តើអ្នក​ដឹង​ទេ​ថា​រាជ​ធានី​របស់​ជប៉ុន​ស្ថិត​នៅ​ឯ​ណា?

នេះជាសំណួរដែលពិបាក តើអ្នកស្គាល់ទេថា រាជធានីជប៉ុនស្ថិតនៅឯណា?

នោះគឺទីក្រុង Tokyo គ្មានអ្វីពិបាកឡើយ។

មនុស្សភាគច្រើនប្រហែលជាឆ្លើយបែបនេះ ប៉ុន្តែចម្លើយមិនត្រឹមត្រូវនោះទេ។ Tokyo មិនមែនជារាជធានីរបស់ជប៉ុនឡើយ អ្នកប្រហែលជាឆ្ងល់ពេលដែលឮខ្ញុំនិយាយបែបនេះ យ៉ាងណាមិញ នេះជាការពិត ​ដែល​សូម្បី​តែ​ប្រជា​ជន​​ជប៉ុន​​ក៏​​មិន​​ដឹង​​ដែរ។

កាលពីមុន ជប៉ុនធ្លាប់ផ្លាស់រាជធានីទៅកាន់ខេត្ត Nara និង Kyoto សព្វថ្ងៃ។ ជប៉ុនជាប្រទេសដែលបង្កើតឡើងដោយមានព្រះចៅអធិរាជជាប្រមុខ ដូច្នេះមានច្បាប់ទម្លាប់មួយចែងថា រាជធានីជាកន្លែងដែលព្រះចៅអធិរាជ​គង់​នៅ។

Tokyo ត្រូវបានគេហៅថា Edo ក្នុងសម័យសាមូរ៉ៃ នៅទីនេះជាស្រុកកំណើតរបស់ត្រកូល Tokugawa ដែលជាអ្នកកាន់អំណាចប្រទេសនាពេលនោះ។ ប៉ុន្តែអំណាចរបស់ពួកគេត្រូវបានអនុញ្ញាតដោយអធិរាជ ដូច្នេះហើយ ទីនេះមិន​មែន​ជា​រាជធានី​របស់​ប្រទេស​នោះ​ទេ។

នៅពេលដែលយុគសម័យសាមូរ៉ៃបានបញ្ចប់ និងដំណើរការទំនើបកម្មនៃសម័យ Meiji ចាប់ផ្តើម។ គ្រួសារ Tokugawa បាន​ចាក​ចេញ ចំណែក​ឯ​អធិរាជ​យាង​ចូល​មក​កាន់ Edo ។

ក្រោយមក នៅទីនេះបាន​ប្តូរ​ឈ្មោះទៅជាទីក្រុង Tokyo ហើយ​បាន​ក្លាយ​ជា​រាជធានីរបស់ជប៉ុន។ យ៉ាងណាមិញ ស្ថាន​ភាព​នៅ​ក្នុង​ប្រទេស​ជប៉ុន​បានផ្លាស់ប្តូរយ៉ាងខ្លាំងបន្ទាប់ពីសង្គ្រាម។

និយាយពីរដ្ឋធម្មនុញ្ញ ក្រោយពេលជប៉ុនចាញ់សង្រ្គាម កម្លាំង​កាន់កាប់​បាន​ផ្លាស់ប្តូរចំណុចជាច្រើនក្នុង​រដ្ឋធម្មនុញ្ញរបស់​​ប្រទេសនេះ។ ចំណុចដែលផ្លាស់ប្តូរធំបំផុតគឺ វត្តមានរបស់អធិរាជ។

ព្រះចៅអធិរាជបន្តចាត់ទុកដូចជា “និមិត្តរូប” មិនមែនជាអ្នកនាំមុខប្រទេសជប៉ុនទៀតទេ។ ព្រោះតែមិនមែនជាប្រមុខ គំនិតពីមុនដែលថា កន្លែងដែលអធិរាជគង់នៅ​ជា​រាជធានីលែងត្រូវហើយ។

ចុះ​នៅ​ប្រទេស​ផ្សេង​វិញ? មាន​ប្រទេស​ជាច្រើនបញ្ជាក់​យ៉ាង​ច្បាស់ក្នុង​រដ្ឋធម្មនុញ្ញ​ ដើម្បីកំណត់ឲ្យ​ច្បាស់​រាជធានី​របស់​​ពួកគេនៅ​កន្លែង​ណា។

ក្នុងរដ្ឋធម្មនុញ្ញជប៉ុនក៏បានកំណត់អំពីនិយមន័យ “តំបន់រាជធានី” ផងដែរ។ តំបន់រាជធានីត្រូវគេកំណត់ថា “ជាតំបន់នៅ Tokyo និងតំបន់ជុំវិញ” ចំណុចនេះមានន័យថា រួមទាំងខេត្ត Saitama, Chiba និង Kanagawa ។

ជាងនេះទៅទៀត មិនមាននិយមន័យច្បាស់លាស់ចំពោះពាក្យ “តំបន់ជិតខាង” នោះទេ ដូច្នេះវាក៏អាចគ្រប​ដណ្តប់​ទៅ​ដោយ​តំបន់​ធំ​ទូលាយ​ផង​ដែរ។ ហេតុ​​នេះ Tokyo មិន​អាចហៅថា រាជធានីបានទេ ព្រោះក្នុងរដ្ឋធម្មនុញ្ញ​ជប៉ុនមិនបានកំណត់ច្បាស់រាជធានីឡើយ។

ដោយសារទីក្រុង Tokyo កំពុងតែដើរតួដូចជារាជធានី ដូច្នេះចម្លើយត្រឹមត្រូវគឺ “ទីក្រុង Tokyo ជា​រាជធានីមិនផ្លូវការ​របស់​ជប៉ុន” ។

ទោះជាយ៉ាងណា មនុស្សជាច្រើនគិតថា គ្រប់យ៉ាងនៅ Tokyo ។ Tokyo មិនត្រឹម​តែមានមុខងារជាក្បាលម៉ាសុីនរបស់រដ្ឋាភិបាលក្នុងនាមជារាជធានី រួមទាំងមុខងារសេដ្ឋកិច្ច និងហិរញ្ញវត្ថុផង​ដែរ។

ក្រៅពីនេះ ក៏មានមតិលើកឡើថា ហានិភ័យនៃគ្រោះមហន្តរាយដែលបណ្តាលមកពីរញ្ជួយដីនៅទីក្រុង Tokyo ខ្ពស់ ដូច្នេះ​ប្រសិនបើបង្កើតរាជធានីដែលរឹងមាំ ប្រហែលជប៉ុនគួរតែជ្រើសរើសកន្លែងដែលល្អជាង។

យើងតែងតែនិយាយពីប្រទេសជប៉ុនដែលស្រពេចស្រពិល សូម្បីតែជនជាតិជប៉ុនដូចជាខ្ញុំ ក៏មិនដឹងថា រាជធានីរបស់​ប្រទេស​ខ្លួន​មាន​ភាព​ស្រពេច​ស្រពិល​យ៉ាង​នេះដែរ។

Abe Kengo