អាថ៍កំបាំង​ដែល​កសិករ​ជប៉ុន​ប្រើ​សម្រាប់​ដាំ​ដើម​ស្វាយ​មាន​តម្លៃ ២៣០ ដុល្លារ​ក្នុង​មួយ​ផ្លែ

លោក Hiroyuki Nakagawa ប្រមូលផល​ស្វាយ​ទុំ​នៅកសិដ្ឋានផ្ទះ​កញ្ចក់ កោះ Hokkaido ប្រទេសជប៉ុន។ នៅខាង​ក្រៅ​អាកាស​ធាតុ​ត្រជាក់ក្រោម ៨ អង្សាសេ ប៉ុន្តែនៅខាងក្នុងផ្ទះកញ្ចក់សីតុណ្ហភាពប្រហែល ៣៦ អង្សាសេប៉ុណ្ណោះ។

ផ្ទះកញ្ចក់ដែលលោក Nakagawa ដាំស្វាយនៅរដូវរងា។ រូបភាព៖ Bloomberg

លោក Nakagawa បានដាំស្វាយ (ជាប្រភេទផ្លែឈើត្រូពិច) នៅតំបន់ Tokachi ដែលមានព្រិលធ្លាក់ច្រើននៅលើ​កោះ Hokkaido តាំង​ពី​ឆ្នាំ ២០១១ មក​ម្ល៉េះ។ ផ្លែស្វាយនៅកសិដ្ឋានរបស់លោក Nakagawa ក្នុងទីក្រុង Otofuke, Tokachi មាន​​តម្លៃ​​ប្រហែល ២៣០ ដុល្លារ​ក្នុង​មួយ​ផ្លែ។

សារព័ត៌មាន Bloomberg បានអោយដឹង លោកកសិករវ័យ ៦២ ឆ្នាំម្នាក់នេះមិននឹកស្មានថា ការពិសោធជាមួយនឹងកសិកម្មនិរន្តរភាពនៅថ្ងៃណាមួយអាចជួយអោយគាត់ប្រមូលផលស្វាយដែលមានតម្លៃថ្លៃជាងគេលើពិភព​លោក។

លោក Nakagawa ប្តូរមកដាំស្វាយបន្ទាប់ពីប្រកបអាជីវកម្មប្រេងអស់ជាច្រើនឆ្នាំ។ ដោយមានការណែនាំពីកសិករដាំស្វាយនៅខេត្ត Miyazaki ដែលជាអ្នកបាននិយាយថា អាចដាំប្រភេទផ្លែឈើត្រូពិចនៅរដូវរងា លោក Nakagawa បាន​សម្រេច​ចិត្ត​បង្កើត​ក្រុម​ហ៊ុន​ថ្មី Noraworks Japan ។ ប៉ុន្មានឆ្នាំក្រោយមក លោក Nakagawa បាន​ចុះ​ឈ្មោះស្លាកយីហោផ្លែស្វាយដែលគាត់ដាំគឺ Hakugin no Taiyo (ព្រះអាទិត្យក្នុងព្រិល) ។

អាថ៌កំបាំងដែលលោក Nakagawa បានប្រើគឺប្រភពធនធានធម្មជាតិដ៏ល្បីនៅស្រុកកំណើត Hokkaido គឺព្រិល និង​ប្រភព​ទឹក​ក្ដៅ។

ដាំស្វាយនៅរដូវរងាជួយអោយលោក Nakagawa មិនចាំបាច់ប្រើថ្នាំសម្លាប់សត្វល្អិត។ រូបភាព៖ Bloomberg

លោកប្រមូលទុកព្រិលនៅរដូវរងា បន្ទាប់មកប្រើនៅរដូវក្តៅដើម្បីជួយឱ្យផ្ទះកញ្ចក់ត្រជាក់ ដោយបញ្ឆោតដើមស្វាយ​ឱ្យ​ចេញ​ផ្កា​យឺត។ ក្រោយមក ក្នុង​​រដូវ​រងា គាត់​ប្រើ​ប្រភព​ទឹក​ក្តៅ​សម្រាប់ផ្តល់​ភាព​កក់ក្តៅ​ដល់​ផ្ទះ​កញ្ចក់​ ហើយប្រមូល​ផល​ស្វាយ​ខុស​រដូវ​ចំនួន ៥០០០ ផ្លែ។

