អាថ៌កំបាំង​នៃ​កម្លាំង​ដ៏​ខ្លាំង​របស់​អ្នក​ចំបាប់ Sumo ដែល​​អ្នក​​មិន​​នឹក​​ស្មាន

“លោកបងម៉ាប់អើយ បងមើលទៅសុខភាពមិនល្អទាល់តែសោះ”

នេះជាគំនិតធម្មតារបស់មនុស្សជាច្រើននៅពេលដែលឃើញអ្នក​ចំបាប់​ Sumo ​ដែលមានរាងកាយធ្ងន់ធ្ងរ។

តាមពិតទៅ ពួកគេមានសុខភាពល្អខ្លាំងណាស់។ ដូច្នេះហើយ ថ្ងៃនេះខ្ញុំនឹងបង្ហាញពីសមត្ថភាព​ដ៏​អស្ចារ្យ​របស់​អ្នក​ចំបាប់ Sumo ដល់​អ្នក​រាល់​គ្នា។

តើ Sumo ជាអ្វី?

Sumo គឺជាកីឡាជាតិនៃប្រទេសជប៉ុន ក្នុងការប្រកួត អ្នកចំចាប់ឬគេហៅថា “Rikishi” នឹងស្លៀកក្រណាត់ “Mawashi” ដែល​​ចង​​នៅ​​ចង្កេះ និង​​ជើងទាំងពីរ។ អ្នកចំបាប់ទាំងពីរខំប្រឹងរុញគូប្រកួតចេញពីសង្វៀន ឬបង្ខំគូប្រកួត​ឲ្យ​ប៉ះ​ដី​ដោយ​ផ្នែកណាមួយលើរាងកាយ លើកលែងតែបាតជើង។

រាងកាយរបស់អ្នកចំបាប់ Sumo

អ្នក​ចំបាប់ Sumo ទាំងអស់​មានមាឌធំ ប៉ុន្តែតាមពិតទៅបរិមាណខ្លាញ់ក្នុងរាងកាយរបស់ពួកគេទាបណាស់។

សម្រាប់បុរសធម្មតាម្នាក់ ភាគរយខ្លាញ់ក្នុងរាងកាយចាប់ពី ២៥% ឡើងទៅ ទើបគេចាត់ទុកថាធាត់។ ប៉ុន្តែបរិមាណ​ខ្លាញ់​ជា​មធ្យមរបស់អ្នកចំបាប់ស៊ូម៉ូមានត្រឹមតែ ២០% ប៉ុណ្ណោះ ដូច្នេះមិនចាត់ទុកថាធាត់ឡើយ។

ដូច្នេះតើរាងកាយរបស់អ្នកចំបាប់ Sumo មានសាច់ដុំច្រើនដូចនេះឬ?

ជាការពិតណាស់ អ្នកចំបាប់ Sumo ជាបុគ្គលដែលមានសាច់ដុំច្រើនមិនចាញ់កំពូលអត្តពលិកឡើយ។ សាច់ដុំក្នុងរាង​កាយ​របស់អ្នកចំបាប់ Sumo គ្រប់ល្មមអាចលើកគូប្រកួតដែលមានទម្ងន់ជាង ១៥០ គីឡូក្រាម។

មូលហេតុ​ដែលអ្នកចំបាប់ Sumo រើសយកមាឌធំ

ចំពោះក្បាច់គុនផ្សេងទៀត គេច្រើនតែផ្តោតទៅលើការវិវឌ្ឍន៍សាច់ដុំស្មា ទ្រូង និងពោះក្នុងទម្រង់ត្រីកោណបញ្ច្រាស។

យ៉ាងណាមិញ ចំពោះកីឡា Sumo បែរជាផ្តោតសំខាន់លើការអភិវឌ្ឍសាច់ដុំពោះ និងជើងទាំងពីរតាមទម្រង់ត្រីកោណសមបាត។ ទោះបីជាមិនអាចនិយាយបានថា នេះជារូបរាងដែលមនុស្សជាច្រើនប្រាថ្នា ប៉ុន្តែពិបាកយកឈ្នះណាស់ បើ​សិន​ជា​មិន​មាន​រាង​កាយ​បែប​នេះ។

ថ្វីត្បិតតែ ការអភិវឌ្ឍន៍សាច់ដុំតាមទម្រង់ត្រីកោណបញ្ច្រាស អាចជួយឲ្យអ្នកគេចផុតពីការវាយប្រហាររបស់គូប្រកួត​បាន​យ៉ាង​ងាយ ប៉ុន្តែចំណុចខ្សោយគឺថាអ្នកអាចនឹងបាត់បង់លំនឹង។ ផ្ទុយនឹងទម្រង់ “ត្រីកោណសមបាត” មិន​ងាយ​ផ្តួល​អ្នក​ចំបាប់ Sumo នោះទេ។

ហេតុអ្វី​បាន​ជា​ទម្ងន់​សំខាន់ខ្លាំងក្នុងការប្រកួតអ្នកចំបាប់ Sumo ?

