Okubo Tadayuki ជាសាមូរ៉ៃដែលទទួលបាន​ជោគ​ជ័យ​ដោយ​សារ​​តែ “សមត្ថភាព​ធ្វើនំ”

តើសាមូរ៉ៃមានតួនាទីអ្វី?

・ប្រយុទ្ធ និងដណ្តើមជ័យជម្នះ

・អភិវឌ្ឍ និងពង្រីកទឹកដីដែលត្រូវបានប្រគល់

ទោះជាយ៉ាងណា មានសាមូរ៉ៃម្នាក់ទទួលបានជោគជ័យដោយសារតែវិធីពិសេសមួយ។ អ្វីដែលធ្វើឲ្យគ្រប់គ្នាភ្ញាក់​ផ្អើល​គឺ​សាមូរ៉ៃ​រូប​នេះ​ត្រូវ​បានកត់ត្រាក្នុង​ប្រវត្តិ​សាស្ត្រ​ ដោយត្រូវបានទទួលស្គាល់ចំពោះ​ទេព​កោសល្យ​​ពិសេស​​ក្នុង​​ការ “ធ្វើបង្អែម” ។

គឺលោក Okubo Tadayuki ដែលគេតែងតែហៅគាត់ថា Togoro ។

Togoro ធ្លាប់បម្រើ Tokugawa Ieyasu ដែលក្រោយមកបានក្លាយជាសាមូរ៉ៃលេខមួយ និងបង្រួបបង្រួមប្រទេស​ជប៉ុន។ ប៉ុន្តែក្នុងអំឡុងពេលប្រយុទ្ធមួយ Togoro បានរងរបួស ហើយលទ្ធផលធ្វើឲ្យ​គាត់​មិន​អាច​ដើរ​បាន​ធម្មតាឡើយ។

ដោយសារអស់សង្ឃឹមទើប Togoro គិតចង់ត្រឡប់ទៅស្រុកកំណើតវិញ ហើយ​ចំណាយ​ពេលដែលនៅសល់រស់ម្នាក់​ឯង។ មុនពេលចាកចេញ Togoro សម្រេចចិត្តជូនស្ករគ្រាប់ដែលគាត់បានធ្វើឲ្យ Ieyasu ជា​អ្នក​ដែល​ធ្លាប់​ជួយគាត់។

ជាការពិតណាស់ Togoro មានភាពប៉ិនប្រសប់ក្នុងការធ្វើបង្អែម ដូច្នេះនៅពេលដែល Ieyasu បានហូបស្ករគ្រាប់ទាំង​នេះ គាត់មានអារម្មណ៍ពេញចិត្តយ៉ាងខ្លាំង។

ចាប់ពីពេលនោះមក Ieyasu ចូលចិត្តស្នាដៃរបស់ Togoro យ៉ាងខ្លាំង រហូតដល់ថ្នាក់មិនថា Ieyasu ទៅដល់ទីណា លោកតែងតែចង់ឲ្យគ្រប់គ្នាត្រៀមនំ mochi ដែលធ្វើដោយ Togoro ផ្ទាល់។ Togoro ជាសាមូរ៉ៃដ៏កម្រម្នាក់ដែលអាចធ្វើឲ្យ Ieyasu ពេញចិត្ត​ព្រោះ​តែ​បង្អែម។

Ieyasu បានសម្រេចចិត្តមិនទទួលយកអាហារពីនរណាម្នាក់នោះទេ ព្រោះខ្លាចត្រូវបំពុល។ យ៉ាងណាមិញ សម្រាប់លោកមានតែនំ mochi Mikawa គឺមិនអាចខ្វះបាន។ ដូច្នេះហើយ យើងអាចទាយដឹងថានំដែល Togoro ធ្វើឆ្ងាញ់ប៉ុនណា។

ក្រោយមក Ieyasu បានប្តូរមូលដ្ឋានរបស់ខ្លួនទៅកាន់តំបន់ Kanto ហើយបានយក Togoro ទៅជាមួយគាត់។ នៅទីនេះ Togoro ត្រូវ​បាន​ប្រគល់​ភារកិច្ច​គ្រប់​គ្រង​ការផ្គត់ផ្គង់ទឹកនៅក្នុងទីក្រុងប្រាសាទ Edo ហើយគាត់ក៏ធ្វើបានល្អណាស់ដែរ។

ក្នុងភាសាជប៉ុនមានសុភាសិតមួយមានប្រភពមកពីរឿងព្រេងចិន៖ “Ningen banji saiou ga uma” ដោយបកប្រែ​ថា “សំណាង​របស់​មនុស្ស​មិន​អាច​ទាយ​ដឹង​មុន​នោះ​ទេ” ។

នៅពេលខ្លះអ្វីដែលអ្នកថាជាសំណាងអាក្រក់ ប៉ុន្តែបែរជាសំណាងល្អសម្រាប់អ្នក Togoro ជាបុគ្គលដែលបានបញ្ជាក់​ពី​ចំណុច​នេះ។ ប្រសិន​បើ​គាត់​មិន​បាន​រង​របួស គាត់អាចនឹងបន្តតួនាទីដូចជាសាមូរ៉ៃធម្មតាមួយរូប។ ពិភព​សាមូរ៉ៃ​មានគូប្រជែងជាច្រើន ហើយគាត់ហាក់ដូចជាពិបាកនឹងទទួល​បាន​ជោគ​ជ័យ​​តាមវិធី​ទូទៅ​ណាស់។

ថ្វីត្បិតតែ ពេលខ្លះយើងមិនដឹងថា សុភមង្គលនឹងមកតាមទម្រង់បែបណា ប៉ុន្តែសូមកុំមានគំនិតទុទិដ្ឋិនិយមនៅ​ពេលដែលមានរឿងមិនដូចបំណងកើតឡើង។ បង្វែរឧបសគ្គទៅជាកម្លាំងចិត្ត ហើយកម្លាំង​គឺ​ដើម្បី​នាំ​មក​នូវ​​សុភមង្គល​​​កាន់​​តែ​ច្រើន​ដល់​ខ្លួន​អ្នក។

Abe Kengo