វិស័យ​ឧស្សាហកម្ម​រថយន្ត​ជប៉ុន​អាច​នឹង​បន្ត​ក្រោយ​បដិវត្តន៍​រថយន្ត​​អគ្គិសនី​នៅ​លើ​ពិភព​លោក​ដែរ​ទេ?

នៅពេលដែលវិស័យឧស្សាហកម្មរថយន្តចាប់កំណើតនៅឆ្នាំ ១៧៦៩ រហូតមកដល់សព្វថ្ងៃនេះ ការផ្លាស់ប្តូរឆ្ពោះទៅ​រក​រថយន្ត​អគ្គិសនី និង​បច្ចេក​វិទ្យា​បើក​បរ​ដោយ​ស្វ័យ​ប្រវត្តិ បាន​ក្លាយជាបដិវត្តន៍ដែលមិនធ្លាប់មានពីមុនមក។

ជាពិសេសប្រទេសជប៉ុន ដែលជាមហាអំណាចឧស្សាហកម្មរថយន្តកំពុងប្រឈមមុខនឹងបញ្ហាកំណែទម្រង់នេះ ខណៈ​ដែល​ក្រុម​ហ៊ុន​ធំ​ជា​ច្រើន​ដូច​ជា Tesla បានចូលរួមការអភិវឌ្ឍបច្ចេកវិទ្យារថយន្តអគ្គិសនី។

ក្នុងចំណោមក្រុមហ៊ុនជប៉ុន Sony ត្រូវគេរំពឹងថា មានលទ្ធភាពបង្កើតតុល្យភាពនៃអំណាចក្នុងវិស័យឧស្សាហកម្មរថយន្តអគ្គិសនីពិភពលោក ដោយសារក្រុមហ៊ុនកំពុងផលិតគ្រឿងបន្លាស់ទំនើបមានភាពលេចធ្លោនាពេលអនាគត។ ព្រោះ​តែ​គ្រឿង​បន្លាស់​ទាំង​នោះ​ដើរតួយ៉ាងសំខាន់ ដើម្បីជំនួសម៉ាស៊ីន​រថយន្ត​ធម្មតា។

ផ្នែកដែលចំណាយច្រើនបំផុតក្នុងការអភិវឌ្ឍន៍បច្ចេកវិទ្យារថយន្តគឺម៉ាស៊ីន ដែលអាចនឹងចំណាយ​រហូត​ដល់​រាប់​ពាន់​លាន​យ៉េន។ ក្រៅពីការចំណាយ កត្តាដែលសំខាន់ជាងនេះគឺវិស្វករជំនាញមានបទពិសោធន៍ច្រើនឆ្នាំ ប៉ុន្តែចំពោះ​រថយន្តអគ្គិសនី ចំណុចនេះមិនចាំបាច់ទេ ហើយមិនថាជាអ្នកថ្មីក៏​អាច​ចូល​រួម​ការ​អភិវឌ្ឍ​បច្ចេក​វិទ្យា​ដែរ។

បញ្ហានៃរថយន្តអគ្គិសនី

បច្ចុប្បន្ននេះ បញ្ហាមួយក្នុងចំណោមនោះគឺ មុខងារសាកថ្មពេញ និងចម្ងាយអតិបរមាដែលរថយន្តអាចធ្វើដំណើរ។ យ៉ាងណាមិញ បញ្ហានេះនឹងអាចដោះស្រាយបាននាពេលខាងមុខ។ ដូច្នេះហើយ បញ្ហាដែលសំខាន់បំផុតគឺអំឡុងពេល​សាក​ថ្ម​រថយន្ត។ សព្វថ្ងៃនេះ រថយន្ត​អគ្គិសនីដែលមាន​សមត្ថភាព​សាក​ថ្ម​លឿនយ៉ាងណាក៏ត្រូវចំណាយពេល ៧ ម៉ោង​​ដែរ បើធៀបនឹងរយៈពេលចាក់សាំងរថយន្តត្រឹម​ប៉ុន្មាន​នាទី​ប៉ុណ្ណោះ។

បើប្រៀបនឹងសមត្ថភាពសាកថ្ម ដើម្បីកាត់បន្ថយរយៈពេល មិនអាចយកទៅប្រៀបនឹងរថយន្តប្រើសាំងនោះទេ។ ប្រទេស​ចិន​ក៏កំពុងផលិតប្រភេទថ្មជំនួសដែរ ប៉ុន្តែមិនទាន់មាននរណាអាច​ធានា​គុណភាព​ថ្ម​ទាំងនោះឡើយ។