ការ​ប្រកួត Sumo មិនបែងចែកទម្ងន់ដូចក្នុងការ​ប្រដាល់​នោះ​ទេ ដូច្នេះបើសិនជាអ្នកចំបាប់ Sumo មាន​ទម្ងន់កាន់តែធ្ងន់ អាចនឹងមានប្រៀបក្នុងការប្រកួត។

របៀបប្រកួតក្នុងកីឡា Sumo គឺចូលជិតគូប្រកួត ដោយប្រើកម្លាំងទាំងអស់តាំងពីដើម។ ប្រសិនបើទម្ងន់របស់អ្នក​ស្រាល​ជាង​គូប្រកួត ងាយនឹងត្រូវគេលើកបោះចេញពីរង្វង់ ហើយចាញ់យ៉ាងលឿន។

ដោយសារការប្រកួតមិនដូចជាកីឡាដទៃទៀត ដូច្នេះអ្នកចំបាប់ Sumo ត្រូវ​បាន​ហ្វឹក​ហាត់​ដោយរបប​អាហារ​ច្រើន និងលំហាត់សាច់ដុំយ៉ាងតឹងរឹង។

កម្លាំងកាយមិនធម្មតា

ជាទូទៅការប្រកួតអ្នកចំបាប់ Sumo តែងតែបញ្ចប់ក្នុងរយៈពេលមួយនាទី ដូច្នេះការចូលទៅជិតគឺសំខាន់បំផុត។ ព្រោះ​​វា​​ប្រៀប​​ដូច​​ជា​​កម្លាំង​​ភ្លាមៗ​​ដែល​អាចបង្កើតកម្លាំងដ៏ធំ។

អ្នកចំបាប់ដែលមានឈ្មោះថា Hakuho បានរត់សាប់ក្នុងចម្ងាយជិត ជាមួយនឹងល្បឿនជិតស្មើនឹង Usain Bolt ដែលជាអ្នករត់សាប់លេខមួយលើពិភពលោក។ ថ្វីត្បិតតែ មានមាឌធំ ប៉ុន្តែគេនិយាយថា គ្មានបុរសធម្មតាណាម្នាក់អាចយកឈ្នះគាត់ក្នុងវិញ្ញាសារត់សាប់ចម្ងាយជិតនោះទេ។ ក្រៅពីនេះ ក៏មានអ្នកចំបាប់ Sumo មួយចំនួនអាច​​លោត​​ក្រឡាប់​​ក្បាល​​ចុះ ឬ​​ដាំ​​ដូង​​ផង​​​ដែរ។

មិនត្រឹម​តែប៉ុណ្ណឹង កម្លាំងដៃរបស់អ្នកចំបាប់ Sumo ក៏ខ្លាំងណាស់ដែរ។ គេមិនអាចវាស់ស្ទង់កម្លាំងកណ្តាប់ដៃរបស់​អ្នក​ចំបាប់ Sumo នោះទេ ព្រោះរង្វាស់ទម្ងន់ ១០០ គីឡូក្រាមទាំងដៃឆ្វេង និងស្តាំ។ កម្លាំងដៃនេះត្រូវគេចាត់ទុក​ថា​ខ្លាំងជាងបុរស​ពេញវ័យពីរ​ដង និង​ខ្លាំង​ជាង​មនុស្ស​ស្រី​ដល់​ទៅ​បួន​ដង។

ជាមួយនឹងកម្លាំងដៃប្រហែល ៧០ គីឡូក្រាម មនុស្សម្នាក់អាចកំទេចផ្លែប៉ោមមួយ។ ដូច្នេះជាមួយនឹងកម្លាំងដៃជាង ១០០ គីឡូក្រាម អ្នកចំបាប់ Sumo អាចនឹងធ្វើឲ្យនរណាម្នាក់បាក់ឆ្អឹង។

តើអ្នកនឹងធ្វើអ្វីបើសិនជាប្រឈមមុខនឹងអ្នកចំបាប់ Sumo ?

