ស្រា​ទំពាំង​បាយ​ជូរ​ជប៉ុន និង​សង្គ្រាម​បានវិវត្តទៅជាយ៉ាងណា

បើនិយាយពីស្រានៅជប៉ុន យើងតែងតែគិតដល់ស្រា sake និង shochu ប៉ុន្តែតាមពិតទៅ ជប៉ុនក៏ផលិត wine បរិមាណច្រើនផងដែរ។ wine ជប៉ុនបានចាប់ផ្តើមទាក់ទាញចំណាប់អារម្មណ៍អ្នកដែលចូលចិត្តស្រា​នៅជុំវិញពិភព​លោក។

នៅពេលដែលក្រឡេកទៅមើលតំបន់ផលិតស្រាល្បីលើពិភពលោក លក្ខណៈពិសេសនៃតំបន់ទាំងនេះគឺបរិមាណភ្លៀង​តិច និង​ពន្លឺ​ព្រះ​អាទិត្យ​មាន​រយៈ​ពេល​យូរ។

ដើមឡើយ អាកាសធាតុ​នៅជប៉ុនត្រូវគេចាត់ទុកថាមិនស្រមនឹងលក្ខខណ្ឌ​ទាំងនេះ។ ប៉ុន្តែតាមរយៈការកែលម្អពូជរុក្ខ​ជាតិ និងបច្ចេកទេសដាំដុះសមស្របទៅនឹងលក្ខណៈដីនៅជប៉ុន ស្រាដែលផលិតនៅជប៉ុនទទួលបានការវាយតម្លៃ​ខ្ពស់។

អ្នកដឹងទេថា ប្រវត្តិនៃការអភិវឌ្ឍស្រានេះតាមពិតទៅមានភាពទាក់ទងនឹងសង្គ្រាម។ ចូរយើងស្វែងយល់តាមរយៈអត្ថបទ​នេះ។

បង្កើនការផលិតស្រាដើម្បីអភិវឌ្ឍអាវុធ

នៅពេលដែលផលិតស្រាទំពាំងបាយជូរ គ្រាប់ពណ៌សដែលលេចឡើងក្នុងធុងគេហៅថា អាសុីត tartaric ។ ពួកវាត្រូវបានផលិតបង្កើតជាអំបិលអាស៊ីត tartaric ឬគេហៅថា អំបិល Rochelle ជាសារធាតុដែលមិនអាចខ្វះបានក្នុងសង្គ្រាម។

ខ្ញុំមិននិយាយលម្អិតនោះទេ ប៉ុន្តែហាក់បីដូចជាអំបិល Rochelle ត្រូវបានប្រើក្នុងការផលិតឧបករណ៍ស្តាប់ក្រោមទឹក និង​រ៉ាដា ប៉ុន្តែ​ដោយ​សារ​នៅ​ជប៉ុន​មិនផលិតស្រាទំពាំងបាយជូរ ដូច្នេះបានជាខ្វះអាស៊ីត tartaric ។

មូលហេតុ​ដោយសារអាកាសធាតុនៅជប៉ុនមិនអំណោយផលសម្រាប់ការផលិត wine ។ ទន្ទឹមនឹងនេះ ការផលិតស្រាទំពាំង​បាយ​ជូរ​នៅ​ជប៉ុន​នា​ពេល​នោះ​ក៏​មានកម្រិតផងដែរ។

ដូច្នេះហើយ កងទ័ពជើងទឹកស្រាប់តែអនុវត្តយុទ្ធសាស្ត្រ​ជម្រុញការផលិតស្រាទំពាំងបាយជូរ។

ពួកគេបានប្រមូលផ្តុំអ្នកផលិតស្រាទំពាំងបាយជូមកពីទូទាំងប្រទេសជប៉ុននៅរោងចក្រស្របៀរ Sadoya ក្នុងខេត្ត Yamanashi ជា​កន្លែងតែមួយគត់ដែលអាចផលិតអាស៊ីត tartaric និងបង្រៀនពួកគេពីរបៀបចម្រាញ់អាស៊ីត tartaric ។

នៅឆ្នាំ ១៩៤៤ ក្រសួងហិរញ្ញវត្ថុដែលជាភ្នាក់ងារត្រួតពិនិត្យបទប្បញ្ញត្តិភេសជ្ជៈមានជាតិអាល់កុល បានសម្រេចចិត្តបង្កើនការផលិតអាស៊ីត tartaric ដើម្បីបំពេញតាមតម្រូវការរបស់កងទ័ពជើងទឹកជប៉ុន។

ក្រោយមកបទប្បញ្ញត្តិស្តីពីការផលិតស្រាត្រូវបានបន្ធូរបន្ថយ ហើយការផលិតក៏កើនឡើង។

នៅពេលនោះ ប្រភពផ្គត់ផ្គង់ស្ករមានច្រើន ប៉ុន្តែដោយសារស្ករជាវត្ថុធាតុដើមសំខាន់សម្រាប់ផលិតស្រាទំពាំងបាយ​ជួរ ដូច្នេះ​ទទួល​បាន​អាទិភាពពិសេសក្នុងការបែងចែក និងចែកចាយទៅតាមកម្រិតកំណត់។

