បញ្ហារងការធ្វើបាបនៅកន្លែងធ្វើការគឺជាភាពភ័យខ្លាចបំផុតសម្រាប់មនុស្សពេញវ័យ

ថ្ងៃសុក្រ 06/10/2023 | 13:23 ល្ងាច

នៅពេលដែលនិយាយពីបញ្ហាធ្វើបាប ប្រហែលជាយើងច្រើនតែគិតដល់ប្អូនៗសិស្សានុសិស្សប៉ុណ្ណោះ។ យ៉ាងណាមិញ នៅជប៉ុនរឿងនេះនៅតែអាចកើតឡើង មិនថាអ្នកជាមនុស្សពេញវ័យក៏ដោយ។ ជាមួយនឹងស្ថានភាពវិបត្តិសេដ្ឋកិច្ចអូសបន្លាយ និងជំងឺរាតត្បាតកូវីដ ១៩ អារម្មណ៍រកផ្លូវចេញមិនឃើញ បានគ្របដណ្ដប់ប្រទេសទាំងមូល និងបណ្តាលឲ្យមានបញ្ហាធ្វើបាបកាន់តែច្រើនឡើង។

ប្រសិនបើអ្នកមានបំណងចង់ធ្វើការនៅក្រុមហ៊ុនជប៉ុន វានឹងមានប្រយោជន៍ខ្លាំងណាស់ បើសិនជាអ្នកយល់ និងអាចដោះស្រាយបញ្ហានេះ ដោយចាត់ទុកដូចជាជំនាញសម្រាប់ការពារខ្លួន។

មូលហេតុនៃការសម្លុតធ្វើបាបអាចកើតចេញពីចំណុចដែលអ្នកធ្វើខុសម្តងហើយម្តងទៀតនៅកន្លែងធ្វើការ ឬបង្កបញ្ហាដល់អ្នកដទៃដោយការមកយឺត ឬអវត្តមាន។ យ៉ាងណាមិញ មនុស្សមួយចំនួនត្រូវគេធ្វើបាបព្រោះតែមានរូបរាងស្រស់ស្អាត និងទេពកោសល្យពូកែក្នុងការងារ។ បន្ទាប់មកនេះ ខ្ញុំនឹងលើកយកទម្រង់ធ្វើបាបមួយចំនួននៅកន្លែងធ្វើការ។

• ត្រូវគ្រប់គ្នាព្រងើយកន្តើយ។
• រងការវាយប្រហារដោយអំពើហិង្សា សម្តីអសុរោះ និយាយអាក្រក់នៅពីក្រោយខ្នង ឬការគំរាមកំហែង។
• ត្រូវបង្ខំឲ្យធ្វើការងារច្រើន ឬការងារដែលមិនពាក់ព័ន្ធ។
• មិនអាចចូលរួមគម្រោង ឬការងារដែលសំខាន់ៗ។
• ទទួលការរារាំង ឬត្រូវទម្លាក់កំហុសចំពោះការខ្វះខាតនៅកន្លែងធ្វើការ។

ទង្វើទាំងនេះពិតជាអាក្រក់ណាស់ មិនត្រឹមតែធ្វើឲ្យខូតខាតដល់ក្រុមហ៊ុនប៉ុណ្ណោះទេ ថែមទាំងធ្វើឲ្យមានការខាតបង់យ៉ាងច្រើនដល់សង្គមជាតិទាំងមូលផងដែរ។

បើប្រៀបនឹងកាលនៅជាសិស្ស អ្វីដែលធ្វើឲ្យមនុស្សកាន់តែមានអារម្មណ៍ភ័យខ្លាច នោះគឺពេលដែលពេញវ័យ។ នៅសាលាបើសិនជាអត់ធ្មត់រយៈពេល ១ ឆ្នាំនឹងអាចប្តូរថ្នាក់រៀន ឬយ៉ាងហោចណាស់ ៣ ឆ្នាំសម្រាប់សិស្សម្នាក់បញ្ចប់វិទ្យាល័យ នៅពេលនោះបញ្ហារងការធ្វើបាបអាចនឹងបញ្ចប់។

យ៉ាងណាមិញ នៅពេលដែលពេញវ័យ បញ្ហាទទួលរងការធ្វើបាបអូសបន្លាយគ្មានទីបញ្ចប់។ ជាងនេះទៅទៀត ប្រសិនបើការងារមិនដំណើរការដូចការរំពឹងទុក នោះវានឹងក្លាយទៅជារយៈពេលដ៏អាក្រក់ និងហត់នឿយ ដែលប៉ះពាល់ផ្ទាល់ដល់ជីវិត និងស្មារតីរបស់អ្នក។

