តើ​អ្នក​ពិត​ជា​រវល់​មែន ឬ​នោះ​គ្រាន់​តែ​ជា​អារម្មណ៍​ផ្ទាល់​ខ្លួន

ការដំឡើងប្រាក់ខែជា​បំណង​ប្រាថ្នា​របស់​យើង​ម្នាក់ៗ​ យ៉ាងណាមិញ តើអ្នកកំពុងតែត្អូញត្អែរ និងទម្លាក់ទំនួលខុសត្រូវ​ទាំង​អស់លើក្រុមហ៊ុនដែរទេ? ខ្ញុំ​គិត​ថា នោះ​ជាកំហុសធ្ងន់ បើសិនជាអ្នកមានគំនិតដូចនេះ។

របៀបគិតងាយៗ

ប្រសិនបើអ្នកចង់ឡើងប្រាក់ខែ អ្វីដែលសំខាន់អ្នកគ្រាន់តែធ្វើការឲ្យច្រើនជាងអ្នកដទៃ។ ប៉ុន្តែអ្នកបែរជានិយាយ​ថា “សុំទោស ខ្ញុំ​មាន​ការ​ងារ​ច្រើនពេកហើយ ដូច្នេះមិនអាចធ្វើអ្វីបន្ថែមឡើយ” ។

ខ្ញុំបានធ្វើការនៅជប៉ុន និងវៀតណាមអស់រយៈពេល ៣២ ឆ្នាំមកហើយ។ អំឡុងពេលនោះ ខ្ញុំមានទំនាក់ទំនងជាមួយថ្នាក់លើ មិត្តរួមការងារ និងថ្នាក់ក្រោមជាច្រើននាក់។ ខ្ញុំឃើញថា អ្នកដែលតែងតែនិយាយថា ខ្លួនរវល់ជាបុគ្គល​ដែល​គ្មាន​ឳកាស​ឡើង​ប្រាក់​ខែ​ឡើយ។

ថ្វីត្បិតតែ ពួកគេគិតថា ខ្លួនកំពុងរវល់យ៉ាងខ្លាំង ប៉ុន្តែយល់ល្អពួកគេគួរតែពិនិត្យមើលរបៀបធ្វើការរបស់ខ្លួនឡើង​វិញ។

មូលហេតុ​ដែលអ្នករវល់អាចដោយសារតែខ្លួនឯងដែរទេ?

ខ្ញុំមិនគិតថាពួកគេកំពុងនិយាយកុហកនោះទេ។ ពួកគេពិតជារវល់មែន ប៉ុន្តែភាគច្រើនដោយសារតែពួកគេមិនអាចគ្រប់គ្រងពេលវេលារបស់ខ្លួនឲ្យបានត្រឹម​ត្រូវ។

ក្នុងករណីនេះ មធ្យោបាយកាត់បន្ថយភាពមមាញឹកដែលល្អបំផុតគឺធ្វើតាមចំណុច ៣ ដូចតទៅ៖ បែងចែកប្រភេទ​ការ​ងារ​សំខាន់ គ្រប់គ្រងពេលវេលាតាមបែបវិទ្យាសាស្ត្រ និងអនុវត្តតាមក្បួន “Horenso” (រាយការណ៍ – ទំនាក់​ទំនង – ពិភាក្សា)។

បែងចែកប្រភេទការងារសំខាន់

តើអ្នកកំពុងជួបប្រទះស្ថានភាពការងារច្រើនត្រូវដោះស្រាយជាបន្ទាន់ ធ្វើឲ្យខ្លួនមានអារម្មណ៍ថារវល់ខ្លាំងដែរទេ? នៅ​ពេល​នោះ បើសិនជាអ្នក​ផ្តោត​លើ​ការ​ងារ​ដែល​ចាំបាច់ ហើយមិនអាចគ្រប់គ្រងការងារដែលនៅសេសសល់ នោះភាព​មមាញឹករបស់អ្នកមិនថយចុះឡើយ ប៉ុន្តែផ្ទុយទៅវិញកាន់តែច្រើន។ ដូច្នេះហើយ ការបែងចែកប្រភេទការងារសំខាន់​ពី​ដំបូង​ជា​រឿងដែរចាំបាច់។

