ព្រះ​តេជ​គុណ​ Kanho Yakushiji ច្រៀង​បទច​ម្រៀង​ពុទ្ធ​សាសនា​តាម​តន្រ្តី​រ៉ុក

ព្រះតេជគុណជនជាតិជប៉ុន លោកបង Kanho Yakushiji ធ្លាប់បង្កការភ្ញាក់លើបណ្តាញសង្គមជាមួយនឹង​បទ​ចម្រៀង​ដែល​​​រួម​​បញ្ចូល​​ចម្រៀង​​ព្រះ​​ពុទ្ធ​​សាសនា និង​​តន្ត្រី​រ៉ុក។

ព្រះតេជគុណ Kanho Yakushiji ។ រូបភាព៖ Tricycle

កាលពីជិត ៥ ឆ្នាំមុន វីដេអូសម្តែងបទ Heart Sutra, Nīlakaṇṭha Dhāraṇī ។ល។ បានទាក់ទាញអ្នកមើលជាច្រើន​លាន​នាក់​នៅ​លើ YouTube ។ រហូតមកដល់ពេលនេះ ព្រះតេជគុណ Yakushiji បាន​ថត​អាល់ប៊ុម​ចំនួន​បី ធ្វើដំណើរទៅ​សម្តែង​នៅ​ប្រទេស​ជប៉ុន ចិន តៃវ៉ាន់ និងទទួលបានការគាំទ្រជាច្រើន។

ព្រះតេជគុណ Yakushiji កើតនៅឆ្នាំ ១៩៧៩ នៅ Imabari ទីក្រុងមួយក្នុងខេត្ត Ehime ប្រទេសជប៉ុន ដោយមានឪពុកជាចៅអធិការវត្ត Kaizenji ។ យោងតាម​គេហទំព័រ Tricycle ភាគច្រើនព្រះពុទ្ធសាសនានៅជប៉ុន ឪពុកបន្តទៅអោយ​កូន ដូច្នេះ​​លោក​​បង​​ត្រូវ​បាន​ណែនាំ​អោយ​ក្លាយ​ទៅ​ជា​ព្រះសង្ឃមួយរូប។

ព្រះតេជគុណ Kanho Yakushiji បង្ហាញបទ Heart Sutra ដែលមានអ្នកមើលជាង ៤ លាននាក់។ Video: YouTube Japanese Zen Music – Kanho Yakushiji.

ទោះជាយ៉ាងណា លោកបង Yakushiji ស្រលាញ់តន្រ្តីតាំងពីក្មេង កាលអាយុ ២០ ឆ្នាំធ្លាប់បង្កើតក្រុមតន្ត្រីដើម្បីដើរ​តាម​​ក្តី​​ស្រមៃ​​សិល្បៈ​​របស់​​ខ្លួន។ លោក​​បង​​និយាយ​ថា “តន្រ្តីជាផ្លូវរបស់ខ្ញុំ” ។

បើតាមសារព័ត៌មាន AP បទចម្រៀងដំបូងរបស់លោកបងជាបទប៉ុប ឬបទប្រជាប្រិយ ដែលភាគច្រើនសរសេរអំ​ពី​គ្រួសារ មិត្ត​ភក្តិ និង​ស្រុក​កំណើត។

នៅ​ប្រទេស​ជប៉ុន ព្រះសង្ឃ​ត្រូវ​បាន​អនុញ្ញាតអោយរៀបការ មាន​កូន បរិភោគ​សាច់ និង​​ពិសា​​ស្រា​​ដូច​​មនុស្ស​​ធម្មតា។ រូប​ភាព៖ Tricycle

កាលអាយុ ២៧ ឆ្នាំ ក្រុមតន្រ្តីបានចុះហត្ថលេខាជាមួយនឹងកន្លែងថតសំឡេងធំ​មួយ​នៅជប៉ុន។ “នៅពេលនោះ យើង​ចាប់​ផ្តើម​ជួប​បញ្ហា​ដំបូង ពេល​​ទើប​តែ​ចាប់​ផ្តើម យើងប្រឹងប្រែង និងធ្វើគ្រប់យ៉ាងដោយខ្លួនឯង ប៉ុន្តែបរិយា​កាស​​​ស្រាប់​​តែ​​ផ្លាស់ប្តូរបានធ្វើឱ្យយើងត្រូវសហការជាមួយមនុស្សជាច្រើន ដើម្បីផលិតតន្រ្តី… ខ្ញុំលែងដឹងថាខ្លួនចង់​បង្ហាញ​ពី​អ្វី​ទៀតហើយ រហូតបាត់បង់អារម្មណ៍លែងចង់ច្រៀង។ នៅពេលដែលខ្ញុំសម្រេចចិត្តផ្អាក ខ្ញុំបាន​អាន​សៀវ​ភៅព្រះ​ពុទ្ធ​សាសនា” នេះបើតាមអ្វីដែលលោកបងបានចែករំលែកប្រាប់ Tricycle ។

ក្នុងការប្ររគុំតន្ត្រីរបស់ក្រុមចម្រៀងនៅលើកោះ Kyushu ទស្សនិកជនវ័យចំណាស់ម្នាក់បានយំ និងនិយាយយ៉ាងរំជួលចិត្តពេលឮពួកគេច្រៀង ព្រោះ​បទ​ចម្រៀង​​រំលឹក​​ពី​​វ័យ​​កុមារ​​ភាព និងមនុស្សជាទីស្រលាញ់របស់គាត់។ “ស្រាប់​តែ​នៅ​​ពេល​​នោះ ទើបខ្ញុំដឹងថា ព្រះពុទ្ធសាសនាក៏ដូចជាតន្រ្តី។ ផ្លូវ​ឆ្ពោះ​ទៅ​រក​ព្រះ​សង្ឃ និង​តន្ត្រីករ​មួយរូប​មិន​ឆ្ងាយ​​ប៉ុន្មាន​​​​ឡើយ” លោក​​បង​បាន​និយាយ។

ក្រោយមក លោកបងនិពន្ធបទ I am និយាយពីដំណើរស្វែងរកខ្លួនឯង ក៏ដូចជាពិចារណាទៅលើការបួស។ រហូតដល់អាយុ ៣៦ ឆ្នាំ លោក​បង​ត្រឡប់​ទៅ​រក​​ការ​​បួស​វិ​ញ ចំណាយពេលរាប់សិបម៉ោងដើម្បីអង្គុយសមាធិ សម្អាត ដាំបន្លែ ដើរបិណ្ឌ​បាត។

នៅឆ្នាំ ២០១៦ ពេលដែលលោកបងនិពន្ធទំនុកចម្រៀង Heart Sutra លោកបង Yakushiji គិតចង់បង្ហាញពីព្រះ​ពុទ្ធ​សាសនា​តាមលក្ខណៈផ្ទាល់ខ្លួន។ “ខ្ញុំបានដឹងថា ខ្លួនមិនចាំបាច់បែងចែកតន្រ្តី និងព្រះពុទ្ធសាសនាទៀតទេ។ ខ្ញុំ​​គ្រាន់​​​តែ​​​ជា​​ខ្លួន​​ឯង និងចង់បង្ហាញពីអត្តន័យរបស់ខ្លួន” លោកបងបាននិយាយ។

ប្រភព៖ Tricycle