គួរឲ្យភ្ញាក់ផ្អើលផលិតផល “Made in Japan” ផ្តោតសំខាន់លើគុណភាពមានតាំងពីបុរាណកាលមកម្ល៉េះ

ថ្ងៃព្រហស្បតិ៍ 07/12/2023 | 17:04 ល្ងាច

តាំងពីបុរាណកាលមក ជប៉ុនតែងតែផ្តោតសំខាន់លើគុណភាព និងភាពបុិនប្រសប់ក្នុងការបង្កើតផលិតផល។ Monozukuri គឺជាលក្ខណៈពិសេសនៃស្មារតីផលិតកម្មរបស់ជប៉ុន។

នៅថ្ងៃនេះ ខ្ញុំនឹងលើកយករឿងសាកសពនាងមច្ឆា។ ក្នុងអត្តបទមានរូបភាពដែលគួរឲ្យខ្លាចមួយចំនួន ដូច្នេះចូរពិចារណាមុននឹងមើលបន្ត។

សាកសពនាងមច្ឆាត្រូវគេចាត់ទុកថាយកមកពីកោះ Fiji នៅប៉ាស៊ីហ្វិកខាងត្បូង ដែលធ្លាប់ជារឿងល្បីនៅសហរដ្ឋអាមេរិក។

ចំនួនមនុស្សសម្រុកទៅមើលសាកសពនាងមច្ឆាលើសការរំពឹងទុក។ បើតាមព័ត៌មានពីម្ចាស់ ពួកគេរកបានប្រាក់យ៉ាងច្រើនពីការលក់សំបុត្រទេសចរណ៍។

ដូចដែលអ្នកអាចស្រមៃមើល ផ្នែករាងកាយខាងលើរបស់សាកសពមើលទៅដូចមនុស្ស ចំណែករាងកាយផ្នែកខាងក្រោមមើលទៅដូចជាត្រី។ គ្រប់គ្នាមានការភ្ញាក់ផ្អើលនៅពេលដែលឃើញសាកសពនាងមច្ឆាហាក់ដូចជាមានការឈឺចាប់។

រឿងព្រេងនិទាននាងមច្ឆាមានច្រើនសតវត្សមកហើយ ហើយមនុស្សជាច្រើនជឿថា នាងមច្ឆាគឺមានពិត។ សាកសពនាងមច្ឆាដូចជាភស្តុតាងដែលបង្ហាញថា នាងមច្ឆាមានពិត ហើយរឿងនេះបានទាក់ទាញការចាប់អារម្មណ៍ពីមនុស្សជាច្រើន។

ចូរយើងក្រឡេកមើលរូបភាពសាកសពនាងមច្ឆាទាំងអស់គ្នា។ កុំភ្លេចត្រៀមចិត្តព្រោះវាអាចនឹងធ្វើឲ្យអ្នកខ្លាច។

នេះហើយជាសាកសពរបស់នាងមច្ឆា។

ថ្វីត្បិតតែ សាកសពរបស់នាងមច្ឆាត្រូវបានរក្សាទុកយ៉ាងប្រុងប្រយ័ត្ន ប៉ុន្តែនៅទីបំផុត ការស៊ើបអង្កេតបែបវិទ្យាសាស្ត្រមកលើភាវៈអាថ៌កំបាំងត្រូវបានធ្វើឡើង។

ចូរក្រឡេកមើលរូបភាពកាត់តលើអេក្រង់កុំព្យូទ័រ (CT scan) ។

តើអ្នកកត់សម្គាល់ឃើញអ្វីលើលទ្ធផលរូបភាពនេះដែរទេ?

លទ្ធផលដំបូងបានបង្ហាញចំណុចដែលគួរឲ្យចាប់អារម្មណ៍មួយ។ អ្នកវិទ្យាសាស្ត្របានរកឃើញវត្ថុមួយដែលមើលទៅដូចជាខ្សែលោហធាតុត្រង់ផ្នែកដៃរបស់សាកសព។ ចំណុចនេះបង្ហាញថា សាកសពមិនមែនជាភាវៈមានពិតនោះទេ។ ពិតជាស្តាយខ្លាំងណាស់។

យោងតាមរបាយការណ៍ សាកសពដូចជាត្រូវបានធ្វើពីក្បាល និងខ្លួនរបស់សត្វស្វា ចំណែកដៃដូចប្រភេទថលជលិកដូចជាក្រពើ ឬជីងចក់ មានកន្ទុយដូចត្រី។

ហើយអ្វីដែលគួរឲ្យចាប់អារម្មណ៍ជាងនេះទៅទៀតនោះគេនិយាយថា សាកសពនាងមច្ឆាអាចជាស្នាដៃសិល្បៈរបស់ជប៉ុន “Made in Japan” ។ យោងតាមលទ្ធផលស្រាវជ្រាវ ប្រហែលជាត្រូវបានបង្កើតឡើងនៅឆ្នាំ ១៨០០ ។

ពិតជាគួរឲ្យភ្ញាក់ផ្អើលណាស់ដែលដឹងថា នៅសម័យមួយដែលសាមូរ៉ៃដើរតាមដងផ្លូវ មនុស្សបានបង្កើតរឿងចម្លែកបែបនេះ។

សាកសពនាងមច្ឆា “Made in Japan” មួយចំនួនត្រូវបានរក្សាទុកនៅជប៉ុន ហើយខ្លះទៀតត្រូវបានបញ្ជូនទៅអឺរ៉ុប។

ក្រៅពីនេះ នៅជប៉ុនមានតំណាលរឿងព្រេងនិយាយពីមនុស្សសុីសាច់មច្ឆា។ បុគ្គលរូបនោះមានឈ្មោះថា Yaobikuni ហើយនាងនៅរស់ ៨០០ ឆ្នាំដោយមិនចេះចាស់។ ចំពោះរឿងលម្អិតខ្ញុំនឹងរៀបរាប់នៅពេលក្រោយ។

តាមពិតទៅ ខ្ញុំមិនហ៊ានធ្វើត្រាប់តាមរឿងព្រេងខាងលើនោះទេ ប៉ុន្តែខ្ញុំពិតជាសង្ឃឹមថា មានឱកាសបានជួបនាងមច្ឆាក្នុងជីវិតពិត។

មហាសមុទ្រនៅមានអាថ៌កំបាំងជាច្រើនដែលយើងត្រូវចំណាយពេលច្រើនទើបអាចស្វែងយល់។ ចំណែកឯនាងមច្ឆាដែលជាភាវៈអាថ៌កំបាំងនៃមហាសមុទ្រ អាចនឹងបះបោរប្រឆាំងមនុស្ស ប្រសិនបើមនុស្សនៅតែបន្តបំផ្លាញទីជម្រករបស់ពួកគេ។

Abe Kengo