តើ​អាមេរិក​ពិត​ជា​ចង់​ជួយជប៉ុន​ស្តារ​​ឧស្សាហ​កម្ម​ផលិត​បន្ទះ​ឈីប​ពាក់​កណ្តាល​ចម្លង​មែន​ទេ?

ផលិតផលដូចជាបន្ទះឈីបពាក់កណ្តាលចម្លង មិនត្រឹម​តែប្រើសម្រាប់កុំព្យូទ័រ​យួរ​ដៃ​ប៉ុណ្ណោះ​ទេ គេប្រើក្នុងរថយន្ត របស់​របរ​ប្រើ​ប្រាស់​ក្នុង​ផ្ទះ និង​ឧបករណ៍​ជា​ច្រើន​ទៀត។

សព្វថ្ងៃនេះវាបានក្លាយជាចំណែកដ៏សំខាន់មួយក្នុងជីវិតរបស់យើងទាំងអស់គ្នា។ តើអ្នកដឹងទេថា អាមេរិកកំពុង​តែ​ចង់​​ជួយ​​​​ឧស្សាហកម្ម​​ផលិតបន្ទះ​ឈីបពាក់កណ្តាលចម្លងរបស់ជប៉ុនឲ្យរីកចម្រើនឡើងវិញ ដើម្បីរួមកម្លាំងប្រឈមមុខ​នឹងប្រទេសចិនមែនទេ?

យ៉ាងណាមិញ តើប្រវត្តិសាស្ត្រ​អាចនឹងកើតឡើងម្តងទៀតដែរទេ? នៅពេលដែលអាមេរិកយកឈ្នះចិន ហើយ​ងាក​មក​ចាត់​ទុក​ជប៉ុន​ដូច​ជា​គូប្រជែង​​របស់​ខ្លួន?

បន្ទះឈីបពាក់កណ្តាលចម្លងដែលអាមេរិកបង្កើតត្រូវបានជប៉ុនកែលម្អឡើងវិញ។

សហរដ្ឋអាមេរិកបានបង្កើតបន្ទះឈីបពាក់កណ្តាលចម្លងនៅឆ្នាំ ១៩៤០ ។ នៅពេលនោះ ការផលិតបន្ទះឈីបពាក់កណ្តាលចម្លងត្រូវបានគ្រប់គ្រងដោយសហរដ្ឋអាមេរិក ប៉ុន្តែប្រជាជនជប៉ុនបានផ្តួលរំលំការគ្រប់គ្រងរបស់សហរដ្ឋអាមេរិក។

បន្ទះឈីបពាក់កណ្តាលចម្លងត្រូវបានផលិតឡើងដោយវត្ថុធាតុដើមមានរំញោចខ្ពស់ តម្រូវឲ្យមានបរិយាកាសផលិត​ដែលល្អបំផុត។ ដូច្នេះ​ហើយ ប្រសិន​បើ​វា​មិន​ត្រូវ​បាន​ផលិតក្នុងបរិយាកាសស្តង់ដាទេនោះ អត្រាដែលផលិត​ខូច​កាន់​តែ​ខ្ពស់។ បច្ចុប្បន្ននេះ ថ្វីត្បិតតែប្រទេសជាច្រើនអាចផ្តល់បន្ទប់ស្អាតសម្រាប់ផលិតបន្ទះឈីបពាក់កណ្តាល​ចម្លង ប៉ុន្តែតាមពិតទៅ ជប៉ុនជាប្រទេសដំបូងគេមានបច្ចេកវិទ្យាខ្ពស់នេះ។

អត្រាផលិតផលខូចថយចុះ ដែលមានន័យថា ប្រសិទ្ធភាពផលិតកម្មកើនឡើង ដែលធ្វើឲ្យតម្លៃផលិតផលចុះ​ថោក។ ដោយអនុវត្តបច្ចេកវិទ្យាទំនើបក្នុងការផលិត ជប៉ុនឈានមុខទីផ្សារពិភពលោកក្នុងការផលិតបន្ទះឈីបពាក់​កណ្តាល​ចម្លង​នៅ​ឆ្នាំ ១៩៨០ ។

ឧស្សាហកម្មកុំព្យូទ័រយួរដៃ (PC) របស់ជប៉ុនគ្របដណ្តប់ទីផ្សារពិភពលោក

ចាប់ពីឆ្នាំ ១៩៨០ រហូតដល់ដើមឆ្នាំ ១៩៩០ ក្រុមហ៊ុនដូចជា NEC, Fujitsu និង Sharp បានផលិតកុំព្យូទ័រដែល​មាន​​តួលេខ​​បច្ចេក​​ទេស​​របស់​​ខ្លួន។ ក្រុមហ៊ុនទាំងនេះប្រកួតប្រជែងគ្នា ខណៈពេលដែលពួកគេកំពុងស្រាវជ្រាវការផលិត​បន្ទះ​ឈីបពាក់កណ្តាលចម្លង ដើម្បីប្រើប្រាស់នៅក្នុងប្រព័ន្ធរបស់ខ្លួន។

ចាប់តាំងពីពេលនោះមក ធ្វើឲ្យឧស្សាហកម្មបន្ទះឈីបពាក់កណ្តាលចម្លងរបស់ជប៉ុនផ្ទុះឡើងយ៉ាងឆាប់រហ័ស ដែលធ្វើឲ្យចំណែកទីផ្សាររបស់ជប៉ុនមានជាង ៥០% នៅលើពិភពលោក។ សហរដ្ឋ​អាមេរិក​មិន​អាច​ប្រកួត​ប្រជែង​ជា​មួយ​​ជប៉ុន​ទាំង​ផ្នែកបច្ចេកវិទ្យា តម្លៃ និងចំនួននៃការលក់។ នៅទីបំផុតបានធ្វើឲ្យស្សាហកម្មផលិតបន្ទះឈីបពាក់កណ្តាល​ចម្លង​របស់​អាមេរិក​ធ្លាក់ចុះ។

