សុជីវធម៌ក្នុងការទទួលទានអាហាររបស់ប្រជាជនជប៉ុន

ថ្ងៃចន្ទ 12/06/2023 | 15:57 ល្ងាច

អាកប្បកិរិយាគួរសមពេលទទួលទាននឹងធ្វើឲ្យអ្នកកាន់តែមានភាពទាក់ទាញជាងមុនដល់ទៅ ១០០ ដង។ ដូច្នេះហើយ ចូរយើងប្រកាន់យកភាពគួរសម ដើម្បីកុំឲ្យបាក់មុខមិនថាអ្នកទៅដល់ប្រទេសណាលើពិភពលោកក៏ដោយ។

តើអ្នកដឹងទេ មិនត្រឹមតែជប៉ុន សូម្បីតែបណ្តាប្រទេសនៅអឺរ៉ុប និងសហរដ្ឋអាមេរិក មនុស្សដែលនៅជុំវិញអ្នកប្រាកដជាសង្កេតមើលអាកប្បកិរិយាគួរសមពេលបរិភោគអាហាររបស់អ្នក។ មិនថាមនុស្សម្នាក់ស្អាតប៉ុណ្ណា ប្រសិនបើរបៀបទទួលទានមិនល្អ ប្រាកដជាបន្សល់ទុកអារម្មណ៍មិនល្អក្នុងក្រសែមនុស្សគ្រប់គ្នា។

ដូច្នេះហើយ អាកប្បកិរិយាគួរសមក្នុងការទទួលទានអាហារមិនត្រឹមតែប៉ះពាល់ដល់ស្នេហារបស់អ្នក រួមទាំងការងាររបស់អ្នកផងដែរ។ ប្រសិនបើអ្នកមិនដឹងពីសុជីវធម៌គួរតែមាន អ្នកងាយនឹងបរាជ័យក្នុងជីវិតណាស់។

១. ប្រើទូរស័ព្ទស្មាតហ្វូនពេលកំពុងទទួលទាន

នៅពេលយើងទទួលទានអាហារ ជាពេលដែលអាចរីករាយនឹងការសន្ទនាជាមួយមនុស្សនៅជុំវិញ។ ពេលយើងបរិភោគអាហារក្នុងមាត់ យើងអាចក្រេបយករសជាតិត្រឹមតែ ៣០% ប៉ុណ្ណោះ។ យ៉ាងណាមិញ អ្វីដែលអ្នកមើលឃើញ ឬបរិយាកាសការសន្ទនានៅពេលនោះទើបអាចនាំមកនូវរស់ជាតិឆ្ងាញ់ ១០០%។

ប្រសិនបើមនុស្សដែលសំខាន់ចំពោះអ្នកកំពុងអង្គុយទល់មុខអ្នក ហើយទទួលទានអាហារទាំងក្នុងដៃកាន់ស្មាតហ្វូន តើអ្នកអាចនឹងរីករាយបរិភោគអាហារឆ្ងាញ់ៗដែរទេ?

២. កុំឲ្យគ្រប់គ្នាមើលឃើញប្រហោងមាត់របស់អ្នក

នៅពេលដែលហូបបាយ និងជជែកគ្នា យើងទាំងអស់គ្នាត្រូវប្រើមាត់។ ប៉ុន្តែបើសិនជាយើងធ្វើសកម្មភាពទាំង ២ នេះក្នុងពេលតែមួយ ពិតជាអាក្រក់មើលណាស់។ ប្រសិនបើអ្នកហាមាត់ធំ ហើយនិយាយខណៈពេលដែលមាត់ពេញទៅដោយអាហារ តើអ្នកដទៃនឹងមានអារម្មណ៍ល្អទេពេលមើលឃើញ?

៣. កុំបង្វិលចង្កឹះផ្តេសផ្តាស

នៅពេលដែលការសន្ទនាឈានដល់ចំណុចកំពូល កាយវិការរាងកាយរបស់យើងកាន់តែច្រើនឡើង។ ប៉ុន្តែនៅពេលនោះ អ្នកគួរតែដាក់ចង្កឹះនៅលើតុ ព្រោះបើបង្វិលចង្កឹះផ្តេសផ្តាសពិតជាគ្រោះណាស់។ ម្យ៉ាងវិញទៀត អាចនឹងធ្វើឲ្យភាគីមានអារម្មណ៍មិនល្អ។

៤. កុំអង្គុយចំហជើងធំពេក

ប្រហែលដោយសារតែជិះម៉ូតូច្រើនពេក មនុស្សជាច្រើនមានទម្លាប់អង្គុយចំហជើងធំ។ ការដែលអង្គុយចំហជើងលើកៅអី ជាពិសេសមនុស្សស្រីអាចនឹងធ្វើឲ្យភាគីម្ខាងទៀតមានអារម្មណ៍មិនល្អ។ អាចនិយាយបានថា សកម្មភាពនេះជាទង្វើខ្វះសុជីវធម៌ជាជាងមិនសមរម្យ។

៥. កុំផឹកច្រើនពេក

នៅពេលដែលផឹកស្រានឹងធ្វើឲ្យអ្នកមានអារម្មណ៍ល្អ ប៉ុន្តែបើផឹកជ្រុលអាចបណ្តាលឲ្យអ្នកក្អួត។ ចំណុចនេះមើលទៅមិនសមរម្យនោះទេ។

ប្រសិនបើនោះជាពិធីជប់លៀងរវាងសិស្ស និងសិស្សវាអាចទទួលយកបាន ប៉ុន្តែចំពោះមនុស្សពេញវ័យគឺពិតជាអាក្រក់ណាស់។ ជាពិសេសនៅចំពោះមុខមនុស្សដែលសំខាន់សម្រាប់អ្នក អាកប្បកិរិយានេះមិនអាចទទួលយកបានទេ។

ប្រហែលជាអ្នកគិតថា ប្រជាជនកម្ពុជាមិនខ្វល់ពីរឿងទាំងនេះទេ ប៉ុន្តែខ្ញុំគិតថា មិនមែនដូច្នេះទេ។ ចំនួនជនបរទេសចូលមករស់នៅក្នុងប្រទេសកម្ពុជាកាន់តែច្រើនឡើង។ ផ្ទុយទៅវិញ ចំនួនប្រជាជនកម្ពុជាដែលមានឱកាសចេញទៅរស់នៅក្រៅប្រទេសក៏កើនឡើងដែរ។ ដូច្នេះអ្នកអាចសួរពួកគេថា តើគំនិតនេះត្រូវ ឬខុស។

បើសូម្បីតែខ្លួនឯងក៏មិនចេះគួរសម ធ្វើយ៉ាងណាអាចបង្រៀនកូនមែនទេ? តើអ្នកធ្លាប់ស្រមៃគិតថា កូនអ្នកអាចនឹងត្រូវគេសើចចំអកដែរទេ?

Abe Kengo