រាត្រី​អវសាន​បាន​​ឆក់​​យក​​ជីវិត​​របស់​ប្រជា​ជន​ជប៉ុន​យ៉ាង​ច្រើន​បំផុត​​ក្នុង​​ប្រវត្តិ​សាស្ត្រ

ប្រហែលជាយើងដឹងហើយថា ប្រជាជនជប៉ុនបាត់បង់ជីវិតអំឡុងពេលសង្គ្រាមលោកលើកទី ២ មានចំនួនច្រើន។ ដូច្នេះ​តើ​អ្នក​ដឹង​ទេ​ថា​ព្រឹត្តិ​ការណ៍​អ្វីដែលបានសម្លាប់ប្រជាជនជប៉ុនច្រើនបំផុតត្រឹមរយៈពេលមួយថ្ងៃដែរទេ?

ភាគច្រើនអ្នកទាំងអស់គ្នាគិតថា មកពីព្រឹត្តិការណ៍ទម្លាក់គ្រាប់បែកនុយក្លេអ៊ែរលើទីក្រុង Hiroshima និង Nagasaki ដែល​បណ្តាល​ឲ្យមនុស្សជាង ៥០ ម៉ឺននាក់បាត់បង់ជីវិត។ យ៉ាងណាមិញ នេះមិនមែនជាចំនួនអ្នកដែលបាន​ស្លាប់នៅពេលដែលទម្លាក់គ្រាប់បែកនុយក្លេអ៊ែរនោះទេ ប៉ុន្តែចំនួននេះរួមទាំងអ្នកដែលបានស្លាប់ជាច្រើនថ្ងៃ​ក្រោយ​មក។

ព្រឹត្តិការណ៍ដែលខ្ញុំចង់និយាយកើតឡើងនៅទីក្រុង Tokyo ។ អាមេរិកបានប្រើប្រភេទអាវុធដែលគេហៅថាគ្រាប់​បែក napalm ដែលជាសារធាតុដូចជាចាហួយផលិតឡើងពីប្រេងសាំង នៅពេលដែលធ្លាក់ចុះដី ប្រភេទគ្រាប់បែក napalm នេះ​នឹង​រីករាលដាលលើផ្ទៃដី ហើយឆាបឆេះយ៉ាងខ្លាំង។

នៅយប់នោះ ខ្យល់បក់ខ្លាំងនាំយកសមុទ្រភ្លើងដុតបំផ្លាញទីក្រុង Tokyo ទាំងមូល។ គ្រាប់បែក napalm រអិលខ្លាំង ដូច្នេះពិបាកពន្លត់ភ្លើងណាស់ មិនថាមានទឹកក៏ដោយ។ ប្រជាជនជប៉ុនបាន​លោត​ចូល​ទឹក​ទន្លេ​ដើម្បីគេចពីភ្លើង ប៉ុន្តែគ្រាន់តែជាភាពអស់សង្ឃឹមប៉ុណ្ណោះ។

ដោយសារតែប្រជាជនមិនដឹងពីស្ថានភាព ដូច្នេះបានប្រញាប់ប្រញាល់លោតចូលទន្លេ។ លទ្ធផលមនុស្សជាច្រើនត្រូវជាន់ថប់ដង្ហើមរហូតដល់ស្លាប់ពេលកំពុងរត់ចេញទៅទន្លេ ចំណែកអ្នកផ្សេងទៀតនៅក្នុងទីក្រុងត្រូវភ្លើងឆាបឆេះយ៉ាងសន្ធោសន្ធៅទាំងមិនអាចពន្លត់បាន។

ជីដូនរបស់ខ្ញុំដែលនៅទីក្រុង Tokyo បាននិយាយថា នៅពេលដែលយាយចេញទៅទន្លេទាំងព្រឹកនាថ្ងៃបន្ទាប់ គាត់បានឃើញទិដ្ឋភាពដ៏រន្ធត់មួយ សាក​សព​មនុស្ស​យ៉ាង​ច្រើន និងមិនមើលឃើញផ្ទៃទឹកឡើយ។

នៅប្រទេសជប៉ុនផ្ទះភាគច្រើនធ្វើពីឈើ ដូច្នេះចំណុចខ្សោយស្ថិតនៅលើភ្លើង។ មនុស្សជាង ១០ ម៉ឺននាក់បាត់បង់ជីវិតត្រឹមរយៈពេលមួយថ្ងៃ ដោយការវាយប្រហារតាមអាកាសលើទីក្រុងតូក្យូ។

នេះជារូបភាពដែលថតនៅទីក្រុងតូក្យូក្រោយការវាយប្រហារនោះ។ អ្នកអាចមើលឃើញថា ត្រឹម​រយៈពេលមួយយប់ទីក្រុងទាំងមូលស្ទើរតែត្រូវបំផ្លាញ។ សមុទ្រភ្លើងបាន​លេប​ត្របាក់​ទីក្រុង​តូក្យូ ដែលបណ្តាលឲ្យមានជម្ងឺផ្សិតខ្មៅ ហើយ​ធ្វើ​ឲ្យ​ផ្ទៃ​មេឃ​នៃ​ទីក្រុង​តូក្យូខ្មៅងងឹតដូចជាថ្ងៃអវសាន។

តាមពិតទៅ នៅទីក្រុងតូក្យូមានតែរោងចក្រតូចមួយផលិតអាវុធសម្រាប់យោធាជប៉ុនប៉ុណ្ណោះ។ យ៉ាងណាមិញ ការវាយប្រហារនេះផ្តោតសំខាន់លើតំបន់លំនៅដ្ឋាន ហើយមិនខុសពីអំពើប្រល័យពូជសាសន៍ដែលពិភពលោកហាមឃាត់នោះទេ។

អាមេរិក​តែងតែ​និយាយ​ថា “យើង​ត្រូវ​បញ្ចប់​សង្គ្រាមឆាប់ៗ​” ប៉ុន្តែជាក់ស្តែងដូចនេះដែរទេ? នៅពេលនោះ យន្ត​ហោះ​យោធា​អាមេរិកបានហោះដោយសេរីលើផ្ទៃមេឃជប៉ុន ដូច្នេះបរាជ័យរបស់ជប៉ុនគឺមិនយូរទេ។ តើចាំបាច់ទេដែល​ត្រូវ​សម្លាប់​ប្រជាជន​ដើម្បី​​បញ្ចប់​​សង្គ្រាម?

សូម្បីតែសព្វថ្ងៃនេះ នៅពេលដែលពិភពលោកកំពុងតែបន្តសង្គ្រាម បើទោះបីជាមានសន្ធិសញ្ញាមនុស្សធម៌ក៏ដោយ ក៏ស្ថានភាពជាក់ស្តែងមិនខុសគ្នាប៉ុន្មានឡើយ។ ដូច្នេះហើយ ចូរយើងឲ្យតម្លៃជីវិតមនុស្សម្នាក់ៗ ដើម្បីរួមចំណែកកសាង​ពិភព​លោក​​ដែល​​គ្មាន​​សង្គ្រាម និង​​ការ​ឈឺ​ចាប់​។

Abe Kengo