អាថ៌កំបាំង​ដែលជួយអោយលោកយាយ Fusa Tatsumi មាន​វ័យ​ចំណាស់​ជាង​គេ​នៅ​ជប៉ុន

សព្វថ្ងៃនេះលោកយាយ Fusa Tatsumi ទើបតែបានធ្វើខួបកំណើតអាយុ ១១៦ ឆ្នាំ និងក្លាយជាអ្នកមានអាយុចំណាស់​​ជាង​គេ​ទី ២ នៅលើ​ពិភព​លោក បន្ទាប់ពីស្ត្រីជនជាតិអេស្ប៉ាញ (អាយុជាង ១១៦ ឆ្នាំ) ។

លោកយាយ Fusa Tatsumi ជាអ្នកដែលមានអាយុចំណាស់ជាងគេនៅជប៉ុនសព្វថ្ងៃនេះ។ រូបភាព៖ Mainichi

យោងតាម​អ្នកជំនាញជប៉ុនបានបញ្ជាក់ អ្នកអាយុជាង ១០០ ឆ្នាំត្រឹម​ ២០% ដែល​មក​ពី​កត្តា​​ហ្សែន ខណៈ​ដែល​ទម្លាប់​ក្នុង​ការ​បរិភោគ និង​ការ​រស់​នៅ​មាន​តុល្យភាព​ជាកត្តាសំខាន់។

លោកយាយ Fusa កើតនៅថ្ងៃទី ២៥ ខែមេសា ឆ្នាំ ១៩០៧ ពោលគឺឆ្នាំ Meiji ទី ៤០ នៅទីក្រុង Yao ខេត្ត Osaka ហើយ​បាន​ឆ្លង​កាត់​សម័យ​កាល​នយោបាយ​ជប៉ុនទាំង ៥ រួមមានសម័យ Meiji, Taishō, Shōwa, Heisei និង Reiwa ។

លោកយាយមានកូន ៣ នាក់ លោក Kanji ជាកូនប្រុសដែលបានរស់នៅជាមួយលោកយាយរហូតដល់យាយមាន​អាយុ ១០៦ ឆ្នាំ មុនពេលលោកយាយត្រូវបានបញ្ជូនទៅមណ្ឌលថែទាំពិសេសក្នុងទីក្រុង Kashiwabara ។

លោក Kanji បាននិយាយថា គ្រួសាររបស់គាត់គ្មានហ្សែនអាយុវែងនោះទេ ចំណែកឯអាថ៌កំបាំងអាយុវែងរបស់លោក​យាយ Fusa បាន​មក​ពី​ការ​រស់​នៅ​មាន​ភាព​រីក​រាយ ការបរិភោគ និងសម្រានមានតុល្យភាព។

លោកបន្តទៀតថា ពីមុនរហូតមកដល់ពេលនេះ ម្តាយគាត់តែងតែទទួលទានបាយ ៣ ពេលក្នុងមួយថ្ងៃយ៉ាងទៀងទាត់ ធ្វើលំហាត់ប្រាណ មិន​ចូល​គេង​យប់​ជ្រៅ និងកម្រឃើញគាត់ខឹងណាស់។

យោងតាមក្រសួងសុខាភិបាល ការងារ និងសុខុមាលភាពជប៉ុន ចំនួនមនុស្សចាស់ដែលមានអាយុជាង ១០០ ឆ្នាំនៅជប៉ុនកើនឡើងគួរអោយកត់សម្គាល់តាំងពីឆ្នាំ ១៩៧១ ។

ក្នុងឆ្នាំ ១៩៥៦ នៅប្រទេសជប៉ុនចំនួនមនុស្សចាស់មានអាយុជាង ១០០ ឆ្នាំមានចំនួន ១.០០០ នាក់ កើនឡើងដល់ ១០.០០០ នាក់ក្នុងឆ្នាំ ១៩៩៨ និង ៥០.០០០ នាក់ក្នុងឆ្នាំ ២០១២ និងចំនួនដែលគួរអោយកត់សម្គាល់នៅខែកញ្ញា ឆ្នាំ ២០២២ ជាង ៩០.០០០ នាក់។ ក្នុង​នោះស្រ្តីមានចំនួនជាង ៨០.០០០ នាក់ ដែលប្រហែល ៩០% ។

យោង​តាមស្ថិតិដែលប្រកាសដោយក្រសួងសុខាភិបាល ការងារ និងសុខុមាលភាពជប៉ុន កាលពីខែកក្កដា ឆ្នាំ ២០២០ ស្ត្រីមានអាយុជាមធ្យម ៨៧,៧៤ ឆ្នាំ និងបុរសមានអាយុជាមធ្យម ៨១,៦៤ ឆ្នាំ។

បើប្រៀបជាមួយប្រទេស និងដែនដីផ្សេងទៀត អាយុរបស់ស្រ្តីជប៉ុនខ្ពស់ជាងទី ២ បន្ទាប់ពីតំបន់រដ្ឋបាលពិសេស​ហុង​កុង ខណៈ​ដែល​អាយុ​របស់​បុរស​​ជប៉ុន​​ខ្ពស់​ជាង​ទី ៣ បន្ទាប់ពីហុងកុង និងស្វីស។

ប្រភព៖ Mainichi