ផ្តើមដោយ​បុរស​ម្នាក់​ដែល​ងើប​ឡើង​ពី​បាត​សង្គម​ក្លាយ​ជា​អ្នក​ដឹក​នាំ​ព្រះ​ពុទ្ធ​សាសនា​​ឥណ្ឌា

បច្ចុប្បន្នមានបុរសជនជាតិជប៉ុនម្នាក់កំពុងកាន់តំណែងខ្ពស់ជាងគេនៃព្រះពុទ្ធសាសនានៅប្រទេសឥណ្ឌា ដែលគេចាត់ទុកជាដើមកំណើតនៃព្រះពុទ្ធសាសនា។ បុរសនោះមានឈ្មោះថា Sasaki Shurei អាយុ ៨៧ ឆ្នាំ។ យ៉ាង​ណា​មិញ មនុស្ស​ជាច្រើនមានអារម្មណ៍ភ្ញាក់​ផ្អើល​ពេល​ដឹង​ពី​អតីតកាល​មិន​ល្អ​របស់​លោក។

ចូរយើងស្វែងយល់អំពីដំណាក់កាលដែលបានធ្វើឲ្យលោក Sasaki ស្ថិតនៅក្នុងបាតសង្គម ក្លាយជាបុគ្គលដែល​មាន​អំណាច​ខ្ពស់​បំផុត​ក្នុង​ព្រះ​ពុទ្ធ​សាសនា​ឥណ្ឌា។

កាលគាត់នៅរៀនថ្នាក់ទី ៨ លោកធ្លាប់ធ្លាក់ពីលើកំពូលភ្នំព្រិលហើយរងរបួសធ្ងន់។ ចាប់​តាំង​ពី​ពេល​នោះ​មក គាត់ចាប់​ផ្ដើម​បាត់​បង់​ជំនឿចិត្ត និងតែងតែញញើតគ្រប់រឿងទាំងអស់។ សូម្បីតែពេលហាត់កីឡានៅសាលា ក៏គាត់មិន​អាចចូលរួមជាមួយ​មិត្តភ័ក្ដិ​បាន​ដែរ។ ជាច្រើនដងមកហើយ គាត់ឆ្ងល់ថា​ហេតុ​អ្វី​បាន​ជា​ខ្លួន​ឯង​មិន​អាច​ដូច​អ្នក​ដទៃ ហើយ​យំ​ជា​ខ្លាំង។

បន្ទាប់ពីបញ្ចប់​អនុវិទ្យាល័យ លោកមិនបានទៅរកការងារធ្វើនោះទេ ប៉ុន្តែចាប់ផ្តើមជីវិតដូចជាមនុស្សដែលវង្វេង​ស្មារតី។ ជាងនេះទៅទៀត លោកធ្លាប់ព្យាយាមធ្វើអត្តឃាតចំនួន ៣ ដង ប៉ុន្តែមិនបានសម្រេច ដោយសារតែចង់បញ្ចប់ជីវិតដែលគាត់ចាត់ទុកថាគ្មានន័យ។ គាត់តែងតែមានអារម្មណ៍ឯកា ដោយសង្ឃឹម​ថា មាននរណាម្នាក់មកស្រោចស្រង់ជីវិតរបស់លោក ប៉ុន្តែនៅទីបំផុតគ្រាន់តែជាអារម្មណ៍អស់សង្ឃឹមប៉ុណ្ណោះ។

កាលអាយុ ២៥ ឆ្នាំ គាត់សម្រេចចិត្តទៅកាន់វត្តមួយនៅប្រទេសថៃ ដើម្បីស្វែងរកការជួយសង្គ្រោះ។ ថ្វីត្បិតតែគាត់បានតាំងចិត្តសាងជីវិតថ្មី ប៉ុន្តែគាត់ហាក់ដូចជាមិនកែប្រែខ្លួនឯងនោះទេ នៅពេលនោះ លោកមានទំនាក់ទំនងមិនល្អជាមួយស្រ្តីពីរនាក់ក្នុងពេលតែមួយ។ ក្រោយ​មក​ស្ត្រី​ទាំង​ពីរនាក់បានដឹងថាខ្លួនត្រូវចាញ់បោក ហើយភ្ជង់កាំភ្លើងគំរាមយកជីវិតលោក។

សំណាងល្អគ្រប់យ៉ាងត្រូវបានដោះស្រាយដោយសន្តិវិធី។ គាត់បានសម្រេចចិត្តចាកចេញពីប្រទេសថៃ ហើយផ្លាស់ទៅប្រទេសឥណ្ឌាកាលវ័យ ៣២ ឆ្នាំ ដើម្បីបន្តដំណើរកសាងជីវិតថ្មីម្តងទៀត។

