យ័ន្តដែលសុំនៅវត្ត និងទីសក្ការបូជា តើប្រជាជនជប៉ុនធ្វើយ៉ាងណាពេលដែលលែងប្រើ?

ថ្ងៃអង្គារ 11/07/2023 | 18:34 ល្ងាច

តើអ្នកធ្លាប់បានឮអំពីវប្បធម៌យ័ន្តរបស់ជប៉ុនដែរទេ?

យ័ន្តមានលក់នៅតាមវត្ត និងទីសក្ការបូជាក្នុងប្រទេសជប៉ុន ជាទូទៅមានរូបរាងដូចនេះ។

យ័ន្តមួយចំនួនត្រូវបានរចនាតាមបែបជប៉ុន ខ្លះទៀតមើលទៅគួរឲ្យស្រលាញ់ណាស់។ ដូច្នេះហើយ មនុស្សជាច្រើនតែងតែទិញវាទុកជាវត្ថុអនុស្សាវរីយ៍ សម្រាប់ជូនសាច់ញាតិ ឬមិត្តភ័ក្តិ។

អ្នកដឹងទេ តើយើងគួរធ្វើយ៉ាងណាបើសិនជាចង់បោះចោលយ័ន្ត? តាមពិតទៅ យ័ន្តនៅជប៉ុនក៏មានកាលបរិច្ឆេទផុតកំណត់ដែរ។

ថ្ងៃនេះ ខ្ញុំនឹងបង្ហាញអ្នកពីរបៀបធ្វើយ៉ាងចំពោះយ័ន្តដែលលែងប្រើទៀត។

កាលបរិច្ឆេទផុតកំណត់

ជាទូទៅថង់យ័ន្តនីមួយៗមានកាលបរិច្ឆេទផុតកំណត់រយៈពេល ១ ឆ្នាំបន្ទាប់ពីសុំ។ គេមានជំនឿថា ទេវតាមិនតាមការពារយើងដោយផ្អែកលើយ័ន្តចាស់នោះទេ ដូច្នេះហើយ ជារៀងរាល់ឆ្នាំអ្នកគួរតែប្តូរយ័ន្តថ្មីមួយ។

តើយើងគួរធ្វើយ៉ាងណាចំពោះសន្លឹកយ័ន្តចាស់? ខ្ញុំនឹងបង្ហាញអ្នកពីវិធីចាត់ចែងខាងក្រោមនេះ។

១/ ប្រគល់ទៅឲ្យវត្ត ឬទីសក្ការបូជាដែលអ្នកបានទិញ

នេះជាវិធីទូទៅបំផុត មិនថាបំណងប្រាថ្នារបស់អ្នកបានសម្រេចឬអត់ទេ ចូរបង្ហាញការដឹងគុណ ហើយប្រគល់ទៅឲ្យកន្លែងដែលអ្នកបានទិញថង់យ័ន្តនោះ។ ម្យ៉ាងវិញទៀត អ្នកក៏មិនគួរភ្លេចដាក់ប្រាក់ចូលប្រអប់បរិច្ចាគ ជាមួយនឹងការបួងសួងអរគុណរបស់ខ្លួនផងដែរ។

២/ យកទៅកាន់វត្ត ឬទីសក្ការៈដែលនៅក្បែរអ្នក

ក្នុងករណីបើអ្នកទិញយ័ន្តនៅឆ្ងាយពីកន្លែងដែលអ្នករស់នៅ អ្នកក៏អាចយកវាទៅឲ្យវត្ត ឬទីសក្ការបូជានៅក្បែរនោះ។

យ៉ាងណាមិញ អ្នកគួរតែប្រគល់ថង់យ័ន្តឲ្យស្របតាមសាសនាដែលសរសេរនៅលើនោះ។ ឈ្មោះវត្ត ឬទីសក្ការៈត្រូវបានគេសរសេរនៅខាងក្រោយយ័ន្ត។ នៅជប៉ុនឈ្មោះទីកន្លែងគោរពបូជាតែងតែមានពាក្យ ១ ក្នុងចំណោមពាក្យ ៣ គឺ “វត្ត” “ទីសក្ការៈបូជា” និង “អាទិទេព” នៅខាងក្នុង។

៣/ ប្រគល់សងតាមប្រៃសណីយ៍

ថ្វីត្បិតតែអាចអនុវត្តវិធីនេះនៅតាមវត្តអារាម និងទីសក្ការបូជាមួយចំនួន ប៉ុន្តែមិនមែនកន្លែងទាំងអស់សុទ្ធតែទទួលយកការផ្ញើតាមប្រៃសណីយ៍នោះទេ។ ដូច្នេះហើយ អ្នកគួរតែពិនិត្យមើលជាមុនសិន តើកន្លែងនោះយល់ព្រមទទួលយកយ័ន្តតាមប្រៃសណីយ៍ដែរទេ។

ប្រសិនបើវត្ត និងទីសក្ការបូជាទទួលយក អ្នកគួរតែដាក់យ័ន្តជាមួយនឹងប្រាក់ប្រមាណ ១០០០ យ៉េនខាងក្នុងរួចផ្ញើតាមប្រៃសណីយ៍។ ផ្ទុយទៅវិញ អ្នកអាចនឹងត្រូវគេចាត់ទុកថាមិនសមរម្យ ប្រសិនបើផ្ញើយ័ន្តទៅដោយគ្មានការអនុញ្ញាតរបស់ពួកគេ។

៤/ ដុតនៅផ្ទះ

ប្រហែលជាបងប្អូនប្រជាជនខ្មែរអាចនឹងនិយាយថា៖ “ខ្ញុំមិនទំនេរទៅជប៉ុនធ្វើរឿងទាំងនេះទេ” ។ ជាការពិតណាស់ យើងមិនចាំបាច់ចំណាយកម្លាំងដល់ថ្នាក់នឹងឡើយ ខ្ញុំនឹងបង្ហាញពីវិធីដែលយើងអាចអនុវត្តនៅកម្ពុជាបាន។

យើងអាចដុតនៅផ្ទះបាន ប៉ុន្តែអ្នកមិនគួរដុតទាំងមូលនោះទេ យើងគួរតែដោះចេញជាចំណែកខាងក្រៅ ឬបំណែកដែលធ្វើពីផ្លាស្ទិចនៅលើថង់យ័ន្ត។ បន្ទាប់មកដាក់យ័ន្តក្នុងក្រដាសស្អាត ដាក់អំបិលចូលបន្តិច ហើយរុំក្រដាសដោយចិត្តដឹងគុណទើបយកទៅដុត។

មិនថាអ្នកអនុវត្តតាមវិធីណានោះទេ អ្វីដែលសំខាន់ផ្តោតលើការដឹងគុណចំពោះអាទិទេពដែលបានប្រទានពរដល់អ្នក។ ដូច្នេះហើយ យើងគួរតែឲ្យតម្លៃយ័ន្តដែលខ្លួនទទួលបាន ដោយវាអាចនាំមកនូវរឿងល្អៗដល់អ្នក។

Abe Kengo