ផែនការកម្ទេចផលិតផល​ជប៉ុន​របស់​រដ្ឋាភិបាល​អាមេរិក

នៅឆ្នាំ ១៩៨៥ សហរដ្ឋអាមេរិកបានប្តឹងជប៉ុន​ដោយ​លើក​មូល​ហេតុ​​ថា៖ “ក្រុមហ៊ុនផលិតបន្ទះឈីបពាក់កណ្តាលចម្លងជប៉ុនកំពុងតែប្រកួតប្រជែងមិនស្មើភាព ដោយលក់បំផ្លាញតម្លៃផលិតផលរបស់ពួកគេ” ។

ភាគីជប៉ុនបានបដិសេធការចោទប្រកាន់នោះ ដោយនិយាយថា បន្ទះឈីបពាក់កណ្តាលចម្លងមានភាពខុសគ្នាព្រោះ​តែ​អាមេរិកបានបរាជ័យទាំងផ្នែកបច្ចេកវិទ្យា និងតម្លៃផលិតកម្ម។ ដូច្នេះ​ការ​ចោទប្រកាន់របស់​ភាគីអាមេរិក​គ្មាន​មូល​ដ្ឋាន​នោះ​ទេ ប៉ុន្តែ​ការ​វាយប្រហារ​របស់​អាមេរិក​ហាក់​ដូចជា​មិនថយចុះឡើយ។

លទ្ធផលជប៉ុនត្រូវបង្ខំឲ្យទទួលយកសំណើដែលមិនសមហេតុ​ផល៖ “១/៥ នៃប្រាក់ទិញបន្ទះឈីបពាក់កណ្តាលចម្លងរបស់​ជប៉ុនត្រូវទិញពីបរទេស” ។

ទោះបីជាក្រោយមកជប៉ុនបានធ្វើតាម ប៉ុន្តែនៅឆ្នាំបន្ទាប់អាមេរិកបន្តរិះគន់រដ្ឋាភិបាលជប៉ុនមិនគោរពតាមកិច្ច​ព្រមព្រៀង។ ដូច្នេះហើយ អាមេរិកបានគំរាមយកពន្ធ ១០០% ចំពោះឧបករណ៍អេឡិចត្រូនិកដូចជាកុំព្យូទ័រយួរ​ដៃ ទូរទស្សន៍ និងទំនិញអគ្គិសនីប្រើប្រាស់ក្នុងផ្ទះផ្សេងទៀតដែលជប៉ុនផលិត។

តាំងពីដំបូង សហរដ្ឋអាមេរិកគឺចង់ប្រើវិធីទាំងនេះដើម្បីទប់ស្កាត់ឧស្សាហកម្មជប៉ុន។ ដើម្បីទប់ទល់នឹងការគំរាមកំហែងនេះ រដ្ឋាភិបាលជប៉ុនបានណែនាំក្រុមហ៊ុនផលិតបន្ទះឈីបពាក់កណ្តាលចម្លងត្រូវកម្រិតបរិមាណផលិត​ផល​ដែលក្រុមហ៊ុនផលិត។ ដូច្នេះហើយ ចំណែកទីផ្សារបន្ទះឈីបពាក់កណ្តាលចម្លងដែលបរទេសផលិតច្រើនឡើង​នៅ​ជប៉ុន ដែលបណ្តាលឲ្យចំនួនក្រុមហ៊ុនផលិតបន្ទះឈីបពាក់កណ្តាលចម្លងរបស់ជប៉ុនថយចុះជាលំដាប់។

តើជប៉ុនអាចនឹងក្រោកឈរឡើងវិញបន្ទាប់ពីជម្លោះនឹងចិនដែរទេ?

ឥឡូវ​នេះ អាមេរិក​កំពុង​ជាប់​ក្នុង​សង្រ្គាម​ពាណិជ្ជកម្ម​ជាមួយ​ចិន។ ដោយសារអាមេរិកដឹងថាខ្លួនមិនអាចប្រកួតប្រជែងជាមួយចិនតែម្នាក់ឯងបាន ទើបសម្រេចចិត្តសហការជាមួយជប៉ុន ដើម្បីទប់ទល់នឹងឧស្សាហកម្មផលិតបន្ទះឈីបពាក់កណ្តាលចម្លងរបស់ចិន។

ចូរយើងក្រឡេកមើល

តើនោះជាលទ្ធផលដែលអាមេរិកកម្ទេចឧស្សាហកម្មផលិតបន្ទះឈីបពាក់កណ្តាលចម្លងរបស់ជប៉ុន ដែលធ្វើឲ្យ​ជប៉ុន​មិន​អាច​បន្ត​អភិវឌ្ឍ​បច្ចេក​វិទ្យារបស់ខ្លួនមែនទេ?

ក្រោយពេលដែលប្រើជប៉ុនវាយប្រហារចិន តើអាមេរិកអាចនឹងបោះបង់ចោលជប៉ុនដូចដែលធ្លាប់បានធ្វើដែរទេ?

មិនយូរប៉ុន្មាន គម្រប់ខួប ៨០ ឆ្នាំបន្ទាប់ពីសង្រ្គាមបានបញ្ចប់នៅឆ្នាំ ១៩៤៥ នឹងមកដល់។ ប្រជាជនជប៉ុននៅតែឆ្ងល់​ថា តើ​​សហរដ្ឋ​អាមេរិក​​នឹង​បន្ត​រំខាន​ជប៉ុន​ដល់​ពេល​ណា?

Abe Kengo