នៅពេលដែលទៅដល់ប្រទេសឥណ្ឌា គាត់សម្រេចចិត្តកាន់សាសនាហិណ្ឌូ ដែលជាសាសនាដ៏មានឥទ្ធិពលបំផុត ដោយ​មាន​ប្រមាណ ៨០% ប្រជាជនកាន់សាសនានេះ។ ក្រៅពីនេះ គ្រប់​គ្នា​ដែល​កើត​មក​ក្នុង​ប្រទេស​នេះ គឺមាន​ឋានៈ​​ជាក់​លាក់​មួយ​ក្នុង​សង្គម​ទៅ​ហើយ អាស្រ័យលើស្ថានភាពដើមកំណើតរបស់មនុស្សម្នាក់ៗ អ្នកដែលស្ថិតក្នុងវណ្ណៈទាប​ជាង​គេ​នឹង​ទទួលការរើសអើងយ៉ាងខ្លាំង ទោះពួកគេមិនបានធ្វើអ្វីខុសក៏ដោយ។

នៅពេលដែលមើលឃើញប្រជាជនក្នុងប្រទេសនេះត្រូវគេចាត់ទុកដូចជាសត្វ លោក Sasaki ខឹងយ៉ាងខ្លាំង ហើយនិយាយ​ថា៖ “តើព្រះមិនប្រទានពរ និងជួយសង្គ្រោះមនុស្សទេឬ?” ក្រោយ​មក​គាត់​បាន​បោះបង់​សាសនា​ហិណ្ឌូ​ទៅ​កាន់​​ព្រះ​ពុទ្ធ​សាសនា។

លទ្ធផលក្រោយរយៈពេល ៥០ ឆ្នាំដំណើរការយ៉ាងណាសកម្មក្នុងព្រះពុទ្ធសាសនា លោក Sasaki បានបង្កើនចំនួនពុទ្ធសាសនិកក្នុងប្រទេសពីប៉ុន្មានពាន់នាក់ កើនឡើងជាង ១៥០ លាននាក់។ ចំណុចនេះក៏បានធ្វើឲ្យលោកក្លាយជាមនុស្ស​ដែល​មាន​កេរ្តិ៍​ឈ្មោះ​បំផុត​ក្នុង​សាសនា។

“ជំនះលើដែនកំណត់របស់ខ្លួន ហើយក្រោកឈរដោយក្លាហាន” ។

នេះជាការអំពាវនាវដែលមហាជន​ជាច្រើនបានគាំទ្រលោក Sasaki ព្រោះ​លោក​ផ្ទាល់ក៏ជា​មនុស្ស​ដែលងើបឡើងពី​បាត​​សង្គម​ដែរ។

លោក Ono Ryuko អាយុ ៤៨ ឆ្នាំ ដែលបច្ចុប្បន្នជាសិស្សរបស់លោក Sasaki បានចែករំលែកថា៖

“កាលពីមុន ខ្ញុំធ្លាប់ជាសហគ្រិន IT មួយរូប ដែលបានបង្កើតកម្មវិធីដ៏ពេញនិយមមួយ ហើយមានប្រាក់ចំណូលប្រចាំ​ឆ្នាំ ១០ ពាន់​លាន​យ៉េន។ ប៉ុន្តែជីវិតរបស់ខ្ញុំផ្លាស់ប្តូរចាប់តាំងពីពេលដែលខ្ញុំបានជួបនឹងលោក Sasaki” ។

រាល់ពាក្យសម្ដី និងទង្វើរបស់លោក Sasaki សុទ្ធតែដើម្បីអ្នកដទៃ ខ្ញុំពិតជារំភើបចិត្តចំពោះទង្វើរបស់លោកដែលតែងតែជួយមនុស្សគ្រប់គ្នា ដោយមិនខ្វល់ថាខ្លួនត្រូវចាញ់បោកដែរអត់ទេ។ លោក Sasaki ជួយឲ្យខ្ញុំយល់រឿងជាច្រើន ហើយ​​ខ្ញុំ​​បាន​​សម្រេច​ចិត្ត​លះបង់​គ្រប់យ៉ាងដើម្បីដើរតាមលោក។

លោក Sasaki និងលោក Ono តែងតែចង់ជួយមនុស្សឲ្យបានច្រើនតាមតែអាចធ្វើទៅបាន។ យ៉ាង​ណា​មិញ អ្វី​ដែល​គាត់​សង្ឃឹម​​គឺ​​ចង់​បង្ហាញ​ដល់​អ្នក​រាល់​គ្នា​ថា យើង​ត្រូវ​តែ​យក​ឈ្នះ​ខ្លួន​ឯង​ជា​មុន​សិន។

ដែនកំណត់របស់ខ្លួនគ្រាន់តែជាអ្វីដែលយើងយល់ឃើញប៉ុណ្ណោះ វាអាចនឹងរលាយបាត់ ប្រសិនបើយើងខំប្រឹងឈានទៅមុខមួយជំហានទៀត។ ដូច្នេះហើយ ចំណុចល្អបំផុតដែលយើងអាចធ្វើបាន គឺ​ប្រយុទ្ធ​រហូត​ដល់​យើងយកឈ្នះ​ដែន​​កំណត់​​របស់​ខ្លួន។

Abe Kengo