ភាពឈឺ​ចាប់​នៅ​ពេល​ដែល​អនុវត្ត​ពិ​ធី seppuku របស់​សាមូរ៉ៃ

Seppuku (ពិធីវះពោះធ្វើអត្តឃាត) របស់ជប៉ុនតែងតែត្រូវជនបរទេសចាត់ទុកជាទង្វើល្ងង់ខ្លៅ។ ជាងនេះទៅទៀត គ្រប់​គ្នា​នឹង​មានអារម្មណ៍ភ័យខ្លាចពេលដឹងអំពីពិធីនេះ។

តើពិធី seppuku គេធ្វើបែបណា? ចូរចងចាំថា កុំយកតម្រាប់តាមវិធីទាំងនេះ។

បែបបទនៃពិធី seppuku

១. នៅពេលដែលទទួលបញ្ជាធ្វើពិធី seppuku អ្នកអនុវត្តពិធីត្រូវងូតទឹកសម្អាតរាងកាយ។

២. ចងសក់ខ្ពស់ជាងរាល់ដង ចំណុចនេះជួយឲ្យពេជ្ឈឃាតមានភាពងាយស្រួលពេលកាត់ក្បាលបន្ទាប់ពីធ្វើពិ​ធី​វះ​ពោះ។ បុគ្គលរូបនោះស្លៀកគីម៉ូណូពណ៌ស ប៉ុន្តែរបៀបស្លៀកផ្ទុយនឹងទំនៀមទម្លាប់ ទុកអាវផ្នែកខាងឆ្វេងនៅពី​មុខ ស្រដៀង​នឹង​របៀប​ស្លៀកគីម៉ូណូសម្រាប់មនុស្សស្លាប់។

៣. អង្គុយបែរមុខទៅទិសខាងជើង កន្លែងដែលនឹងវះពោះ ហើយបរិភោគអាហារសាមញ្ញលើកចុងក្រោយ។ បន្ទាប់​មក​​ផឹក​​ស្រា sake ចំនួន ២ កែវ ហើយ​ធ្វើ​ដូច​នេះ​ចំនួន ៤ ដង។

៤. កាំបិតស្នៀតដែលប្រើសម្រាប់វះពោះត្រូវបានគេលើកចេញមកប្រគល់ជូនអ្នកអនុវត្តពិធី seppuku ។

៥. Kaishakunin (ពេជ្ឈឃាត) នឹងកាត់ក្បាលដើម្បីបញ្ចប់ជីវិតអ្នកដែលអនុវត្តពិធី seppuku ដើរតាមក្រោយបុគ្គល​រូប​នោះ ហើយជូតកាំបិតរង់ចាំបំពេញតួនាទី។

៦. បន្ទាប់មកបុគ្គលរូបនោះដោះគីម៉ូណូផ្នែកខាងស្តាំចេញ ហើយចំហពោះ។ បន្ទាប់មកទៀត យកដៃឆ្វេង​ស្ទាប​ពោះ រួច​ចាក់​កាំបិត​ក្នុង​ដៃ​ត្រង់​ពោះ​ផ្នែក​ខាងឆ្វេង ហើយវះទៅខាងស្តាំ​។

នៅពេលនោះ kaishakunin នឹងកាត់ក្បាលដើម្បីបញ្ចប់ការឈឺចាប់របស់អ្នកអនុវត្តពិធី ប៉ុន្តែបន្សល់ទុកស្រទាប់ស្បែកត្រង់កញ្ចឹងក។ មូល​ហេតុ​​ព្រោះ​តែ​គេ​ជឿ​ថា ប្រសិនបើក្បាល និងដងខ្លួនដាច់ចេញពីគ្នា អ្នកស្លាប់នឹងមានទោស​អកត្តញ្ញូ​ចំពោះឪពុកម្តាយ​។