ដំណើរការនេះជួយឱ្យផ្លែស្វាយទុំអំឡុងខែត្រជាក់ ដែលមិនសូវមានសត្វល្អិត និងមិនចាំបាច់ប្រើថ្នាំសម្លាប់សត្វល្អិត។ នៅ Hokkaido អាកាសធាតុមិនសូវសើម ដូច្នេះក៏មិនចាំបាច់ប្រើសារធាតុគីមីសម្រាប់កម្ចាត់ផ្សិតផងដែរ។

ទន្ទឹមនឹងនេះ ការប្រមូលផលនៅរដូវរងារជាពេលដែលកសិករមិនសូវមានការ​ងារ​ច្រើន អាច​បង្កើត​លក្ខខណ្ឌសម្រាប់​ធន​ធាន​មនុស្សកាន់តែច្រើនក្នុងបរិបទដែលជប៉ុនកំពុងប្រឈមមុខនឹងកង្វះកម្លាំងពលកម្ម ជាពិសេសនៅតំបន់​ជន​បទ។

វិធីសាស្រ្តនេះថែមទាំងជួយបង្កើនរសជាតិផ្លែស្វាយផងដែរ។ លោក Nakagawa បាននិយាយថា “ព្រះអាទិត្យក្នុងព្រិល” ផ្អែម​​ជាង​​ផ្លែ​​ស្វាយ​​ធម្មតា។

រូបភាព៖ Bloomberg

កត្តា​ពិសេសដែលទាក់ទងនឹងការថែទាំដើមស្វាយបាន​ធ្វើ​ឱ្យ​អតិថិជន និង​អ្នក​លក់​រាយ​មានការ​ចាប់អារម្មណ៍។ នៅឆ្នាំ ២០១៤ ហាង Isetan បានលក់ផ្លែស្វាយ “ព្រះអាទិត្យក្នុងព្រិល” ក្នុងតម្លៃជិត ៤០០ ដុល្លារ។ ផ្លែស្វាយដែលមានតម្លៃ​ថ្លៃ​នេះ​បាន​ទាក់​ទាញ​ចំណាប់​អារម្មណ៍​របស់​មនុស្សជាច្រើន ហើយធ្វើឱ្យវាក្លាយជាទំនិញដែលកម្រ។

ក្រៅពីនេះ លោក Nakagawa បានរកឃើញអត្ថប្រយោជន៍ដែលមិននឹកស្មានដល់បន្ថែមទៀតពីការធ្វើកសិកម្មក្នុង​រដូវ​រងា។ លោក​បាន​បន្ត​ថា​ “ដោយ​សារ​តែ​យើង​មិន​ប្រើ​ថ្នាំ​សម្លាប់​សត្វ​ល្អិត ដូច្នេះក្រុមហ៊ុន​តែ Lupicia ចង់ប្រើស្លឹក​ពី​​ដើម​​ស្វាយ​​របស់​​ខ្ញុំ​” ។

យ៉ាងណាលោក Nakagawa នៅតែមិនទាន់ពេញចិត្ត ហើយមានបំណងដាំផ្លែឈើត្រូពិចផ្សេងទៀត ដោយប្រើវិធីសាស្ត្រ​ស្រដៀង​គ្នា ដើម្បីធ្វើអោយ Tokachi ក្លាយជាមជ្ឈមណ្ឌលផលិតផ្លែឈើនៅរដូវរងា ក៏ដូចជាជម្រុញសេដ្ឋកិច្ចក្នុង​ស្រុក។ គាត់​កំពុង​តែ​ពិចារណា​ទៅ​លើ​ផ្លែ​ប៉េស។

ប្រភព៖ Bloomberg