តើភាពរឹងរូសរបស់ TOYOTA ក្នុងយុគសម័យរថយន្តអគ្គិសនីជារឿងឆោតល្ងង់ដែរទេ??

ថ្ងៃចន្ទ 09/10/2023 | 16:00 ល្ងាច

ខណៈដែលក្រុមហ៊ុនផលិតរថយន្តនៅលើពិភពលោកកំពុងប្តូរការផលិតរថយន្តដែលប្រើសាំងទៅជារថយន្តអគ្គិសនី យ៉ាងណាមិញ TOYOTA គឺជាក្រុមហ៊ុនតែមួយគត់ដែលមិនបោះបង់ចោលការប្តេជ្ញាចិត្តក្នុងការអភិវឌ្ឍរថយន្តដែលប្រើអុីដ្រូសែន។

មិនថាមើលទៅយ៉ាងណា នេះជាសង្រ្គាមដែលមិនអំណោយផល ដូច្នេះហេតុអ្វីបានជាពួកគេមិនបោះបង់ការតាំងចិត្តក្នុងការប្រើប្រាស់ឥន្ធនៈអុីដ្រូសែន? នោះក៏ព្រោះតែ TOYOTA កំពុងគិតដល់ការការពារបរិស្ថានជាសកល។

ថ្វីត្បិតតែ នៅមានបញ្ហាជាច្រើន ប៉ុន្តែសព្វថ្ងៃការប្រើប្រាស់រថយន្តអគ្គិសនីអាចធ្វើទៅបាន។ ទោះជាយ៉ាងណា ចំពោះប្រភេទយានជំនិះធំៗ ដូចជាយន្តហោះ និងឡានដឹកទំនិញមិនទាន់អាចប្តូរទៅប្រើថាមពលអគ្គិសនីបានឡើយ។

ដូច្នេះហើយ យើងនៅតែត្រូវបន្តប្រើប្រេងម៉ាស៊ូតសម្រាប់រថយន្តដឹកទំនិញ និងឥន្ធនៈប្រើសម្រាប់ម៉ាស៊ីនក្នុងយន្តហោះ។ នៅពេលដែលផលិតប្រភេទឥន្ធនៈទាំងនេះ ប្រេងសាំងនឹងត្រូវបានផលិតដោយជៀសមិនរួច ដែលមានន័យថាមិនអាចកាត់បន្ថយការប្រើប្រាស់សាំងបានទេ។

ម៉ាស៊ីនអុីដ្រូសែនកំពុងត្រូវបានពិសោធសម្រាប់ប្រើប្រាស់ក្នុងឡានដឹកទំនិញធំៗ និងយន្តហោះ។ ប្រសិនបើអាចដាក់ឲ្យប្រើប្រាស់ជាក់ស្តែង នោះពិភពដែលមិនចាំបាច់ប្រើប្រេងឆៅនឹងលេចឡើង។ ជាការពិតណាស់ នៅតែត្រូវប្រើប្រេងសម្រាប់ផលិតផ្លាស្ទិច និងវត្ថុជាច្រើនទៀត ប៉ុន្តែអាចកាត់បន្ថយបរិមាណការបំភាយឧស្ម័នដែលបង្កគ្រោះថ្នាក់ចូលបរិស្ថាន។

បញ្ហាគឺមានតែ Toyota ទេ ដែលកំពុងអនុវត្តគម្រោងយ៉ាងយកចិត្តទុកដាក់។ ក្រៅពីបញ្ហាធ្វើយ៉ាងណាបង្កើតអុីដ្រូសែនឲ្យមានប្រសិទ្ធភាព ថែមទាំងត្រូវធ្វើឲ្យវាពេញនិយម អាចរកបញ្ចូលអុីដ្រូសែនគ្រប់កន្លែងដូចស្ថានីយ៍ប្រេងឥន្ធនៈដែរ។

ដូច្នេះហេតុអ្វីបានជាក្រុមហ៊ុនផលិតរបស់អឺរ៉ុបមិនចូលរួមក្នុងគម្រោងនេះ? ព្រោះបើទោះជាពួកគេចាប់ផ្តើមស្រាវជ្រាវម៉ាស៊ីនអុីដ្រូសែនចាប់ពីពេលនេះក៏មិនអាចប្រជែងនឹង TOYOTA បានដែរ។

អឺរ៉ុបបានបង្កើតបទប្បញ្ញត្តិដើម្បីបញ្ឈប់ទាំងស្រុងរថយន្តដែលប្រើសាំង ប៉ុន្តែដោយសារមិនអាចប្រកួតប្រជែងជាមួយប្រទេសចិនខាងវិស័យរថយន្តអគ្គិសនី ដូច្នេះពួកគេបានប្តូរបទប្បញ្ញត្តិនោះ។

ដោយសារគ្មានអ្នកណាអាចប្រកួតប្រជែងនឹងផលិតផលជប៉ុន ចំពោះប្រភេទរថយន្ត hybrid រួមបញ្ចូលមុខងារល្អបំផុតនៃរថយន្តប្រើសាំង និងរថយន្តអគ្គិសនី

ពិភពលោកកំពុងសង្កេតមើលថា ឧស្សាហកម្មរថយន្តនៅអឺរ៉ុបនឹងធ្វើអ្វីបន្ទាប់ទៀត។ ប៉ុន្តែហាក់បីដូចជាពួកគេមិនសូវយកចិត្តទុកដាក់ចំពោះការដោះស្រាយបញ្ហាបរិស្ថាននោះទេ គ្រាន់តែកំពុងព្យាយាមប្រើប្រាស់បញ្ហាបរិស្ថានដើម្បីការពារខ្លួន ហើយដណ្តើមសិទ្ធិគ្រប់គ្រងឧស្សាហកម្មនេះវិញ។

ប្រសិនបើយើងពិតជាមានការព្រួយបារម្ភចំពោះបញ្ហាបរិស្ថាន ខ្ញុំគិតថា មធ្យោបាយដ៏ល្អបំផុតគឺសហការជាមួយ TOYOTA ដើម្បីបង្កើតម៉ាស៊ីនដែលប្រើអុីដ្រូវសែន។

អឺរ៉ុបតែងតែកំណត់ច្បាប់របស់ខ្លួន ក្នុងការប្រណាំង F-1 គ្មានអ្នកណាអាចយកឈ្នះ HONDA និងបច្ចេកវិទ្យា Turbo ដែលអឺរ៉ុបហាមដើម្បីសង្កត់ HONDA នោះទេ។ ចំណែកការប្រណាំងកង់ ក្រុមហ៊ុនផលិត SHIMANO របស់ជប៉ុនក៏ត្រូវដកចេញពីការប្រកួតធំដែលធ្វើឡើងនៅអឺរ៉ុបផងដែរ។

ដូច្នេះខ្ញុំសង្ឃឹមថា ជាជាងការផ្តោតលើប្រយោជន៍ផ្ទាល់ខ្លួន គ្រប់គ្នាគួរតែទទួលយករឿងដែលល្អ និងនាំមកនូវអត្ថប្រយោជន៍ពិតប្រាកដដល់បរិស្ថាន។

Abe Kengo