សាម៉ូរ៉ៃប្រើដៃដែលត្រូវគេកាត់យកធ្វើជាអាវុធសម្រាប់ប្រយុទ្ធ

ថ្ងៃចន្ទ 29/05/2023 | 10:16 ព្រឹក

សាមូរ៉ៃតែងតែយកដាវតាមខ្លួនជានិច្ច និងត្រូវត្រៀមខ្លួនប្រយុទ្ធគ្រប់ពេលដែលសត្រូវវាយប្រហារ។ ដូច្នេះហើយ ពួកគេមិនងាយមានពេលបន្ធូរអារម្មណ៍សម្រាកដូចជាងូតទឹក ឬចូលគេងនោះទេ។

ជាទូទៅ ប្រសិនបើសត្រូវចង់ធ្វើឃាតសាមូរ៉ៃមួយរូប ពួកគេនឹងជ្រើសយកកន្លែងពីរនោះគឺ បន្ទប់ទឹក និងអាងងូតទឹក។ មូលហេតុព្រោះថាសាមូរ៉ៃមិនអាចចូលបន្ទប់ទឹកបានទេ បើពួកគេមិនដោះសំលៀកបំពាក់ ដូច្នេះនេះជាឱកាសដ៏ល្អបំផុតសម្រាប់វាយឆ្មក់។ នៅសម័យនោះធ្លាប់មានសាមូរ៉ៃជាច្រើននាក់ស្លាប់ ដោយសារតែត្រូវវាយឆ្មក់នៅក្នុងអាងងូតទឹក។

ទោះជាយ៉ាងណា ក្រោមស្ថានភាពស្រដៀងគ្នានេះ ក៏មានសាមូរ៉ៃមួយរូបអាចវាយបកសត្រូវតាមមធ្យោបាយរបស់ខ្លួន គាត់មានឈ្មោះថា Kodera Nobumasa ។ លោកកើតនៅឆ្នាំ ១៦៨២ ជាសាមូរ៉ៃនៃត្រកូល Dewa Tsuruoka ។

ថ្ងៃមួយ នៅពេលដែល Kodera កំពុងបន្ធូរអារម្មណ៍ក្នុងអាងងូតទឹក គាត់ត្រូវសត្រូវវាយឆ្មក់។ ព្រោះតែមិនមានអាវុធ ឬវត្ថុដែលអាចការពារខ្លួនបាន សាមូរ៉ៃ Kodera ត្រឹមតែអាចគេចពីផ្លែដាវរបស់សត្រូវប៉ុណ្ណោះ។

លទ្ធផលដៃឆ្វេងរបស់ Kodera ត្រូវកាត់ដាច់ គាត់ឈឺយ៉ាងខ្លាំង ថែមទាំងក្អួតឈាម។ ស្មានតែ Kodera ត្រូវចុះចាញ់ទៅហើយ ប៉ុន្តែគាត់បែរជាកាន់ដៃដែលដាច់របស់ខ្លួន ហើយប្រើវាដូចជាដំបងសម្រាប់ប្រយុទ្ធ ទើបអាចបណ្តេញសត្រូវបាន។

គ្រាន់តែស្រមៃមើលទិដ្ឋភាពនោះ មនុស្សជាច្រើនប្រាកដជាគិតភ្លាមថា មិនគួរអោយជឿ។ ថ្វីត្បិតតែត្រូវកាត់ដាច់ដៃ ប៉ុន្តែ Kodera អាចរក្សាជីវិតរបស់ខ្លួន ដោយសារឆន្ទៈដ៏មុតមាំរហូតដល់ទីបញ្ចប់។

ទោះជាយ៉ាងណាក៏ដោយ មនុស្សជាច្រើនគិតថា ប្រសិនបើ Kodera ទុកដាវឈើមួយនៅក្នុងបន្ទប់ទឹក នោះគ្រប់យ៉ាងមិនទៅជាអញ្ចឹងឡើយ។ ដូច្នេះ ពេលខ្លះយើងមិនគួរវាយតម្លៃកម្លាំងរបស់ខ្លួនពេកទេ យើងខ្វះការប្រុងប្រយ័ត្នចំពោះគ្រប់យ៉ាងដែលនៅជុំវិញ។

Kengo Abe