រថយន្តសន្សំសំចៃប្រេងបំផុតក្នុងឆ្នាំ ២០២៣ អាចធ្វើដំណើរជាង ២០០០ គីឡូម៉ែត្រ​ចំណាយសាំង​ត្រឹម ១ លីត្រ

នៅពេលដែលបញ្ហាអេកូឡូស៊ី និងបរិស្ថានកាន់តែទទួលបានការយកចិត្តទុកដាក់ពីពិភពលោក ចំនួនរថយន្តអគ្គិសនី​ផលិតចេញពីរោងចក្រក៏កើនឡើងផងដែរ។ យ៉ាងណាមិញ នៅតែមានមតិសង្ស័យមិនដឹងថា ថ្មប្រើសម្រាប់រថយន្តអគ្គិសនីពិតជាមិនប៉ះពាល់ដល់បរិស្ថាន។

តើអ្នកដឹងទេថានេះជាអ្វី?

នេះជារថយន្តដែលបានឈ្នះចំណាត់ថ្នាក់ជើងឯកនៃសមាជិក “ក្លឹបថ្ងៃពុធ” ក្នុងការប្រកួត Honda Soichiro Cup – Honda Eco Mileage Challenge 2023 ដែលប្រារព្ធឡើងនៅខេត្ត Tochigi ។

រថយន្ត​នេះឈានដល់កម្រិត ២៤៥១,៨៧ គីឡូម៉ែត្រ ដោយ​ប្រើ​សាំងត្រឹម ១​ លីត្រប៉ុណ្ណោះ។ អ្នក​មិន​មើល​ច្រឡំ​នោះ​ទេ ព្រោះ​រថយន្ត​​ដែល​អាច​​ធ្វើ​​ដំណើរ​​ជាង ២.០០០ គីឡូម៉ែត្រ​​ក្នុង​​មួយ​លីត្រ​សាំង​ ​មាន​ជា​យូរ​មក​ហើយ​នៅ​ប្រទេស​ជប៉ុន។

ការប្រកួតប្រជែងនេះមិនមែនសំដៅលើល្បឿនឡើយ ប៉ុន្តែ​ផ្តោតលើ​ប្រសិទ្ធភាពនៃប្រើប្រាស់សាំង តាមរយៈចម្ងាយដែលអ្នកអាចធ្វើដំណើរ​ដោយ​ប្រើ​សាំង ១ លីត្រ។ អ្នកនឹងធ្វើដំណើរចំនួន ៧ ជុំនៅលើផ្លូវប្រកួត ដោយប្រើល្បឿនជាមធ្យម ២៥ គីឡូម៉ែត្រក្នុងមួយម៉ោង ឬច្រើនជាងនេះ ហើយគណៈកម្មាធិការរៀបចំនឹងគណនាការប្រើប្រាស់ប្រេងឥន្ធនៈ ដោយផ្អែកលើបរិមាណសាំងដែលនៅសល់។

ក្រុមមួយចំនួនគិតបញ្ឈប់ម៉ាស៊ីននៅពាក់កណ្តាលផ្លូវ ដើម្បីសន្សំសំចៃប្រេង។ ខណៈដែលក្រុមខ្លះបញ្ឆេះម៉ាសុីនជានិច្ច ព្រោះមិនចង់​ខ្ជះខ្ជាយសាំងពេលដំណើរការម៉ាសុីនឡើងវិញ។

ម៉ាស៊ីន​ដែល​ប្រើ​ក្នុង​ការ​ប្រណាំង​ជា​ម៉ាស៊ីន​ម៉ូតូ​ចំណុះ ៥០cc ដែល Honda កំពុងលក់នៅលើទីផ្សារ។ កំណត់ត្រាខ្ពស់បំផុតដែលបានកត់ត្រាមកទល់ពេលនេះគឺ ៣៦៤៤ គីឡូម៉ែត្រក្នុងមួយលីត្រ ស្មើនឹងចម្ងាយពីទីលានប្រណាំងក្នុងប្រទេសជប៉ុនទៅកាន់ឆ្នេរសមុទ្រហាឡុងនៃប្រទេសវៀតណាម។

ការដែលគិតថា ដើម្បីដោះស្រាយបញ្ហាបរិស្ថាន ដោយប្តូរការប្រើប្រាស់សាំងទៅជាអគ្គិសនីទាំងស្រុងអាចជាការគិតខុស។ តើអ្នកគិតថា ការប្រកួតប្រជែងបច្ចេកវិទ្យាបង្កើតផលិតផលដែលចំណាយប្រេងតិច ហើយមិនប៉ះពាល់ដល់បរិស្ថាន ទើបជាគន្លឹះដែលយើងការពារភពផែនដីនាពេលអនាគតមែនទេ?

Abe Kengo