៧. ក្រោយពេល គ្រូពេទ្យពិនិត្យក និងពោះរួច គ្រប់គ្នាគ្របសាកសពដោយប្រើក្រណាត់បត់។ គេតែងតែចាត់ទុកថា អ្នកក្បាច់គុនមួយរូបនឹងមិនមានអារម្មណ៍ភ័យខ្លាច ឬរំជួលចិត្ត នៅពេលដែលត្រូវអនុវត្តតាមជំហាននៃពិធី seppuku រហូត​​ដល់​​ចប់ឡើយ។

ពិធី seppuku ផ្សេងទៀត

គេនិយាយថា មានវិធីអនុវត្តពិធី seppuku ខុសៗគ្នា។ យ៉ាងណាមិញ ក្នុងចំណោមនោះអ្វីដែលគួរឲ្យខ្លាចបំផុតគឺពិ​ធី Jumonjibara គឺថា បន្ទាប់​ពី​វះ​ពោះ​តាម​ជួរ​ផ្តេក គេវះតាមជួរបញ្ឈរ​ម្ដង​ទៀត។ ភាគច្រើនសាមូរ៉ៃអាចទ្រាំនឹងការ​វះ​ពោះ​ផ្តេក ប៉ុន្តែស្ទើរតែគ្មាននរណាអាចទ្រាំនឹងការវះពោះបញ្ឈរនោះទេ។

ពិធី seppuku ដែលឃោរឃៅបំផុតពោលគឺ វះតាមទម្រង់អក្សរ kanji ផ្ដេក ៣ ។ ចំណុចនេះមានន័យថា អ្នកអនុវត្តពិធីត្រូវចាក់ខ្លួនឯងរហូតដល់ទៅ ៣ ដង។ ដូច្នេះហើយ ពិតជាមិនគួរឲ្យជឿនោះទេ ដែលក្រោយពេលចាក់ចូលពោះចំនួន ៣ ដង នៅ​តែអាចរក្សាស្មារតី។

ក្រៅពីនេះ ក៏មានពិធី seppuku ងាយស្រួលសម្រាប់អ្នកដែលមិនអាចទ្រាំនឹងការឈឺចាប់ផងដែរ នោះគឺ sensubara ។ Kaishakunin នឹង​កាត់ក្បាលអ្នកអនុវត្តពិធី បន្ទាប់ពីពួកគេចាក់ផ្លិតដែលដូចនឹងកាំបិតចូលពោះ។

ហេតុ​អ្វីបានជាគេសម្រេចអនុវត្តពិធី seppuku ?

គេ​និយាយ​ថា​មាន​ហេតុផល​សំខាន់​បី។

• Oibara ៖ មានន័យថា បន្ទាប់ពីអនុវត្តពិធី seppuku បុរសជាប្តីអាចបន្តមើលថែប្រពន្ធកូនក្រោយពេលស្លាប់។
• Tsumebara ៖ មានន័យថា ដើម្បីបំពេញទំនួលខុសត្រូវ និងតួនាទីរបស់​សាមូរ៉ៃ​មួយ​រូប។
• Munenbara ៖ ស្តាប់ទៅដូចជាមិនគួរឲ្យជឿ ប៉ុន្តែពិធីវះពោះធ្វើអត្តឃាតជាអ្វីដែលសាមូរ៉ៃចង់បង្ហាញពីឆន្ទៈ​មុត​មាំ​របស់​ខ្លួន។

តើអ្នកយល់យ៉ាងណាចំពោះពិធីនេះ?

អ្នកប្រហែលជាគិតថា នេះជាទង្វើល្ងង់ខ្លៅ ប៉ុន្តែចំពោះសាមូរ៉ៃ ចំណុចនេះតំណាឲ្យកម្លាំងឆន្ទៈអាចយកឈ្នះលើភាព​ភ័យ​ខ្លាច ដែលមនុស្សធម្មតាមិនអាចធ្វើបាន។ ប្រហែលជាមិនត្រឹមតែខ្ញុំប៉ុណ្ណោះទេ មនុស្សជាច្រើនមានអារម្មណ៍​ថា​សំណាង ដែល​ខ្លួន​មិន​កើត​ក្នុង​សម័យ​សាមូរ៉ៃ។

Abe Kengo