ទម្រង់​ការ​ងារ​លួច​លាក់​តែ​ទទួល​បាន​ប្រាក់​ចំណូល​ខ្ពស់​នៅ​ជប៉ុន

មិនដូចជាការងារធម្មតាទេ ការងារក្រៅម៉ោងគឺជាការងារបណ្តោះអាសន្ន។ ដូច្នេះហើយ មនុស្សគ្រប់គ្នាច្រើន​តែ​រើស​​យក​ការ​ងារ​តាម​ម៉ោង​ដែល​ទទួល​បាន​ប្រាក់​ខែ​ខ្ពស់។

បច្ចុប្បន្ននេះ ប្រាក់ខែតាមម៉ោងជាអប្បបរមានៅទីក្រុងតូក្យូគឺ ១.០៧២ យ៉េនក្នុងមួយម៉ោង។ ស្តាប់ទៅដូចជាខ្ពស់ ប៉ុន្តែ​បើ​ប្រៀប​នឹង​ការ​ចំណាយ​ខ្ពស់​នៅ​ទីក្រុង​តូក្យូ ប្រាក់​ខែ​នេះ​មិន​គ្រប់​សម្រាប់​ការ​ចំណាយ​នោះ​ទេ។

ក្រោមស្ថានភាពដូចនេះ បានលេចឡើងទម្រង់ “ការងារលួចលាក់” ជាមួយនឹងប្រាក់ចំណូលខ្ពស់នៅប្រទេស​ជប៉ុន។ ឥឡូវ​នេះ ចូរ​យើង​ស្វែង​យល់​អំពី​ការ​ងារ​លួចលាក់មានប៉ុន្មានប្រភេទ? ប្រាក់ចំណូលប៉ុន្មាន? ហើយចាប់ផ្តើម​លេច​ឡើង​តាំង​ពី​ពេល​ណា?

លក់ឈាម

(黄色い血 អាចប្រែថា “ជំនាញលក់ឈាម” ដែលសំដៅលើមនុស្សម្នាក់លក់ឈាមច្រើនដង ចាត់ទុកជាប្រាក់ចំណូលចម្បងសម្រាប់ផ្គត់ផ្គង់ជីវភាព) ។

ប្រភពឯកសារយោងការបកប្រែ៖ Google Scholar

https://www.jstage.jst.go.jp/article/faruawpsj/45/1/45_KJ00009581040/_article/-char/ja/

ដោយសារមានមនុស្សជាច្រើនទាញយកប្រយោជន៍ពីការងារនេះ ដូច្នេះបញ្ហាជួញដូរឈាមត្រូវរដ្ឋាភិបាលជប៉ុនហាមឃាត់។ សព្វថ្ងៃមានតែអ្នកស្ម័គ្រចិត្តប៉ុណ្ណោះ ទើបអាចបរិច្ចាគឈាមបាន។

រដ្ឋាភិបាលក៏បានកំណត់បរិមាណឈាមដែលអាចបរិច្ចាគ និង​រយៈ​ពេល​ដែល​អាច​បរិច្ចាក​ឈាម​បន្ទាប់ ដូច្នេះ​បញ្ហានេះ​ហាក់​ដូច​​ជា​​កាត់​បន្ថយ​បន្តិច​ម្តងៗ។

ថ្វីត្បិតតែនិយាយបែបនេះ ប៉ុន្តែតើបរិមាណឈាមដែលត្រូវការ ពិតជាត្រូវបានផ្តល់ដោយឈាមរបស់អ្នកបរិច្ចាក​​​ស្ម័គ្រ​​ចិត្ត​ឬ? ដូច្នេះជាក់ស្តែង ទម្រង់លក់ឈមលួចលាក់ ប្រហែលជានៅតែមានក្នុងប្រទេសជប៉ុន។

គ្រាន់តែរើចូលផ្ទះមួយ ហើយរស់នៅទីនោះ អ្នកនឹងទទួលបានប្រាក់ ៣០០.០០០ យ៉េន (ប្រហែល ២១៤៦ ដុល្លារ)

គ្រាន់​តែ​ចូល​ទៅ​រស់​នៅ​ក្នុង​ផ្ទះ​ដែល​បាន​កំណត់ បន្ទាប់មកអ្នកនឹងទទួលបានប្រាក់ចំនួន ៣០ ម៉ឺនយ៉េន។ ប្រាក់ខែបែបនេះគួរឲ្យទាក់ទាញណាស់មែនទេ? ជាក់ស្តែងការងារនេះ អ្នកត្រូវរើចូលនៅផ្ទះដែលធ្លាប់កើត​មាន​អំពើ​ឃាតកម្ម។

ប្រសិនបើផ្ទះធ្លាប់មានមនុស្សស្លាប់ គ្រប់គ្នាប្រាកដជាមិនចង់រើចូលនៅនោះទេ។

ប្រសិនបើគ្រួសារមានសាច់ញាតិទទួលមរណភាពក្នុងផ្ទះមិនជាបញ្ហាឡើយ ប៉ុន្តែបើដឹងថា ផ្ទះនោះមានមនុស្សស្លាប់ ហើយជាមនុស្សដែលយើងមិនស្គាល់ ជាពិសេសផ្ទះដែលធ្លាប់កើតមានករណីឃាតកម្ម គ្រប់គ្នានឹងគិតថា ផ្ទះបែបនោះមាន “វិញ្ញាណអាក្រក់” មិនហ៊ានរើចូលនៅ។

