តើ​យើង​អាច​ប្រើ​ដាវ​ជប៉ុន​ដោយ​ដៃ​ម្ខាង​ដើម្បី​កម្ចាត់​សត្រូវ​បាន​ទេ?

ប្រហែលជាអ្នកទាំងអស់គ្នាធ្លាប់ឃើញឈុតឆាកតួអង្គក្នុងរឿងដកដាវជប៉ុនដោយដៃម្ខាង ឬដៃមួយកាន់ដាវមួយ។ ប៉ុន្តែជាក់ស្តែង តើយើងអាចកាន់​ដាវ​ជប៉ុន​បាន​យ៉ាង​ងាយ​ស្រួល​បែប​នេះដែរទេ?

ដាវជប៉ុនមានទម្ងន់ធ្ងន់

មិនដូចជាដាវនៅបណ្តាប្រទេសផ្សេងទៀតទេ លក្ខណៈនៃដាវ​ជប៉ុន​គឺ​ស្តើង និង​មាន​ភាព​ល្អិតល្អន់​បំផុត។ ទោះជាយ៉ាងនេះក្តី ដាវមានទម្ងន់ពី ១ ទៅ ១,៥ គីឡូក្រាម ប្រសិនបើមនុស្សម្នាក់មានកម្លាំងកាយល្អ ពិតណាស់គេអាចដកដាវដោយដៃម្ខាង ប៉ុន្តែបើធ្វើដូច្នេះពិបាកបង្ករបួសលើភាគីណាស់។

របៀបវាយលុករហ័ស

មានក្បាច់មួយគឺលើកដាវប្រហារដោយដៃម្ខាងបន្ទាប់ពីដកដាវចេញភ្លាមៗ ដោយគេចាត់ទុកជាការវាយប្រហារដែល​​លឿន​​បំផុត ព្រោះវាអាចធ្វើឲ្យគូប្រកួត​រង​របួសអំឡុងពេលដកដាវ។ ថ្វីត្បិតតែការវាយប្រហារនេះមានគ្រោះថ្នាក់ ប៉ុន្តែ​​វា​មិន​អាចបង្កគ្រោះថ្នាក់ដល់ជីវិត​គូប្រកួត​ឡើយ។ ដូច្នេះគោលបំណងនៃការវាយប្រហារដោយដៃម្ខាងបែបនេះ គ្រាន់​តែ​ធ្វើឲ្យគូ​ប្រកួត​​ភ្ញាក់​ផ្អើល​​ប៉ុណ្ណោះ។

វិធីកម្ចាត់សត្រូវដោយដាវជប៉ុន

ក្នុងរឿងតែងតែមានឈុតឆាកទាហានសត្រូវត្រូវកាត់ដាច់ក្បាល ឬដៃ ប៉ុន្តែតាមពិតទៅ ក និងដៃមនុស្សមិនទន់ដូចនេះទេ ព្រោះនៅមានឆ្អឹង ដូច្នេះបើប្រើតែដៃម្ខាងមិនអាចទៅរួចឡើយ។ ដូច្នេះហើយ ទើបសាមូរ៉ៃកាលពីសម័យមុនតែងតែប្រើការវាយប្រហារដោយដៃម្ខាងភ្លាមៗ បន្ទាប់មកប្រើ​ដៃ​ទាំង​ពីរ​ដើម្បី​កម្ចាត់​សត្រូវ។

ការប្រើប្រាស់ដាវដោយដៃទាំងពីរ

មានសាមូរ៉ៃម្នាក់ឈ្មោះ Miyamoto Musashi លោកត្រូវគេចាត់ទុកជាសាមូរ៉ៃដែលខ្លាំងបំផុត និងមានកម្ពស់រហូតដល់ ១៨០ សង់ទីម៉ែត្រ។ ខណៈដែលសម័យនេះ កម្ពស់ជាមធ្យមរបស់បុរសជប៉ុនត្រឹម ១៥៥ សង់ទីម៉ែត្រប៉ុណ្ណោះ ដូច្នេះ​គាត់មើលទៅមាឌធំខ្ពស់។ ដោយសារមូលហេតុ​នេះ ទើបលោក Miyamoto មានកម្លាំងដែលមិនអាចប្រៀបផ្ទឹម​បាន ដូច្នេះការដែលប្រើដាវពីរក្នុងពេលតែមួយ គ្នានអ្វីពិបាកសម្រាប់គាត់ឡើយ។

ក្នុងគន្លឹះដាវរបស់ខ្លួន លោកតែងតែលើកទឹកចិត្តគ្រប់គ្នាប្រើក្បាច់ដាវពីរ។ ប៉ុន្តែចំណុចនេះហាក់ដូចជាពិបាកសម្រាប់​មនុស្ស​គ្រប់​គ្នា ចំណែកឯកំណត់ត្រាផ្សេងទៀត ច្រើនតែនិយាយពីអ្នកប្រើដាវតែមួយ។

ព្រោះជាក់ស្តែង ការប្រើប្រាស់ដាវដោយដៃទាំងពីរមិនសមនឹងការប្រយុទ្ធឡើយ។ មាន​ឃ្លាមួយក្នុងពាក្យប្រដៅរបស់លោក Miyamoto Musashi និយាយថា៖

“ការដែលប្រើដាវពីរ ជារបៀបហ្វឹកហាត់ជំនាញក្នុងការប្រើប្រាស់ដាវដោយដៃទាំងពីរ” ។

ដូច្នេះ​ពេល​មាន​អាសន្ន យើង​អាច​ប្រើ​ដាវ​បាន​មិនថាដៃស្តាំ ឬដៃឆ្វេងឡើយ។ ហើយនៅពេលដែលដៃម្ខាងរងរបួស យើងនៅតែអាច​សង្គ្រោះ​ជីវិត​របស់​ខ្លួន។

អត្តន័យដែលសាមូរ៉ៃតែងតែយកដាវពីរតាមខ្លួន

សាមូរ៉ៃតែងតែបំពាក់ដាវពីរត្រង់ចង្កេះ ទោះបីជាពួកគេប្រើដាវតែមួយ។ រួមមានដាវវែង katana និងដាវខ្លីហៅថា wakizashi ដោយគោលបំណង​សម្រាប់ការពារនៅពេលដែលដាវ katana ខូច នៅតែមានដាវខ្លីសម្រាប់ការពារខ្លួន។

ដូច្នេះ ប្រហែលជាមនុស្សជាច្រើនតែងតែគិតថា សាមូរ៉ៃមើលទៅពិតជាឡូយណាស់ ព្រោះពេលណាក៏អាចប្រើដាវជប៉ុន​ពីរ ប៉ុន្តែ​​ជាក់​​ស្តែង ប្រហែល​ជា​មាន​តែអ្នកដែលមានកម្លាំងខ្លាំងដូច Miyamoto ទើបអាចធ្វើបាន។

Abe Kengo