ទំនាក់​ទំនង​រវាង​ព្រះ​ច័ន្ទ​ជា​មួយ​នឹង​វប្បធម៌​នៃ​ប្រទេស​ជប៉ុន

ព្រះច័ន្ទតែងតែបង្ហាញខ្លួននៅក្នុង Shinto ដែលជាសាសនាបុរាណរបស់ជប៉ុន។ ដូច្នេះហើយ ចំណុចនេះប្រហែលជាមូល​ដ្ឋាន​នៃ​ការ​កកើត​វប្បធម៌ដែលទាក់ទងនឹងព្រះច័ន្ទ។

អាទិទេពគ្រប់គ្រងភាពងងឹត Tsukuyomi no Mikoto

នេះជាអាទិទេពមួយរូបដែលកើតចេញពីអាទិទេព Izanagi no Mikoto ដែលជាអាទិទេពមួយអង្គដែលបានបង្កើត​ប្រទេស​ជប៉ុន (ឬអាចនិយាយបានថាពិភពលោក)។ អាទិទេព Tsukuyomi no Mikoto ត្រូវគេចាត់ទុកជាអាទិទេព​គ្រប់​គ្រង​ភាព​​ងងឹត។

ក្នុងចំណោមបងប្អូន ៣ នាក់ បងប្រុសច្បង Amaterasu Omikami ជាអាទិទេពដែលតំណាងឲ្យព្រះអាទិត្យ។ ចំណែក​ប្អូន Susano no Mikoto ជាអាទិទេពគ្រប់គ្រងសមុទ្រ និងទឹកដី។ អាទិទេពទាំងបីអង្គត្រូវបានគោរពបូជាព្រោះ​តែ​អំណាច​ការ​ពារ​ពិភព​លោក។

នៅពេលរាត្រីក្របដណ្តប់ដោយភាពងងឹត ប៉ុន្តែចំណុចនេះមិនតំណាងឲ្យអំពើអាក្រក់នោះទេ។ សាសនានៅបណ្តាប្រទេសជាច្រើនទៀតមិនចូលចិត្តភាពងងឹត ប៉ុន្តែ Shinto បែរជាចាត់ទុកពន្លឺ និងភាព​ងងឹត​ដូច​ជា​វត្តមានមួយ។

ដូច្នេះបើសិនជាគ្មានភាពងងឹត នោះពន្លឺក៏មិនមានដែរ និងផ្ទុយមកវិញ។ ដូច្នេះគ្រប់គ្នាមិនចាត់ទុកភាពងងឹតជា​អ្វី​ដែល​គួរ​ឲ្យខ្លាចនោះទេ ប៉ុន្តែគ្រាន់តែគិតយ៉ាងសាមញ្ញថា វត្តមានរបស់វាជាចំណុចស្របនៃធម្មជាតិ។

រូបតំណាងរបស់ព្រះច័ន្ទនាពេលរាត្រី

ព្រះច័ន្ទតែងតែបញ្ចេញពន្លឺបំភ្លឺនៅពេលយប់ ដូច្នេះពួកគេថែមទាំងជឿថា ពន្លឺនោះអាចនាំទៅកាន់ពិភពរបស់មនុស្សស្លាប់។ យ៉ាងណាមិញ តាមទស្សនៈគំនិតបុរាណរបស់ប្រជាជនជប៉ុនមិនគិតអវិជ្ជមានចំពោះសេចក្តីស្លាប់ដូចប្រទេសដទៃទៀតឡើយ ដូច្នេះព្រះច័ន្ទមិនមែនជាវត្ថុដែលនាំមកនូវថាមពលអវិជ្ជមានសម្រាប់មនុស្សនោះទេ។

រឿងរ៉ាវនិយាយពីដើមកំណើតរបស់ព្រះច័ន្ទ

នៅជប៉ុន Taketori Monogatari ត្រូវគេចាត់ទុកជារឿងបុរាណបំផុត។ សព្វ​ថ្ងៃ​នេះ រឿងនេះត្រូវបាននិយាយតៗគ្នាប្រាប់​កុមារ​ដោយ​មាន​ឈ្មោះ​ថា “Kaguya-hime” ។

លោកតាម្នាក់ដែល​ប្រកប​របរ​ចិញ្ចឹម​ជីវិត​ដោយ​រើស​ឬស្សី បានប្រទះឃើញក្មេងស្រីតូចម្នាក់បញ្ចេញពន្លឺក្នុងបំពង់​ឫស្សី។ នាងត្រូវបានដាក់ឈ្មោះថា Kaguya-hime ហើយចិញ្ចឹមបីបាច់យ៉ាងយកចិត្តទុកដាក់រហូតដល់ធំដឹងក្តី និង​សម្រស់​ស្អាត​​ខ្លាំង​ណាស់។

កេរ្តិ៍ឈ្មោះល្បីគ្រប់ទីកន្លែង យុវជន និងបុរស​អ្នកមាន​ជាច្រើន​បាន​មក​សុំ​ចូលស្តីដណ្តឹង Kaguya-hime ។ ប៉ុន្តែនាង​បែរ​ជា​ស្អប់​អាពាហ៍​ពិពាហ៍ ហើយនៅទីបំផុតក៏​សម្រេច​ចិត្ត​ត្រឡប់​ទៅ​ព្រះច័ន្ទ​វិញ។

មនុស្សជាច្រើនប្រហែលជាឆ្ងល់ថា Kaguya-hime អាចត្រឡប់ទៅព្រះច័ន្ទ តើនាងជាមនុស្សក្រៅភពឬ? ខ្ញុំមិនគិតដូច្នេះនោះទេ ប៉ុន្តែគិតថា នេះប្រហែលជាការរៀបរាប់របស់ប្រជាជននៅសម័យបុរាណ ដោយចង់និយាយថា នាងបាន​ស្លាប់​ប៉ុណ្ណោះ។

ចុះប្រទេសរបស់អ្នកវិញ? តើព្រះច័ន្ទមានតួនាទីយ៉ាងណាក្នុងជីវិតរបស់ប្រជាជន ជាពិសេសក្នុងរដូវបុណ្យសែនព្រះ​ខែ​ដែល​ជិត​មក​ដល់?

Abe Kengo