Hybrid គឺជាផ្លូវដែលក្រុមហ៊ុនផលិតរថយន្តជប៉ុនបានជ្រើសរើស

នោះគឺការប្រើម៉ាសុីនដែលរួមបញ្ចូលគ្នារវាងអគ្គិសនី និង​សាំង។ រថយន្តដែលខ្ញុំកំពុងប្រើនៅជប៉ុនក៏ប្រើបច្ចេក​វិទ្យា hybrid នេះ​ដែរ ដូច្នេះទើបម៉ាសុីនមានទំហំតូច ដោយសារម៉ូទ័រអគ្គីសនីផ្គត់ផ្គង់ថាមពល ជួយកាត់បន្ថយការប្រើប្រាស់ប្រេងឥន្ធនៈយ៉ាងខ្លាំង។

ជាមូលដ្ឋាន អ្នកគ្រាន់តែចាក់សាំង ហើយបន្ទាប់មករថយន្តនឹងរក្សាទុកថាមពលអគ្គិសនីដោយស្វ័យប្រវត្តិនៅ​ពេល​​ដែល​​ម៉ាស៊ីន​​ដំណើរ​​ការ។ គំរូរថយន្ត Prius របស់ Toyota ធ្លាប់ជារថយន្តដែលប្រើបច្ចេកវិទ្យា hybrid ដំបូងគេ​លើ​ពិភព​លោក។ ឥឡូវនេះ ជប៉ុនក៏ទទួលការចាប់អារម្មណ៍ពីពិភពលោក សម្រាប់ម៉ូដែលរថយន្តថ្មីដែលប្រើប្រាស់​បច្ចេក​វិទ្យា​នេះ។

ទោះជាយ៉ាងណា ទាក់ទងនឹងវិធានការកាត់បន្ថយការឡើងកំដៅផែនដី ពិភពលោកកំពុងខំប្រឹងបញ្ឈប់រថយន្តដែលប្រើសាំង។ ដូច្នេះហើយ ការ​ប្រើប្រាស់​ម៉ាស៊ីន​ពីរ​ ជាមួយ​នឹង​បច្ចេកវិទ្យា hybird នេះ អាចនឹងរលាយបាត់នាពេល​​អនាគត។

រថយន្តថ្មឥន្ធនៈ hydro

ម៉ូដែលរថយន្តដែលមានឈ្មោះថា MIRAI ដែលផលិតដោយ Toyota ជារថយន្តថ្មឥន្ធនៈ hydro ដំបូងគេនៅលើទីផ្សារ។ ជាប្រភេទរថយន្តប្រើឥន្ធនៈ hydro ដើម្បីបង្កើតចរន្តអគ្គិសនី។ មិន​ដូច​ជារថយន្ត​ប្រើ​សាំងនោះទេ កាក​សំណល់​ចេញពីប្រភេទរថយន្តនេះគឺចំហាយទឹក ដូច្នេះមិនប៉ះពាល់បរិស្ថានឡើយ។ ជាងនេះទៅទៀត ដោយសារឥន្ធនៈ hydro ប្រើ​ជំនួស​សាំង ដូច្នេះអាចជួយកាត់រយៈពេលសាកថ្មរថយន្ត។

ទោះជាយ៉ាងណា បញ្ហាត្រង់ថា ការបង្កើតកន្លែងសម្រាប់បញ្ចូលឥន្ធនៈ hydro របស់រថយន្ត។ ព្រោះបើសិនជាម៉ាស៊ីនប្រើ​ឥន្ធនៈ hydro ពេញនិយមក៏ដោយ ក៏ក្រុមហ៊ុនផលិតផ្សេងទៀតមិនចង់ចូលរួមដែរ ព្រោះពួកគេដឹងថា ពិបាកប្រកួត​ប្រជែង​ជាមួយក្រុមហ៊ុន Toyota ។

ឧស្សាហកម្មរថយន្តនៅលើពិភពលោកកំពុងឆ្លងកាត់ការផ្លាស់ប្តូរពីមួយថ្ងៃទៅមួយថ្ងៃ នៅពេលដែលរថយន្តហោះធ្លាប់​តែ​ឃើញ​ក្នុង​​ភាព​​យន្ត​បែប​វិទ្យា​សាស្ត្រ ឥឡូវនេះបានក្លាយជាការពិត។

តើ​ក្រុមហ៊ុន​ផលិត​រថយន្ត​ជប៉ុន​ដែល​ធ្លាប់ល្បីលើពិភពលោកអាចនឹងបន្តក្រោយបដិវត្តន៍​រថយន្ត​អគ្គិសនី​ដែរ​ទេ? តើ​អ្នក​គិត​ថា​នរណា​នឹង​ក្លាយ​ជា​អ្នក​គ្រប់​គ្រង​ឧស្សាហកម្ម​រថយន្ត​ពិភព​លោក​ក្នុង​រយៈពេល ២០ ឆ្នាំខាងមុខ?

Abe Kengo