ដំបូន្មានដ៏ស្មោះរបស់ខ្ញុំគឺថា អ្នកគួរតែរត់ចេញឲ្យលឿនតាមដែលអាចធ្វើទៅបាន។ ព្រោះបើប្រកួត “មួយទល់នឹងមួយ” ជាមួយ​អ្នក​ចំបាប់ Sumo អ្នក​ប្រាកដជា​ទទួលលទ្ធផល​គួរ​អាណិតជាមិនខាន។

ការប្រកួត Sumo ហាក់ដូចជាមិនផ្អែកលើយុទ្ធសាស្ត្រស៊ូទ្រាំនោះទេ ព្រោះលទ្ធផលត្រូវបានសម្រេចត្រឹម​ប៉ុន្មានវិនាទី​ដំបូង​នៃ​ការ​ប្រកួត ដូច្នេះអ្នកចំបាប់ Sumo មិនហ្វឹកហាត់កម្លាំងកាយច្រើនពេកឡើយ។

ដូច្នេះ មធ្យោបាយដែលល្អបំផុតនៅពេលប្រឈមមុខនឹងពួកគេ គឺត្រូវរត់ឲ្យលឿនតាមដែលអាចធ្វើទៅបាន រហូតដល់ពួកគេអស់កម្លាំង។ ជាការពិតណាស់ អ្នកក៏គួរតែចាប់អារម្មណ៍លើសមត្ថភាពបង្កើនល្បឿនក្នុងចម្ងាយជិត ប្រសិន​បើ​មិន​ចង់ឲ្យគេ​ចាប់​បាន។

ជាចុងក្រោយ ចូរយើងក្រឡេកមើលអ្នកចំបាប់ Sumo ដែលមានប្រជាប្រិយភាពគឺ Chiyonofuji ។

ចូរក្រឡេកមើលសាច់ដុំរបស់គាត់ គាត់ប្រហែលជាឈានដល់កម្រិត “សត្វចម្លែក” ទៅហើយ។ ព្រោះទម្ងន់ជាមធ្យមរបស់អ្នកចំបាប់ Sumo ប្រហែល ១៥០ គីឡូក្រាម ដូច្នេះគាត់មើលទៅតូចជាងអ្នកចំបាប់ផ្សេងទៀត ដោយទម្ងន់ត្រឹម​តែ ១២០ គីឡូក្រាម​ប៉ុណ្ណោះ។

Chiyonofuji ធ្លាប់មានបញ្ហារាងកាយ ដោយស្មាឆ្វេងរបស់គាត់ងាយនឹងគ្រេច ដូច្នេះគាត់បានបង្កើតគំនិតថា៖ “បើសិនជាមានសាច់ដុំ ប្រហែលជាលែងគ្រេចសន្លាក់ទៀត” ។ គាត់បានចាប់ផ្តើមអាវ៉ង់ ៥០០ ដងក្នុងមួយថ្ងៃ ហើយ​បន្ត​កំណត់​គោល​ដៅ​ខ្ពស់​សម្រាប់​ខ្លួន​ឯង។

លទ្ធផលគាត់បានហ្វឹកហាត់រាងកាយដែលមានបរិមាណខ្លាញ់ត្រឹម ១០.៣% ស្មើនឹងកីឡាករបាល់ទាត់អាជីព ប៉ុន្តែមាឌធំជាងដល់ទៅពីរដង។ ជាអកុសល គាត់បានទទួលមរណៈភាពនៅអាយុ ៦១ ឆ្នាំ ប៉ុន្តែគាត់ស្ថិតក្នុងការចងចាំជា​និច្ច ដូច​ជា​បុគ្គល​ប្រវត្តិសាស្រ្ត​ដែល​តំណាងឲ្យពិភព Sumo របស់ជប៉ុន។

ការប្រកួត Sumo ពិតជាគួរឲ្យខ្លាចជាជាងការមើលឃើញ ព្រោះវាបង្កប់កម្លាំងដែល​មិន​មែន​គ្រប់​កីឡា​ទាំងអស់សុទ្ធតែមាននោះទេ។ ប្រសិនបើអ្នកមានឱកាសទៅប្រទេសជប៉ុន អ្នកប្រាកដជាចាប់អារម្មណ៍យ៉ាងខ្លាំងពេលទស្សនា​ការ​ផ្សាយ​ផ្ទាល់​ការ​ប្រកួត Sumo ។

Abe Kengo