ទោះបីជាច្បាប់មិនបានកំណត់ក៏ដោយ ប៉ុន្តែតាមទម្លាប់ យើងត្រូវជូនដំណឹងដល់អ្នកដែលទើបតែរើចូលថ្មីដូចជា “ផ្ទះនេះធ្លាប់មានករណីឃាតកម្ម” អំឡុងពេល ៣ ឆ្នាំបន្ទាប់ពីហេតុ​ការណ៍កើតឡើង។

ពិតជាពិបាកណាស់ចំពោះម្ចាស់ផ្ទះ ដែលមិនទទួលបានប្រាក់ឈ្នួលរយៈពេល ៣ ឆ្នាំ។ ដូច្នេះទើបបង្កើតជាទម្រង់​ការ​ងារ​នេះ។ ម្យ៉ាង​វិញ​ទៀត ការ​ងារ​បែប​នេះ​មិន​អាច​ជ្រើសរើសអ្នកធ្វើដោយបើកចំហនោះទេ បានជាគេចាត់ទុកក្នុងទម្រង់​ការ​ងារ​លួច​លាក់។

ក្រោយករណីឃាតកម្ម ប្រសិនបើមាននរណាម្នាក់រស់នៅក្នុងផ្ទះមួយរយៈពេល ហើយបញ្ជាក់ថាគ្មានបញ្ហាអ្វីនោះ ដូច្នេះ​ម្ចាស់​ផ្ទះមិនចាំបាច់ជូនដំណឹងដល់អ្នកជួលបន្ទាប់ឡើយ។

និយាយអញ្ចឹង ប្រសិនបើផ្ទះធ្លាប់កើតមានអំពើឃាតកម្ម​សម្លាប់​មួយគ្រួសារ តើអ្នកហ៊ានរើចូលនៅដែរទេ?

គ្រាន់តែសម្អាត “របស់នោះ” អ្នកនឹងទទួលបានប្រាក់ ៥ ម៉ឺនយ៉េនក្នុងមួយថ្ងៃ

ការងារលាងសម្អាតក្រៅម៉ោងមានច្រើនប្រភេទដូចជាលាងចាន បោសសម្អាតអគារ ប៉ុន្តែមិនងាយនឹងទទួលបាន​ប្រាក់​ខែ​ដូច​ខាង​លើ​នោះ​ទេ។

ជាការពិតណាស់ សម្អាត “របស់នោះ” ចង់សំដៅលើការសម្អាត “សាកសព” ។

ចំពោះជំនាញវេជ្ជសាស្ត្រ និងពេទ្យធ្មេញ វះកាត់សាកសពជាកម្មវិធីសិក្សារបស់សាកលវិទ្យាល័យ។ ជាទូទៅមួយក្រុមមាន ៤ នាក់ នឹង​ទទួល​បាន​សាក​សព​មួយ បន្ទាប់មកគេបែងចែករាងកាយជាច្រើនផ្នែក ដើម្បីស្រាវជ្រាវ និងស្វែង​យល់។ នេះ​ជា​មុខ​វិជ្ជា​​សំខាន់​​ណាស់​សម្រាប់​អ្នក​រៀន​ផ្នែក​ពេទ្យ។

មុខវិជ្ជាវះកាត់សាកសពសំខាន់ណាស់ សូម្បីតែសាលាដែលបណ្តុះបណ្តាលពេទ្យធ្មេញ ក៏ដាក់បញ្ចូលក្នុងកម្មវិធីសិក្សា នៅពេលដែលសិស្សអនុវត្តអនាម័យ​មាត់​ធ្មេញ។

ប្រសិនបើអ្នកចង់បរិច្ចាគរាងកាយសម្រាប់បម្រើដល់ការស្រាវជ្រាវ អ្នកត្រូវចុះហត្ថលេខាលើកិច្ចព្រមព្រៀងក្រោយពេល​ស្លាប់ អ្នកនឹងបរិច្ចាគរាងកាយរបស់ខ្លួនទៅឱ្យនិស្សិតស្រាវជ្រាវ។

ថ្វីត្បិតតែទទួលបានសាកសព ភ្នាក់ងារ​ទទួលយកត្រូវការអ្នកសម្អាតសាកសពទាំងនោះ។ ដូច្នេះ អ្នកប្រាកដជាយល់​ហើយ​ហេតុ​​អ្វី​បាន​​ជា​​មាន​ទម្រង់​ការ​ងារ​នេះ។

ជាទូទៅការងារនេះមានមនុស្ស ២ នាក់ធ្វើជាមួយគ្នា លាងសម្អាតរាងកាយសាកសព កោរ​រោម​ទាំង​អស់​លើ​រាងកាយ ញាត់​សំឡី​តាម​រន្ធ​ដែល​នៅ​លើរាងកាយ ដើម្បីជៀសវាងសារធាតុហូរចេញពីរាងកាយ។

តាមពិតទៅ ទម្រង់ការងារលួចលាក់ទាំងនេះគ្មានអ្វីអាក្រក់នោះទេ គ្រាន់តែវាផ្តល់ឱ្យអ្នកប្រាក់ចំណូលបណ្តោះអាសន្ន​​ប៉ុណ្ណោះ ផ្ទុយ​ទៅ​វិញ អ្នក​ត្រូវ​រង​ផល​ប៉ះ​ពាល់​ផ្លូវ​កាយ ឬផ្លូវចិត្តនៅពេលក្រោយ។

ខ្ញុំគិតថា មានតែការខិត​ខំ​ប្រឹង​ប្រែង​ បណ្តុះជំនាញ និងបង្កើនតម្លៃខ្លួនឯង ដើម្បីទទួលបានប្រាក់ខែខ្ពស់ ទើបជា​​មធ្យោបាយ​​ដែល​​ល្អ​​បំផុត។

Abe Kengo