ហេតុអ្វីបានជាប្រជាជនជប៉ុនពិបាកទទួលយកជនបរទេស?

ថ្ងៃពុធ 02/08/2023 | 18:28 ល្ងាច

ចំនួនប្រជាជនវ័យចំណាស់ និងការធ្លាក់ចុះបានបណ្តាលឲ្យកើតមានបញ្ហាកង្វះកម្លាំងពលកម្មយ៉ាងធ្ងន់នៅក្នុងប្រទេសជប៉ុន។ ដូច្នេះហើយ ឳកាសសម្រាប់ជនបរទេសទៅរស់នៅ និងធ្វើការនៅជប៉ុនកាន់តែច្រើនឡើង។

យ៉ាងណាមិញ ទន្ទឹមនឹងបញ្ហានេះ សព្វថ្ងៃនៅតែមានចលនាចង់លុបបំបាត់ជនបរទេសនៅជប៉ុន។ ដូច្នេះហើយ ហេតុអ្វីបានជាជប៉ុនក្លាយជាប្រទេសដែលពិបាកទទួលយកជនបរទេស? គ្រប់យ៉ាងទាក់ទងនឹងប្រវត្តិនៃការកកើត និងការអភិវឌ្ឍរបស់ជប៉ុន។

១. ប្រទេសដែលមានជាតិសាសន៍តែមួយ

ថ្វីត្បិតតែ នៅជប៉ុនមានជនជាតិភាគតិច ប៉ុន្តែភាគច្រើនប្រជាជនមានដើមកំណើតមកពីជនជាតិ Yamato ។ ឧទាហរណ៍ដូចជា ជនជាតិភាគតិច Ainu រស់នៅកោះហុកកៃដូ មានត្រឹមតែ ០,០០១៨% នៃចំនួនប្រជាជនជប៉ុនសរុបប្រហែល ២៣.០០០ នាក់។

បើប្រៀបទៅនឹងប្រជាជនចិនចំនួន ៧៦ ម៉ឺននាក់ និងចំនួនប្រជាជនវៀតណាមចំនួន ៤៩ ម៉ឺននាក់ ដែលកំពុងរស់នៅប្រទេសជប៉ុន យើងអាចមើលឃើញថា ចំនួនជនជាតិភាគតិចនៅក្នុងប្រទេសជប៉ុនមានចំនួនតិចតួចណាស់។

ជាមួយនឹងស្មារតីជាតិសាសន៍តែមួយ ប្រជាជនជប៉ុនថែមទាំងទទួលបានការអប់រំដូចគ្នាផងដែរ។ ដូច្នេះមានរឿងជាច្រើន ទោះមិនត្រូវបានពន្យល់ឲ្យបានជាក់លាក់ ក៏ពួកគេនៅតែអាចយល់ ព្រោះរឿងទាំងនោះត្រូវគេចាត់ទុកដូចជារឿងធម្មតាសម្រាប់ពួកគេ។ ប៉ុន្តែបញ្ហាត្រង់ថា ចំពោះជនបរទេស បើសិនជាមិនពន្យល់ឲ្យបានច្បាស់លាស់ ប្រហែលជាពិបាកយល់ពីគំនិតរបស់ប្រជាជនជប៉ុនណាស់។

២. ជាប្រទេសដែលហ៊ុំព័ទ្ធទៅដោយសមុទ្រ

ជប៉ុនជាប្រទេសដែលហ៊ុំព័ទ្ធទៅដោយសមុទ្រ ចំណុចនេះក៏ជាមូលហេតុដែលធ្វើឲ្យជប៉ុនក្លាយជាប្រទេសបង្រួបបង្រួមផងដែរ។

ថ្វីត្បិតតែ សព្វថ្ងៃនេះ យើងអាចទៅលេងជប៉ុនដោយជិះយន្តហោះបានយ៉ាងងាយ ប៉ុន្តែកាលពីមុន ប្រសិនបើចង់ទៅជប៉ុន យើងត្រូវធ្វើដំណើរតាមផ្លូវទឹក។ ដូច្នេះហើយ ចំពោះការទំនាក់ទំនងជាមួយជនបរទេសត្រឹមកន្លែងមួយចំនួននៅជប៉ុនប៉ុណ្ណោះ។

