្រាប់​ស្ត្រី​ជា​ច្រើន​ផ្សេង​ទៀត។

ស្ត្រីទាំងនោះបានក្លាយជាអ្នកផ្តួចផ្តើមម៉ូតសម្លៀកបំពាក់នាពេលសព្វថ្ងៃ ដោយពួកគេបានបង្កើតគំនិតរួមបញ្ចូលស្បែកជើងកវែង និង​ឯក​សណ្ឋាន​ឲ្យ​មើល​ទៅ​កាន់​តែ​គួរ​ឲ្យ​ស្រលាញ់។

ក្រោយមក នៅចុងទសវត្សរ៍ឆ្នាំ ១៩៧០ សៀវភៅរឿងគំនូរជីវចល “Haikara-san ga Toru” បានក្លាយជាការពេញនិយម។ Haikara គឺជាពាក្យបុរាណដែល​មាន​ន័យ​ថា អ្នកនិយមម៉ូត​យក​តម្រាប់​តាម​ស្ទីល​ប្រទេស​លោក​ខាង​លិច។ តួអង្គ​ឯក​ក្នុង​សៀវភៅរឿងចង់រួមបញ្ចូលរវាងស្បែកជើងកវែង និងសម្លៀកបំពាក់ Hakama របស់ខ្លួន។

នៅពេលដែលសម័យកាលផ្លាស់ប្តូរ មនុស្សស្រីទៅសាលាបានក្លាយទៅជារឿងធម្មតា។ គ្រប់គ្នាសុទ្ធតែចង់ស្អាតនៅថ្ងៃ​បញ្ចប់​ការសិក្សា ដូច្នេះទំនោរស្លៀកសម្លៀកបំពាក់ Hakama និងស្បែកជើងកវែងបានក្លាយជាការពេញនិយម ហើយបន្តរហូតមកដល់សព្វថ្ងៃនេះ។

កាលពីមុន Hakama ជាសម្លៀកបំពាក់សម្រាប់បុរស។ បុគ្គលដែលរួមបញ្ចូល Hakama និងស្បែកជើងកវែងគឺលោក Sakamoto Ryoma ។

លោកកំពុងពាក់ស្បែកជើងកវែង។
លោក Sakamoto Ryoma ជាបុគ្គលសំខាន់ម្នាក់ដែលសកម្មនាចុងសម័យសាមូរ៉ៃ ហើយបើកសម័យកាលថ្មីសម្រាប់ជប៉ុន។ គាត់ត្រូវគេធ្វើឃាត ហើយទទួលមរណភាព ប៉ុន្តែបើក្រឡេកមើលវិញ ប្រហែលជាលោកបានពាក់ស្បែកជើងកវែងតាំងពីដើមទសវត្សរ៍ឆ្នាំ ១៨៦០ មកម្ល៉េះ។ មែនហើយ លោក Sakamoto Ryoma ជាបុគ្គលដំបូងដែល​គេ​ចាត់​ទុក​ជា Haikara ឬបុគ្គលដែលដើរតាមសម័យទំនើប។

ជាទូទៅ នៅពេលដែលស្លៀក Kimono គេតែងតែពាក់ស្បែកជើងផ្ទាត់ (zori) ។ ទោះជាយ៉ាងណា បើសិនជាអ្នកមិនទម្លាប់​ពាក់ ស្បែកជើងផ្ទាត់អាចធ្វើឲ្យជើងរបស់អ្នកឈឺ។ ដូច្នេះហើយ សម្លៀកបំពាក់ Hakama និងស្បែកជើងកវែង​ជា​ជម្រើស​ដ៏​ល្អ​ឥត​ខ្ចោះ​សម្រាប់​ដើរ​លេង​តាម​ដង​ផ្លូវ ជា​​អនុស្សាវរីយ៍​​នៅ​​ពេល​ដែលអ្នកទៅលេងប្រទេសជប៉ុន។

តោះទៅលេងជប៉ុន និងក្លាយជាបុគ្គល Haikara មួយរូប។

ABE KENGO