វិធី​សាស្ត្រ​ការ​ពារ​ផ្ទះ​ឈើ​ឆាប​ឆេះ​របស់​ប្រជាជន​ជប៉ុន​នៅ​សម័យ​​មុន តើ​គេ​ធ្វើ​បែប​ណា?

នៅសម័យនេះ រថយន្ត​ពន្លត់​អគ្គិភ័យ​នឹងមកដល់ភ្លាមៗពេលកើតមាន​អគ្គីភ័យ​ឆាបឆេះ​។ កាលពីមុនអ្នកដឹងទេ តើប្រជាជនជប៉ុនធ្វើយ៉ាងណាពេលមានអគ្គីភ័យ?

ថ្ងៃនេះខ្ញុំនឹងណែនាំឲ្យ​អ្នកស្គាល់ អ្នកពន្លត់អគ្គីភ័យនៅសម័យសាមូរ៉ៃ។

បញ្ហាលំនៅដ្ឋាននៅជប៉ុន

ជាដំបូង បញ្ហាស្ថិតលើផ្ទះ ដោយសារផ្ទះភាគច្រើនធ្វើពីឈើ ដូច្នេះងាយនឹងឆេះខ្លាំងណាស់។

ក្រៅពីនេះ ដង់ស៊ីតេ​ប្រជាជន​ច្រើន នៅសម័យនោះ Edo ធ្លាប់ជាទីក្រុងធំជាងគេលើពិភពលោក។ ផ្ទះនៅ Edo ច្រើន​រហូតដល់ថ្នាក់ពេលមានអគ្គីភ័យឆាបឆេះ ភ្លើងនឹងរាលដាលទៅកាន់ផ្ទះអ្នកជិតខាងយ៉ាងលឿន។

ម្យ៉ាងវិញទៀត អាកាសធាតុ​ក៏​ជា​បញ្ហា​មួយ​ផងដែរ។ ដូចសព្វថ្ងៃនេះដែរ នៅ Edo រដូវរងាអាកាសធាតុស្ងួតខ្លាំង គ្រាន់តែ​ខ្យល់​បក់​ពី​លើភ្នំ ក៏អាចធ្វើឲ្យ​ឆាបឆេះ និងបង្កអគ្គិភ័យបានដែរ។

អគ្គិភ័យខ្លាំងដែលមិនធ្លាប់មាន

ករណីអគ្គីភ័យនៅឆ្នាំ ១៦៥៧ ដែលស្ទើរតែបំផ្លាញទីក្រុងអេដូទាំងមូល។ គ្រប់គ្នារកផ្លូវចេញមិនឃើញ និងត្រូវ​អណ្តាត​​ភ្លើង​​ឆាប​ឆេះ។ លទ្ធផលមនុស្សជាង ១០ ម៉ឺននាក់បានស្លាប់។ ក្រៅពីនេះ មិនត្រឹម​តែករណីឆេះមួយនេះ នៅមានករណីឆេះជាច្រើនកើតឡើងនៅ Edo ។

សូមក្រឡេកមកមើលក្រុមពន្លត់អគ្គីភ័យ Hikeshi នៅសម័យ Edo ដែលសម័យនេះគេហៅថា អ្នកពន្លត់អគ្គីភ័យ។

មើលចុះ តើដំបងចម្រុះពណ៌នោះជាអ្វី?

តើធ្វើយ៉ាងណាអាចពន្លត់ភ្លើងដោយប្រើដំបូងទាំងនោះបាន?

ប្រហែលជាមនុស្សជាច្រើនឆ្ងល់ដូចនេះ ដូច្នេះហើយ ខ្ញុំនឹងពន្យល់ពីស្ថានភាពពន្លត់អគ្គីភ័យជាក់ស្តែង ដោយប្រើរូបភាពមួយផ្សេងទៀតឲ្យ​កាន់តែងាយយល់។

នេះហើយ ប៉ុន្តែមើលទៅដូចជាមិនមែនកំពុងពន្លត់ភ្លើងទាល់តែសោះមែនទេ?