៣. គោលនយោបាយបិទច្រក

គោលនយោបាយអាណានិគមនៃបណ្តាប្រទេសលោកខាងលិចអមដោយការផ្សព្វផ្សាយគ្រឹស្តសាសនា។ ដូច្នេះវិធានការទប់ទល់របស់រដ្ឋាភិបាលជប៉ុននាពេលនោះ គឺកាត់បន្ថយទំនាក់ទំនងជាមួយបរទេសតាមដែលអាចធ្វើទៅបាន។ ចាប់តាំងពីពេលនោះមក ប្រទេសជប៉ុនបានអភិវឌ្ឍ និងបង្កើតវប្បធម៌ដោយឡែកសម្រាប់ខ្លួន។

ចំណុចពិសេសនៃវប្បធម៌ជប៉ុនក៏បានទាក់ទាញចំណាប់អារម្មណ៍របស់មនុស្សជាច្រើននៅជុំវិញពិភពលោក។ ប៉ុន្តែទន្ទឹមនឹងនោះ វប្បធម៌នេះបានបង្កើតជារនាំង ដែលធ្វើឲ្យជប៉ុនពិបាកភ្ជាប់ទំនាក់ទំនងវិជ្ជមានជាមួយពិភពខាងក្រៅ។

ដើម្បីអាចរស់នៅជប៉ុន តើយើងគួរកត់សម្គាល់ចំណុចអ្វីខ្លះ?

នៅប្រទេសជប៉ុន គ្រប់គ្នាផ្តោតសំខាន់ទៅលើបញ្ហាមិនរំខានអ្នកដទៃ។

ជាទូទៅបញ្ហាដែលជនអន្តោប្រវេសន៍ត្រូវប្រឈមច្រើនគឺ ការបែងចែកសំរាម។ អ្នកទាំងអស់គ្នាត្រូវបែងចែកសំរាមនៅពេលដែលចង់ចោលរបស់អ្វីមួយ។ ចំណុចនេះពិបាកចំពោះជនបរទេស បញ្ហាកើតឡើងមិនតិចទេ ព្រោះតែចោលសំរាមមិនត្រឹមត្រូវ។ ដូច្នេះហើយ ពេលទៅដល់ជប៉ុន អ្នកអាចសួរបុគ្គលិកនៅសាលាក្រុង បន្ទាប់មកពួកគេនឹងចែកផ្ទាំងរូបភាពណែនាំអ្នកពីរបៀបបែងចែកសំរាម។

បន្ទាប់មកគឺបញ្ហាសំឡេងរំខាន នៅពេលដែលមិត្តរួមជាតិជួបជុំគ្នា ពួកគេតែងតែបរិភោគ និងជជែកគ្នាលេងខ្លាំងរហូតដល់យប់ជ្រៅ។ ទោះជាយ៉ាងណា នៅជប៉ុនបទប្បញ្ញត្តិទាក់ទងនឹងបញ្ហាសំឡេងរំខានតឹងរ៉ឹងខ្លាំងណាស់ ដូច្នេះចូរប្រយ័ត្ន បើមិនចង់ឲ្យប៉ូលីសមកសាកសួរ។

ជាចុងក្រោយ គឺរឿងរាក់ទាក់ជំរាបសួរ។ ថ្វីត្បិតតែ ចំនួនប្រជាជនជប៉ុនគ្មានទម្លាប់ជំរាបសួរអ្នកដទៃកាន់តែច្រើនឡើង យ៉ាងណាមិញ មិនច្រើនទេ អ្នកដែលមិនចូលចិត្តជំរាបសួររាក់ទាក់ ហេតុនេះ សូមកុំភ្លេចជំរាបសួរដោយភាពរីករាយដើម្បីបង្កើតទំនាក់ទមងល្អ។

ជប៉ុនជាប្រទេសដែលមានវប្បធម៌ខុសប្លែកនឹងពិភពលោក ទោះបីជាអ្នកមានអារម្មណ៍ថា វប្បធម៌របស់ពួកគេគួរឲ្យចាប់អារម្មណ៍ ប៉ុន្តែពិបាករស់នៅជាមួយពួកគេខ្លាំងណាស់។ ដូច្នេះហើយ អ្នកគួរតែយកចិត្តទុកដាក់ និងស្វែងយល់អំពីទំនៀមទម្លាប់របស់មនុស្សនៅជុំវិញ ដើម្បីកុំឲ្យកើតមានការយល់ច្រលំពេលដែលរស់នៅជប៉ុន។

Abe Kengo