តើសាមូរ៉ៃមានសិទ្ធិសម្លាប់មនុស្សតាមតែអំពើចិត្តដែរទេ?

ថ្ងៃព្រហស្បតិ៍ 07/09/2023 | 18:46 ល្ងាច

ក្នុងខ្សែភាពយន្ត នៅពេលខ្លះមានឈុតឆាកសាមូរ៉ៃប្រើដាវកាប់ប្រជាជនក្នុងទីប្រជុំជន។ ដូច្នេះ តើសាមូរ៉ៃតែងតែយកដាវតាមខ្លួន ហើយអាចកាប់មនុស្សដោយសេរីគ្រប់ពេលមែនទេ?

តាមពិតទៅធ្លាប់មានបទប្បញ្ញត្តិពិសេសដោយឡែកសម្រាប់សាមូរ៉ៃ ដែលគេហៅថា Kirisutegomen ។ នេះជាបទប្បញ្ញត្តិដ៏គួរឲ្យខ្លាចដោយចែងសាមូរ៉ៃអាចវាយប្រហារនរណាម្នាក់។ ឧទាហរណ៍ក្នុងស្ថានភាពខាងក្រោមនេះ សាមូរ៉ៃមានសិទ្ធិវាយប្រហារអ្នកយ៉ាងត្រឹមត្រូវ។

ឧបមាថាអ្នកជាមនុស្សម្នាក់ស្ថិតក្នុងវណ្ណៈកសិករ នៅពេលដែលមានសាមូរ៉ៃដើរឆ្លងកាត់ អ្នកនិយាយអាក្រក់ពីគាត់ជាមួយនឹងមនុស្សនៅក្បែរខ្លួនថា៖

“សាមូរ៉ៃរូបនោះអាក្រក់ណាស់ មើលទៅមិនដូចមនុស្សទាល់តែសោះ” ។

ថ្វីត្បិតតែ អ្នកនិយាយខ្សឹបៗ ប៉ុន្តែបើសិនជាគាត់ស្តាប់បាន អ្នកអាចនឹងត្រូវគាត់កាប់សម្លាប់ដោយមិនទទួលបានការការពារពីច្បាប់ឡើយ។ ព្រោះតែមានបទប្បញ្ញត្តិចំនួន ៥ សម្រាប់ករណីដែលសាមូរ៉ៃត្រូវបានអនុញ្ញាតឲ្យសម្លាប់មនុស្ស។

១. ត្រូវប្រមាថ
ទោះបីជាអ្នកមិនបានវាយប្រហារសាមូរ៉ៃក៏ដោយ ពួកគេនៅតែអាចវាយប្រហារអ្នក ប្រសិនបើអ្នកប្រមាថពួកគេ។

២. អាចវាយប្រហារក្រោយពេលរងការប្រមាថ
សាមូរ៉ៃមិនអាចចងកំហឹង ហើយក្រោយមកទើបរកអ្នកសងសឹកនោះទេ។

៣. ត្រូវសម្លាប់ភាគីដោយកាប់មួយដាវ
នៅពេលដែលអ្នកមិនមានអាវុធ សាមូរ៉ៃត្រូវបញ្ចប់ជីវិតរបស់អ្នកត្រឹមមួយដាវ។ ប្រសិនបើលើកដាវច្រើនដង សាមូរ៉ៃនឹងត្រូវចោទប្រកាន់ពីបទមនុស្សឃាត។

៤. ត្រឹមតែអាចប្រើដាវ wakizashi ប៉ុណ្ណោះ
អាវុធសំខាន់របស់សាមូរ៉ៃគឺដាវជប៉ុនវែង ប៉ុន្តែពួកគេត្រូវហាមមិនឲ្យប្រើសម្រាប់ដោះស្រាយជម្លោះផ្ទាល់ខ្លួនឡើយ។ ផ្ទុយទៅវិញ ពួកគេអាចប្រើតែដាវខ្លីដែលហៅថា Wakizashi ប៉ុណ្ណោះ។

៥. ត្រូវមានអ្នកធ្វើសាក្សី
បើប្រជាជនក្នុងក្រុងត្រូវសម្លាប់ដោយសារតែឈ្លោះប្រកែកគ្នា ប្រាកដជាមានការមិនពេញចិត្ត។ ដូច្នេះហើយ ត្រូវមានអ្នកមើលឃើញដើម្បីរាយការណ៍ប្រាប់អាជ្ញាធរ។

នៅពេលនោះ ដាវរបស់សាមូរ៉ៃត្រូវរឹបអូសជាបណ្ដោះអាសន្ន និងត្រូវប្រគល់វិញ ប្រសិនបើអាចកំណត់ថា នោះជាមូលហេតុត្រឹមត្រូវ។ ចំណែកឯសាមូរ៉ៃត្រូវឃុំខ្លួនរហូតដល់ការស៊ើបអង្កេតមានលទ្ធផល។

ថ្វីត្បិតតែ សាមូរ៉ៃមិនអាចកាប់មនុស្សតាមអំពើចិត្តក៏ដោយ ប៉ុន្តែពួកគេអាចសម្លាប់មនុស្សដោយយោងទៅតាមបទប្បញ្ញត្តិតឹងរឹងសម្រាប់សាមូរ៉ៃ។ បើមើលលើទស្សនៈរបស់អ្នកស្លាប់ និងក្រុមគ្រួសារ បទប្បញ្ញត្តិមួយនេះពិតជាបង្កការមិនពេញចិត្តសម្រាប់ប្រជាជនធម្មតា។

ដូច្នេះបើសិនជាអ្នកឆ្លងទៅសម័យសាមូរ៉ៃ អ្នកកុំសួរសំណួរដូចជា “ហេតុអ្វីម៉ូដសក់នឹងមើលទៅគួរឲ្យអស់សំណើចម្ល៉េះ?” ប្រាកដជាជួបបញ្ហាធំជាមិនខាន។

Abe Kengo