ថ្វីត្បិតតែ ដាក់ពាក្យស្លោក “ហាមការធ្វើបាប” ជារឿងដែលងាយស្រួលណាស់ ប៉ុន្តែជាក់ស្តែងបញ្ហានេះមិនដែលបាត់ឡើយ។ ដូច្នេះហើយ យើងត្រូវប្រុងប្រយ័ត្នស្វែងរកវិធីដោះស្រាយបញ្ហានេះ ដើម្បីកុំឲ្យខ្លួនធ្លាក់ក្នុងស្ថានភាពអាក្រក់។

បង្ហាញទស្សនៈផ្ទាល់ខ្លួនឲ្យបានច្បាស់លាស់

មិនថាអ្នកជាសិស្ស ឬបុគ្គលដែលពេញវ័យ អ្នកដែលមិនអាចបង្ហាញច្បាស់ទស្សនៈផ្ទាល់ខ្លួន តែងតែក្លាយទៅជាគោលដៅនៃការធ្វើបាប។ ការដែលបង្ហាញថា អ្នកមិនចូលចិត្តអ្វីមួយគឺសំខាន់ខ្លាំងណាស់។

តើអ្វីដែលសំខាន់បំផុត?

ក្រុមហ៊ុនមិនមែនជាកន្លែងបង្កើតទំនាក់ទំនងមិត្តភាពនោះទេ។ “គ្រប់គ្នាធ្វើការជាមួយគ្នាដើម្បីបង្កើតផលប្រយោជន៍ដ៏ធំបំផុត” នោះទើបជាបេសកកម្មនៃក្រុមមួយដូចជាក្រុមហ៊ុន។

អ្នកដែលខ្ជះខ្ជាយពេលវេលាទៅធ្វើបាបអ្នកដទៃប្រហែលជាភ្លេចចំណុចនេះហើយ ពួកគេប្រាកដជាមិនអាចបំពេញការងារបានល្អនោះទេ។ និយាយឲ្យកាន់តែច្បាស់ ពួកគេគ្រាន់តែកំពុងនាំបញ្ហាដល់ក្រុមហ៊ុនប៉ុណ្ណោះ។

ប្រសិនបើគ្រប់គ្នាមិនទទួលស្គាល់ ឬសូម្បីតែថ្នាក់លើក៏មិនទទួលស្គាល់អ្នក ចូរពិចារណាមូលហេតុ ២ ខាងក្រោមនេះ៖

១. ថ្នាក់លើរបស់អ្នកជាមនុស្សមិនឆ្លាតវៃ ហើយមិនចេះវាយតម្លៃបុគ្គលិក។

២. អ្នកមិនមែនជាមនុស្សមានសមត្ថភាពដូចដែលអ្នកគិតនោះទេ។

បើនោះជាមូលហេតុទី ១ អ្នកគួរតែពិចារណារឿងប្តូរការងារ។ នៅក្រុមហ៊ុនផ្សេង អ្នកអាចនឹងទទួលបានការយកចិត្តទុកដាក់។ ប្រសិនបើអ្នកជឿជាក់លើសមត្ថភាពរបស់ខ្លួន ហេតុអ្វីមិនព្យាយាមស្វែងរកបរិយាកាសថ្មីដែលស័ក្តិសមជាង?

ចរិយាសម្បត្តិរបស់បុគ្គលដែលធ្វើបាបអ្នកដទៃទើបអាក្រក់បំផុត។ នេះជាទង្វើដែលមិនអាចទទួលយកបាន មិនថាពួកគេជានរណាក៏ដោយ។

ទោះជាយ៉ាងនេះក្តី បុគ្គលដែលត្រូវគេធ្វើបាបក៏មានសិទ្ធិសម្រេចរបស់ខ្លួនដែរ។ ប្រសិនបើអ្នកជាមនុស្សមានសមត្ថភាព ហើយរួមចំណែកដល់ក្រុមហ៊ុនច្រើនជាងអ្នកដ៏ទៃ នោះអ្នកនឹងមានជម្រើសល្អជាង។

ចូរយើងបន្តឆ្ពោះទៅមុខលើផ្លូវដែលខ្លួនត្រូវដើរ ជាជាងការដែលត្រូវនរណាម្នាក់ឆក់យកស្មារតីដោយសារបញ្ហាធ្វើបាបឥតប្រយោជន៍។

Abe Kengo