ប្រជាជន​ជប៉ុន​ចូល​រួម​ថ្នាក់​បង្រៀន​ញញឹម​កើន​បន្ទាប់​ពី​បទ​ប្បញ្ញត្តិ​កូវីដ ១៩ ត្រូវ​បាន​ដក​ចេញ

នៅទីក្រុង Tokyo ក្នុងបន្ទប់មួយដែលមានមនុស្សចំនួន ៣៧ នាក់កំពុងរៀនញញឹម ដើម្បីត្រៀមខ្លួននៅពេលដែល​ជប៉ុន​លុបចោលបទប្បញ្ញត្តិពាក់ម៉ាស់​ការ​ពារ​ជំងឺ​រាត​ត្បាត។

គ្រូបង្រៀនឈ្មោះ Keiko Kawano អាយុ ៤៩ ឆ្នាំបាននិយាយថា នៅពេលដែលការពាក់ម៉ាស់បានក្លាយជាទម្លាប់ គ្រប់​គ្នា​មិន​សូវ​មាន​ឳកាស​ញញឹម ហើយមនុស្សជាច្រើនមានអារម្មណ៍ថាទើសទាល់។ ថ្នាក់បង្រៀននេះជួយអោយអ្នក​រាល់​គ្នា​ហ្វឹក​ហាត់ និង​បន្ធូរ​សាច់​ដុំ​មុខ ដើម្បី​ស្នាម​ញញឹម​ដ៏​ស្រស់​ស្អាត។

អ្នកចូលរួមម្នាក់ឈ្មោះ Yasuko Watarai បានអោយដឹង គាត់ចង់អនុវត្តអ្វីដែលបានរៀនក្នុងសកម្មភាពស្ម័គ្រចិត្ត និង​ការ​ជួបជុំ​គ្នា​ផ្សេង​ទៀត។ “ស្នាមញញឹមមិនត្រឹម​តែបង្កើតអារម្មណ៍ល្អចំពោះអ្នកដទៃ ជួយសម្រួលដល់ការប្រា​ស្រ័យ​ទាក់​ទង​គ្នា​ប៉ុណ្ណោះ​ទេ ថែម​ទាំង​ជួយ​ឱ្យ​អ្នក​មាន​អារម្មណ៍​វិជ្ជមាន​ផង​ដែរ” ។

អ្នកចូលរួមថ្នាក់បង្រៀនញញឹមនៅខណ្ឌ Akabane ទីក្រុងតូក្យូ កាលពីថ្ងៃ​ទី​ ៣ ខែ​ឧសភា។ រូបភាព៖ Asahi

អាជ្ញាធរមូលដ្ឋាន និងអាជីវកម្មជាច្រើនបានរៀបចំថ្នាក់រៀនញញឹមតាំងពីឆ្នាំមុន ប៉ុន្តែតម្រូវការកំពុងកើនឡើងយ៉ាងខ្លាំង បន្ទាប់ពីរដ្ឋាភិបាលបានទម្លាក់កម្រិតជំងឺកូវីដ ១៩ មកស្មើជំងឺផ្តាសាយ។ នៅកន្លែងជាច្រើនថែមទាំងបណ្តុះ​បណ្តាល​វគ្គរៀនញញឹម។

ប្រធានក្រុមហ៊ុន “បង្ហាញស្នាមញញឹម” Miho Kitano បានអោយដឹងថា គាត់កំពុងតែរវល់ខ្លាំង ព្រោះគ្រប់គ្នាចង់មើលឃើញស្នាមញញឹមឡើងវិញ។ “ប្រជាជនជប៉ុនបានពាក់ម៉ាស់អស់រយៈពេលជាង ៣ ឆ្នាំមកហើយ មនុស្សជាច្រើន​និយាយ​ថា ពួក​គេ​ស្ទើរតែភ្លេចពីរបៀបញញឹមទៅហើយ” ។

អ្នកស្រីទាយដឹងពីទំនោរនេះក៏បានបង្កើតក្រុមហ៊ុននៅឆ្នាំ ២០១៨ ដោយផ្តល់ជូនវគ្គសិក្សាអនឡាញ និងផ្ទាល់អំពីរបៀបបង្ហាញស្នាមញញឹមដ៏ល្អឥតខ្ចោះ។ តាំងពីពេលដែលរដ្ឋាភិបាលបានបន្ធូរបន្ថយបទប្បញ្ញត្តិពាក់ម៉ាស់ ចំនួនអតិថិជនកើនឡើងយ៉ាងខ្លាំង។ បច្ចុប្បន្នអ្នកស្រីមានអតិថិជនប្រហែល ៣.០០០ នាក់នៅទូទាំងទីក្រុងតូក្យូ និងថ្នាក់បង្រៀនគ្រូម្នាក់សិស្សម្នាក់ក្នុងរយៈពេល ១ ម៉ោងមានតម្លៃ ១១.០០០ យ៉េន។

Kitano បាននិយាយថា “ស្នាមញញឹមជារឿងធម្មជាតិ និងសំខាន់ណាស់ ព្រោះនោះជាសញ្ញាប្រាប់មនុស្សដែលយើង​ជួប​ថា​យើង​ទទួល​យក​ពួក​គេ។ ស្នាមញញឹមត្រូវតែមានលក្ខណៈធម្មជាតិ ដើម្បីទាក់ទាញមនុស្សនៅចំពោះមុខ ប៉ុន្តែ​សម្រាប់​អ្នក​ដែល​មិន​សូវ​ញញឹម​ច្រើន ខួរក្បាលនឹងភ្លេចពីរបៀបប្រើសាច់ដុំមុខ” ។

ចំណុចនេះបានក្លាយជាបញ្ហាធ្ងន់ធ្ងរ នៅពេលដែលគ្រប់គ្នាលាក់អារម្មណ៍វិជ្ជមានរបស់ខ្លួនក្រោមម៉ាស់មុខ។ បើតាម Kitano ស្នាមញញឹមដែលល្អបំផុត​​ពេល​​បង្ហាញ​ពី​ជួរ​ធ្មេញ​ខាង​លើ និងក្រសែភ្នែកស្រទន់ ប៉ុន្តែយ៉ាងណាស្នាមញញឹម​ទាំង​អស់​សុទ្ធ​តែ​មាន​ប្រយោជន៍។

ថ្វីត្បិតតែមិនបង្ខំអោយពាក់ម៉ាស់នៅកន្លែងសាធារណៈ យ៉ាងណាប្រជាជនជប៉ុនភាគច្រើនកំពុងពាក់ម៉ាស់។ យោង​តាម​កាសែត Asahi ប្រជាជន ៦០% នៅជុំវិញ Tokyo បន្តពាក់ម៉ាស់នៅកន្លែងសាធារណៈ។

ប្រភព៖ Telegraph, Asahi