ក៏ដូចជាអ្នក​ដែល​រវល់​ខ្លាំងនឹងការងារនៅចំពោះមុខ ហើយភ្លេចចំណាយពេលបណ្តុះបណ្តាលបុគ្គលិកថ្មី។ ធ្វើដូច្នេះ ការ​ងារ​របស់​​អ្នក​​មិន​អាច​កាត់​បន្ថយ​បាន​ឡើយ។

ប៉ុន្តែប្រសិនបើអ្នកបណ្តុះបណ្តាល និងអភិវឌ្ឍបុគ្គលិកថ្មី ពួកគេអាចជំនួសអ្នកធ្វើការងារសំខាន់ៗនៅចំពោះមុខ។ អ្នកគ្រាន់តែចំណាយពេល ២០% សម្រាប់​បណ្តុះ​បណ្តាលបុគ្គលិកថ្មី ពីរបីខែក្រោយមក ការងាររបស់អ្នកនឹងធូរស្រាល​ជាង​មុន។

គ្រប់គ្រង​ពេលវេលា

ការគ្រប់គ្រងពេលវេលាក៏ជាជំនាញមួយដ៏សំខាន់ផងដែរ។ ចូរពិចារណារបៀបធ្វើការដែលមានប្រសិទ្ធភាពបំផុត គិត​មើល​ថា ការងារណាធ្វើនៅពេលណាល្អ។

បន្ទាប់មក ពិចារណាពីរបៀបបង្កើនប្រសិទ្ធភាពការងាររបស់អ្នកក្នុងរយៈពេល ១ សប្តាហ៍ បន្ទាប់មកទៀតគឺ ១​ ខែ។ ការ​ងារ​ដែលស្រដៀងគ្នាគួរតែធ្វើក្នុងពេលតែមួយ ដើម្បីសន្សំសំចៃពេលវេលា។

គោរពតាម “Horenso”

នៅពេលដែលអ្នកកំពុងតែធ្វើការងារទាំងអស់ ហើយនិយាយថា ខ្លួនពិតជារវល់ណាស់ ប្រហែលជាអ្នកមិនអាចគ្រប់គ្រងពេលវេលារបស់ខ្លួនឲ្យមានប្រសិទ្ធភាព។

ប្រសិនបើអ្នកគ្រប់គ្រងពេលវេលាបានល្អ អ្នកអាចនឹងមានឳកាសពិចារណាទទួលយកការងារថ្មីបាន។ ប្រសិន​​បើ​​ការ​​ងារ​​ច្រើន​​ពេក ចូរ​ពិភាក្សា​ជា​មួយ​​ថ្នាក់​​លើ ហើយ​សម្រេចថាការងារណាត្រូវធ្វើមុនគេ។

មនុស្សជាច្រើនតែងតែរំលងចំណុចដែលខ្លួនមិនយល់ បន្ទាប់មកទុកចោលការងារ ហើយ​និយាយ​ថា​ខ្លួន​រវល់។ ដូច្នេះ ហេតុ​អ្វី​​យើង​​មិន​រាយការណ៍​ពី​ស្ថានភាពឲ្យបានលឿន ដើម្បី​ដោះស្រាយ​បញ្ហា​ជាមួយគ្នា?

នៅពេលដែលអ្នកអាចអនុវត្តចំណុចទាំង ៣ នេះល្អ ប្រសិទ្ធភាពការងាររបស់អ្នកនឹងប្រសើរឡើង ហើយ​នាំ​មុខ​មិត្ត​រួម​​ការ​​ងារ។ ប្រសិនបើប្រាក់ខែរបស់អ្នកនៅតែមិនឡើង អ្នកគួរតែពិចារណាប្តូរ​ការងារ​។

ព្រោះបើអ្នកជាមនុស្សដែលមាន​សមត្ថភាព ក្រុមហ៊ុនមួយណាក៏សុខចិត្តជួលអ្នកដោយប្រាក់ខែខ្ពស់ដែរ។ ដូច្នេះជាជាងការទម្លាក់កំហុសក្រុមហ៊ុនមិនដំឡើងប្រាក់ខែ ចូរអ្នកខំប្រឹងក្លាយទៅជាមនុស្សដែលមានសមត្ថភាពពិតក្នុងការ​ងារ​ជា​មុន​សិន។

Abe Kengo