បើ​សិន​ជា​អ្នក​កើត​ក្នុង​ខែ​សីហា យ័ន្ត​សំណាង​ដែល​ត្រូវ​នឹង​អ្នក​គឺ “Charm Pot”

សួស្តីអ្នកទាំងអស់គ្នា!

ខ្ញុំឈ្មោះ Wakaco ដែលសព្វថ្ងៃកំពុងដំណើរការហាងវេទមន្តមួយនៅក្នុងប្រទេសជប៉ុន ជាមួយនឹងប្រធានបទថ្មធម្មជាតិ និងហុងស៊ុយ។ ដើម្បីឲ្យសុភមង្គលមករកអ្នកក្នុងជីវិតប្រចាំថ្ងៃ ខ្ញុំនឹងផ្តល់ជូនព័ត៌មានទាក់ទងនឹងថ្មធម្មជាតិ​ទាំង​នេះ។

តើថ្មធម្មជាតិមានន័យដូចម្តេច?

ផ្កានីមួយៗបង្កប់អត្តន័យដោយឡែក ថ្មធម្មជាតិក៏ដូចគ្នាដែរ ថ្មមួយគ្រាប់ៗមានអត្តន័យខុសគ្នា។ នៅពេលនេះ ខ្ញុំចង់​ណែនាំ​ប្រភេទ​ថ្ម​សម្រាប់​អ្នកដែលកើតក្នុងខែសីហា។

នោះគឺជាថ្ម Peridot

ប្រសិនបើអ្នកកើតក្នុងខែសីហា ថ្មកំណើតរបស់អ្នកគឺ Peridot ។ Peridot មានអត្តន័យសំដៅលើ “ស្នេហាអាពាហ៍​ពិពាហ៍” ។ ដែលត្រូវគេចាត់ទុកថាអាចកាត់​បន្ថយ​ចំណង់​ផ្លូវ​ភេទ គ្រប់គ្រងអារម្មណ៍ខឹង ទន្ទឹមនឹងនេះ ជួយបំបាត់គំនិតមិន​ត្រឹម​​ត្រូវ និង​នាំ​មក​នូវ​ភាព​ពេញ​លេញនៅក្នុងអាពាហ៍ពិពាហ៍។

ថ្ម Peridot មានថាមពលវិជ្ជមានជួយទប់ស្កាត់ចិត្តច្រណែន ឬឈ្នានីស នាំមកនូវភាពស្ងប់សុខក្នុងចិត្ត។ ដូច្នេះហើយ វា​ត្រូវ​គេចាត់ទុកជាថ្មធម្មជាតិពិសេស ដែល​អាច​នាំ​មក​នូវ​សុភមង្គល​ដល់​ជីវិត​របស់​អ្នក។

ដបយ័ន្ត Charm Pot

ខ្ញុំនឹងជ្រើសយកថ្មធម្មជាតិ Peridot ទាំងនេះសម្រាប់ធ្វើដបយ័ន្ត ដើម្បីនាំមកនូវភាពវិជ្ជមានដល់អ្នក។ ក្រៅពីនេះ នៅ​ខាង​ក្នុង​ថែម​ទាំងមានវត្ថុដូចជា៖

• ថ្ម Tourmaline ដើម្បីជួយឲ្យចិត្តរបស់អ្នកស្ងប់ និងផ្តោតអារម្មណ៍។
• ថ្មព្រះអាទិត្យនាំមកនូវទំនុកចិត្តដល់អ្នក ជាមួយនឹងប្រភពថាមពលស្រទន់ នឹងនាំអ្នកទៅកាន់ជីវិតដែលមនុស្ស​ជា​ច្រើន​ស្រមៃ​ចង់​បាន។
• Aquamarine ជាប្រភេទថ្មធម្មជាតិមានប្រសិទ្ធភាពព្យាបាលជំងឺខ្ពស់។
• ស្មៅអ័ព្ទតំណាងឲ្យការដឹងគុណ និងសុភមង្គល។

បន្ទាប់ពីសម្អាតដបដោយឈើ Palo Santo គេលាយបំណែកថ្មធម្មជាតិចូលគ្នា ហើយធ្វើវេទមន្ត បន្ទាប់មកបិទគំរប​ដោយ​ក្រមួន។ ចំពោះ​របៀប​ប្រើ អ្នក​អាច​ដាក់​នៅ​លើតុ ហើយមើលវាពេលមានអារម្មណ៍នឿយហត់។

ដបយ័ន្តនេះក៏ប្រើសម្រាប់បន្សុទ្ធរបស់របរដែលអ្នកតែងតែយកតាមខ្លួន។ ដូច្នេះពេលមកដល់ផ្ទះ ចូរអ្នកបើគំរបយ័ន្ត និងដាក់របស់របររបស់អ្នកពីលើ។ ក្រៅពីនេះ អ្នកអាចចាក់ប្រេងក្រអូបដែលខ្លួនចូលចិត្តលើថ្មធម្មជាតិ ហើយ​យក​តាម​ខ្លួន​ជំនួស​យ័ន្ត​ការ​ពារ។

យ៉ាងណាមិញ អ្នកគួរតែចងចាំថា ដបយ័ន្តមិនសម្រេចបំណងរបស់អ្នកទាំងអស់នោះទេ ប៉ុន្តែខ្លួនអ្នកផ្ទាល់ត្រូវខិត​ខំ​ប្រឹង​ប្រែង​ដើម្បីធ្វើ​ឲ្យបំណងប្រាថ្នាទាំងនោះក្លាយជាការពិត។ ដូច្នេះចូរចងចាំបំណងប្រាថ្នាក្នុងបេះដូង និងសម្លឹង​មើល​យ័ន្ត ដើម្បីដាស់តឿនខ្លួនឯងឲ្យព្យាយាមជានិច្ច យូរៗទៅវានឹងនាំអ្នកខិតកាន់តែជិតក្តីស្រមៃរបស់ខ្លួន។