ការប្រើប្រាស់អំបិល Rochelle បន្ទាប់ពីសង្គ្រាមបញ្ចប់

ទោះបីជាសង្គ្រាមបានបញ្ចប់នៅឆ្នាំ ១៩៤៥ ហើយលែងមានតម្រូវផលិតអាវុធពីអាស៊ីត tartaric ប៉ុន្តែអំបិល Rochelle នៅ​តែ​បន្ត​ប្រើ​ប្រាស់​ក្នុង​វិស័យ​ផ្សេងៗ​ជាច្រើន។

ឧទាហរណ៍អំបិល Rochelle ត្រូវបានប្រើសម្រាប់ផលិតកញ្ចក់ និងផ្តិតរូបថត។ ក្រៅពីនេះ វាក៏ត្រូវបានប្រើជាគ្រឿងផ្សំអាហារសម្រាប់រក្សាពណ៌ និងរសជាតិ​អាហារ។

ម្យ៉ាងវិញទៀត នៅសម័យសព្វថ្ងៃ អំបិល Rochelle ក៏ត្រូវបានគេប្រើជាសារធាតុធ្វើឲ្យត្រជាក់ដែលមិនប៉ះពាល់ដល់បរិស្ថាន​ក្នុង​ប្រព័ន្ធ​ត្រជាក់ និង​ក្លាសេ។ ទន្ទឹមនឹងនេះ ត្រូវបានប្រើច្រើនខាងបច្ចេកវិទ្យា nano ផងដែរ។

ដូច្នេះការផលិតស្រាទំពាំងបាយជូរក៏មានសារៈសំខាន់ណាស់មិនថាសម័យសន្តិភាពក៏ដោយ។ ពិតជាគួរឲ្យភ្ញាក់ផ្អើលដែល​ដឹង​ថា ស្រាទំពាំងបាយជូរមិនត្រឹម​តែឆ្ងាញ់ប៉ុណ្ណោះទេ ថែមទាំងមានតួនាទីសំខាន់ៗជាច្រើនផងដែរ។

ស្រាទំពាំងបាយជូរជប៉ុន

ស្រាទំពាំងបាយជូរជប៉ុនទទួលបានការវាយតម្លៃខ្ពស់លើពិភពលោក តាមរយៈការឈ្នះពានរង្វាន់ផ្លាទីនដំបូងគេនៅអាស៊ីក្នុងការប្រកួតប្រជែងស្រាទំពាំងបាយជូរធំបំផុតរបស់ពិភពលោក ដែលរៀបចំដោយទស្សនាវដ្តីស្រាអង់គ្លេស។

ជាទូទៅជនជាតិជប៉ុនមិនសូវឲ្យតម្លៃស្រាទំពាំងបាយជូរជប៉ុននោះទេ ព្រោះពួកគេគិតថា ស្រាទំពាំងបាយជូរ​បារាំង និងអុីតាលីល្បីជាង។ យ៉ាង​ណា​មិញ អាចនិយាយបានថា មានតែប្រជាជនជប៉ុនទេដែល​មើល​ស្រាល​ស្រាទំពាំង​បាយ​​ជូរ​​ជប៉ុន។

ទោះបីជាដីមិន​ស័ក្តិសម​សម្រាប់​ការ​ដាំ​ទំពាំង​បាយ​ជូរ ប៉ុន្តែអ្នកផលិតស្រាទំពាំងបាយជូរជប៉ុននៅបន្តច្នៃប្រឌិតមិនឈប់ដើម្បី​បង្កើត​ផលិតផល​ដែលល្អបំផុត។ នេះជាចំណុចខ្លាំងនៃឧស្សាហកម្មផលិតរបស់ជប៉ុន ដែលត្រូវបានបង្ហាញ​តាម​រយៈ​ការផលិតស្រាទំពាំងបាយជូរ។

ស្រា​ដែល​ផលិតនៅជប៉ុនប្រើ​ផ្លែ​ទំពាំងបាយជូរ​ក្នុង​ស្រុក ១០០% ដោយគេដាក់ស្លាក​ថា “ស្រាទំពាំងបាយជូរជប៉ុន” ។

ប្រវត្តិស្រាទំពាំងបាយជូរក៏ដូចជាលទ្ធផលនៃការសាកល្បង និងកំហុសរបស់អ្នកផលិតត្រូវបានបង្ហាញតាមរយៈស្រាទំពាំង​បាយ​ជូរ​ជប៉ុន។

ចូរយើងទាំងអស់គ្នាផឹកស្រាទំពាំងបាយជូរជប៉ុនយឺតៗ ហើយរីករាយនឹងទេសភាពស្អាតៗនៅជប៉ុន ពិតជាល្អណាស់​មែន​ទេ?

Abe Kengo