ពិព័រណ៍ការងារឆ្នាំ ២០២៣ ធ្វើឡើងនៅមជ្ឈមណ្ឌលសហប្រតិបត្ដិការកម្ពុជា-ជប៉ុន (CJCC) ត្រឡប់មកវិញហើយ

ថ្ងៃអង្គារ 05/12/2023 | 9:51 ព្រឹក

តើអ្នកទាំងអស់គ្នាកំពុងស្វែងរកការងារដែលស្របតាមជំនាញរបស់ខ្លួន? ឳកាសការងារជាច្រើនកំពុងតែរង់ចាំអ្នក។ បន្ទាប់ពីបញ្ចប់ការសិក្សា យើងម្នាក់ៗ រមេងចង់បានការងារដែលស័ក្តិសមនឹងខ្លួន។ តើយើងអាចស្វែងរកការងារដែលសមនឹងខ្លួននៅទីណា?

នៅថ្ងៃទី ០៥ ខែធ្នូ ឆ្នាំ ២០២៣ នេះ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បានរួមសហការជាមួយសមាគមធុរកិច្ចជប៉ុននៅកម្ពុជា (JBAC) ដើម្បីរៀបចំកម្មវិធីពិព័រណ៍ការងារឆ្នាំ ២០២៣ ។ កម្មវិធីនេះនឹងប្រព្រឹត្តឡើងនាថ្ងៃទី ១៧ ខែធ្នូ ឆ្នាំ ២០២៣ ចាប់ពីម៉ោង ៨ ព្រឹកដល់ម៉ោង ៥ ល្ងាច ដែលមានទីតាំងស្ថិតនៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ផ្ទាល់។

រូបភាព៖ CJCC

ចំពោះកម្មវិធីនាពេលកន្លងមក មានចំនួនអ្នកចូលរួមច្រើនជាង ២០០០ នាក់បានមកស្វែងរកការងារ។ ដោយឡែកកម្មវិធីលើកនេះ មានចំនួនក្រុមហ៊ុនទាំងកម្ពុជា និងជប៉ុនចូលរួមមានរហូតដល់ទៅជាង ៤០ ក្រុមហ៊ុន និងចំនួនឱកាសការងារមានរហូតដល់ទៅជិត ១៥០០ មុខដំណែង មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) រំពឹងថានឹងមានចំនួនបេក្ខជនមកចូលរួមក្នុងកម្មវិធីពិព័រណ៍ការងារឆ្នាំ ២០២៣ នេះ មានការកើនឡើងរហូតដល់ទៅជាង ៣០០០ នាក់។

លោក ស៊ី វណ្ណា ប្រធានជាន់ខ្ពស់ផ្នែកអភិវឌ្ឍន៍ធនធានមនុស្សនៃមជ្ឈមណ្ឌលសហប្រតិបត្តិការកម្ពុជា-ជប៉ុន បានលើកឡើងថា កម្មវិធីពិព័រណ៌ការងារឆ្នាំ ២០២៣ នេះ ជាវេទិការដ៏ពិសេសមួយសម្រាប់អ្នកកំពុងស្វែងរកការងារ ឲ្យមានឱកាសបានភ្ជាប់ទំនាក់ទំនង និងបង្កើតបណ្តាញជាមួយក្រុមហ៊ុនល្បីៗនានា។ លើសពីនេះទៅទៀត អ្នកចូលរួមទាំងនោះ ក៏នឹងមានឱកាសបានស្វែងរកជម្រើសអាជីពផ្សេងៗ ពីសហគ្រាសជប៉ុន និងកម្ពុជា ដែលកំពុងបើកទ្វារផ្តល់ឱកាសការងារជាច្រើនមុខជំនាញផងដែរ។

កម្មវិធីពិព័រណ៍ការងារ ដែលរៀបចំឡើងដោយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងសមាគមធុរកិច្ចជប៉ុននៅកម្ពុជា (JBAC) បានរួមចំណែកយ៉ាងសំខាន់ដល់ទីផ្សារការងារក្នុងរាជធានីភ្នំពេញ តាមរយៈការសម្របសម្រួលដល់ក្រុមហ៊ុន ក្នុងការស្វែងរកបុគ្គលិកដែលមានសក្តានុពល និងជួយដល់អ្នកកំពុងស្វែងរការងារឲ្យមើលឃើញឱកាសអាជីពការងារថ្មី។ ចាប់តាំងពីការចាប់ផ្តើមដំណើរការកាលពីឆ្នាំ ២០១២ កម្មវិធីនេះ ក៏បានចូលរួមជាផ្នែកមួយដ៏សំខាន់ក្នុងការអភិវឌ្ឍ និងភាពរីកចម្រើនផ្នែកអាជីពដល់សហគមន៍មូលដ្ឋានផងដែរ។

ចំណែកឯកម្មវិធីពិព័រណ៍ការងារឆ្នាំ ២០២៣ នេះវិញ ក៏នឹងផ្តល់ឱកាសដល់អ្នកដែលកំពុងស្វែងរកការងារ អាចធ្វើការទំនាក់ទំនងដោយផ្ទាល់ជាមួយបណ្តានិយោជក ដោយបេក្ខជនទាំងនោះ គ្រាន់តែភ្ជាប់មកជាមួយនូវប្រវត្តិរូបសង្ខេបធ្វើបច្ចុប្បន្នភាពរួច (Updated CV) និងលិខិតគម្រប (Cover letter) ដើម្បីធ្វើការសម្ភាសផ្ទាល់ជាមួយក្រុមហ៊ុន។

ដើម្បីទទួលបានព័ត៌មានថ្មីៗទាក់ទងនឹងកម្មវិធីពិព័រណ៍ការងារឆ្នាំ ២០២៣ និងគន្លឹះសំខាន់ផ្សេងៗទាក់ទិនទៅនឹងឱកាសការងារ សូមតាមដានទំព័រហ្វេសប៊ុកផ្លូវការរបស់ Job Information Club ។

ដូច្នេះហើយ សូមកុំរំលងឳកាសស្វែងរកការងារមួយនេះឲ្យសោះ អ្នកទាំងអស់គ្នាអាចរកបានការងារដែលសមនឹងខ្លួន។ មិនត្រឹមតែប៉ុណ្ណឹង ថែមទាំងអាចបង្កើតទំនាក់ទំនង និងស្គាល់ក្រុមហ៊ុនជាច្រើនផ្សេងទៀត។

ប្រភព៖ CJCC