តើ Watanabe ជា​នរណា​ដែល​សូម្បី​តែ “បិសាច” ក៏​ខ្លាច​ដែរ?

ពពួកដែលគួរឲ្យខ្លាចតាមការស្រមើស្រមៃនៅក្នុងរឿងព្រេងគេហៅថា “បិសាច” ។ នៅលើពិភពលោកមានរឿងព្រេង​ច្រើន​រាប់​មិន​អស់ ប៉ុន្តែប្រហែល​ជា​​មាន​​តែ​​ជប៉ុន​​ប៉ុណ្ណោះ ទើប​មាន​តំណាល​រឿង​និយាយ​ពី​ភាព​ភ័យខ្លាចរបស់ “បិសាច” ចំពោះបុគ្គលដែលមានឈ្មោះ “Watanabe” ។ ដើម្បី​យល់​កាន់តែ​ច្បាស់ ចូរយើងស្វែងយល់បន្ថែមរឿងព្រេង “កម្ចាត់​បិសាច” របស់​ជប៉ុន។

Watanabe no Tsuna – សាមូរ៉ៃកម្ចាត់បិសាច

កាលពីមុន មានបុរសម្នាក់ឈ្មោះ Shuten Douji ។ Shuten មាន​រូបរាង​សង្ហា ដែលគ្រប់គ្នាតែងតែសរសើរនៅពេលដែលឃើញគាត់។ ពិតណាស់ ជារៀងរាល់ថ្ងៃក៏ទទួលបានសំបុត្រស្នេហាជាច្រើនពីនារីនៅក្នុងភូមិ រហូតដល់ថ្នាក់គាត់ត្រូវ​ទុក​ក្នុង​ប្រអប់ធំមួយ ហើយមិនបានមើលផង។

ប៉ុន្តែនៅថ្ងៃមួយ ដោយសារ​ប្រអប់​នោះ​ពេញ​ទៅ​ដោយ​សំបុត្រ​ស្នេហា​របស់​មនុស្ស​ស្រី ដូច្នេះបានជា Shuten សម្រេចចិត្តយកទៅដុតទាំងអស់។

ថ្វីត្បិតតែ សំបុត្រទាំងនោះផ្ទុកស្នេហារបស់មនុស្សស្រីជាច្រើន ប៉ុន្តែនៅពេលដែលយកទៅដុត ទឹកចិត្តទាំងនោះបាន​ប្រែ​ក្លាយទៅជាការចងគំនុំ ហើយធ្វើឲ្យ Shuten ក្លាយទៅជាបិសាច។

ស្នែងចាប់ផ្តើមដុះនៅលើក្បាល ដែលបានធ្វើឲ្យគាត់មិនអាចបង្ហាញខ្លួននៅមុខអ្នកដទៃទៀត។ Shuten បានរត់គេច​ខ្លួន ហើយលាក់ខ្លួននៅតំបន់ភ្នំមួយនៅ Kyoto ។

គាត់បានក្លាយទៅជាបិសាចមួយដែលមានមុខមាត់ និងបេះដូងពោរពេញ​ទៅ​ដោយ​ការ​ស្អប់។ ដោយសារកម្លាំងរបស់ខ្លួន Shuten Douji បានក្លាយជាស្តេចបិសាច ហើយដឹកនាំពពួកបិសាចដែលរស់នៅក្នុងតំបន់នេះ។ គាត់នាំអ្នក​ក្រោម​បង្កាប់​របស់​ខ្លួន​ដើរ​តាម​ដង​ផ្លូវ Kyoto ដើម្បី​វាយប្រហារ​សាមូរ៉ៃ និង​ចាប់ពង្រត់​ស្ត្រី​។

នៅពេលនោះ Watanabe no Tsuna បានស្ម័គ្រចិត្តចូលរួមកងទ័ពសាមូរ៉ៃ ដើម្បីកម្ចាត់បិសាចឲ្យអ្នកភូមិ។ គាត់បាន​កម្ចាត់ និង​កាត់​ដាច់ដៃស្តាំរបស់ Shuten Douji រហូតត្រូវរត់គេចខ្លួន។

បន្ទាប់ពីព្រឹត្តិការណ៍នេះ Watanabe កាន់តែល្បីឈ្មោះ។ ម្តាយមីងរបស់ Watanabe បានមកលេងគាត់ ហើយប្រាប់គាត់ថា កូនស្រីរបស់គាត់ក៏ត្រូវបិសាចសម្លាប់ដែរ ទើប​អង្វរ​សុំ​ឲ្យគាត់មើលដៃរបស់បិសាច។ ទីបំផុត Watanabe បានយល់ព្រម ប៉ុន្តែនៅពេលដែល​ម្តាយ​មីង​ឃើញ​ដៃ​នោះ​ភ្លាម ក៏ឆក់ហើយយកទៅបាត់។

តាមពិតទៅ ម្តាយមីងរូបនោះគឺ Shuten Douji បានក្លែងបន្លំដើម្បីមកយកដៃរបស់ខ្លួនវិញ។ គាត់បានយកដៃរបស់​ខ្លួនត្រឡប់ទៅភ្នំវិញ ប៉ុន្តែនៅតែត្រូវ Watanabe តាមទាន់។

យ៉ាងណាមិញ Watanabe បែរជាមិនវាយប្រហារ Shuten ភ្លាមនោះទេ ប៉ុន្តែដាក់អន្ទាក់បិសាច។ បន្ទាប់​មក​គាត់​បញ្ច្រកស្រា Shuten រហូតដល់ស្រវឹង ទើប​កាត់​ក្បាល​របស់​បិសាច។ គាត់​និយាយ​ថា ក្បាល​របស់ Shuten Douji បាន​ហោះ​ត្រឡប់​ទៅ​​ប្រាប់​ដល់​​បិសាច​​ផ្សេង​​ទៀត។

ចាប់ពីពេលនោះមក Watanabe បានក្លាយជាសត្រូវ ក៏ដូចជាភាពភ័យខ្លាចរបស់ពួកបិសាចនៅពេលដែលបានឮឈ្មោះនេះ។

មានវប្បធម៌ប្រពៃណីជប៉ុនមួយគេហៅថា Setsubun ។ អំឡុងពេលនោះ ក្រុមគ្រួសារជប៉ុននាំគ្នាបោះសណ្តែក ហើយនិយាយថា “Oni wa Soto!” ដើម្បីការពារកុំឲ្យបិសាចចូលផ្ទះ។

ទោះជាយ៉ាងណា មានតែគ្រួសារដែលមានត្រកូល Watanabe ប៉ុណ្ណោះ ដែលមិនចាំបាច់ចូលរួមទំនៀមទម្លាប់បោះ​សណ្តែក​នេះ។ នោះ​​ក៏​​ព្រោះ​​តែ​​គ្រប់​​គ្នា​​ជឿ​​ថា “គ្មានបិសាចមួយណាហ៊ានចូលគ្រួសាររបស់ Watanabe នោះទេ” ។

ក្រៅពីនេះ នៅទូទាំងប្រទេសអ្នកត្រកូល Watanabe មានជាង ១ លាននាក់។ ដូច្នេះ​តើ​នេះ​ជា​ហេតុផល​ដែល​ជួយឲ្យជប៉ុន​មាន​​សន្តិភាព​​ដូច​សព្វ​ថ្ងៃនេះ​មែនទេ?

Abe Kengo