ដោយសារអ្នកពន្លត់អគ្គីភ័យនៅសម័យអេដូមិនពន្លត់ភ្លើងនោះទេ អ្វីដែលពួកគេកំពុងធ្វើ គឺខំប្រឹងបំផ្លាញផ្ទះដែលមិនទាន់ឆេះក្បែរនោះ ដើម្បីកុំឲ្យ​ឆេះ​រាលដាល​ដល់​ផ្ទះ​អ្នក​ជិតខាង។

ការ​បំផ្លាញ​ផ្ទះ​​ជិត​ខាង ជា​មធ្យោបាយ​ការពារ​មិន​ឲ្យឆេះ​រាលដាល​តទៅ​ទៀត។ ជាការពិតណាស់ គេក៏ប្រើទឹកដែរ ប៉ុន្តែនេះប្រហែលជាដំណោះស្រាយដ៏ល្អបំផុតនៅសម័យដែលមិនមានម៉ាស៊ីនបូមទឹក និងមិនមានទឹកគ្រប់គ្រាន់សម្រាប់ពន្លត់ភ្លើង។

ចុះដំបងចម្រុះពណ៌នោះជាអ្វី? តើគេប្រើសម្រាប់បក់ឲ្យល្ហើយឬ?

តាមពិតទៅ វាគ្រាន់តែជាដំបងប្រើសម្រាប់លើកទឹកចិត្តប៉ុណ្ណោះ។ គេហៅថា Matoi តួនាទីរបស់វាគឺប្រើសម្រាប់លើកកម្ពស់ស្មារតីរបស់មិត្តរួមក្រុម ដែលកំពុងបំពេញភារកិច្ចពន្លត់អគ្គីភ័យ (និយាយតាមត្រង់គឺប្រតិបត្តិការបំផ្លិច​បំផ្លាញ) ដោយ​គ្រវី​ដំបង​ហើយ​ស្រែក​ខ្លាំងៗ ដើម្បីលើកទឹកចិត្តគ្រប់គ្នា។

ក្រុមវីរបុរស Hikeshi

សកម្មភាពលោតចូលអណ្តាតភ្លើងដ៏គ្រោះថ្នាក់ ដើរតួនាទីយ៉ាងសំខាន់ក្នុងការពន្លត់អគ្គីភ័យ ដោយធ្វើឲ្យ​ប្រជា​ជន Edo កោតសរសើរយ៉ាងខ្លាំង ហើយចាត់ទុក Hikeshi ដូចជាជាវីរបុរស។

ទម្រង់អាវក្រៅដែល Hikeshi ប្រើមានច្រើន នោះក៏ជាការសម្គាល់ដែលថា ក្រុម​ពន្លត់​អគ្គិភ័យមួយណាបានពន្លត់ភ្លើង។ នៅពេលដែលមានភ្លើងឆាបឆេះ គ្រប់គ្នាចង់ក្លាយជាមនុស្សដំបូង​គេ​លោត​ចេញពី​ភ្នក់​ភ្លើង ហើយលើកបង្ហាញ​អាវ​ក្រៅ​របស់​ខ្លួន។

ព្រោះនេះជាមោទនភាពរបស់អ្នកពន្លត់អគ្គីភ័យនៅសម័យនោះ ដូច្នេះគ្មានអ្វីចម្លែកឡើយ ដែលពួកគេតែងតែប្រកួតប្រជែងគ្នាដណ្តើមកន្លែង។ ប៉ុន្តែផ្ទុយទៅវិញ ប្រហែលជា​ប្រជាជនចង់ឲ្យ​ពួកគេផ្តោតលើការពន្លត់អគ្គីភ័យជាង។

ក្រៅពីបង្កើតក្រុម Hikeshi ទីក្រុង Edo ថែមទាំងបន្ថែមទន្លេតូចៗជាច្រើន ក្នុងគោលបំណងការពារការរីក​រាល​ដាល​ភ្លើង​ឆេះ។ រហូត​មក​ដល់​សព្វ​ថ្ងៃ​នេះ ជប៉ុន​នៅ​តែ​មាន​ការ​ភ័យ​ខ្លាច​ចំពោះ “អគ្គីភ័យ” ព្រោះ​អគារ​ភាគ​ច្រើន​ធ្វើ​​ពី​​ឈើ។

យ៉ាងណាមិញ ប្រទេសជប៉ុនក៏កំពុងធ្វើទំនើបកម្មផងដែរ ដើម្បីបង្កើនសុវត្ថិភាពទីក្រុង តាមរយៈការបង្កើតសម្ភារសំណង់​ដែល​មិនងាយ​ឆាប​ឆេះ និង​បង្កើន​ការ​ដំឡើង​ឧបករណ៍​ពន្លត់​អគ្គីភ័យ​ទំនើបៗ។

Abe Kengo