ដុំភ្លើងអាថ៌កំបាំងដែលបង្កឱ្យមានការភ្ញាក់ផ្អើលលើបណ្តាញសង្គមជប៉ុន

ថ្ងៃសុក្រ 12/05/2023 | 9:51 ព្រឹក

កាលពីថ្ងៃទី ១១ ខែឧសភា អាជ្ញាធរជប៉ុនបានឱ្យដឹងថា ដុំភ្លើងដែលបញ្ចេញពន្លឺនៅលើមេឃនៃភាគខាងត្បូងប្រទេសជប៉ុន ប្រហែលជាបំណែករបស់គ្រាប់រ៉ុក្កែតដែលបាញ់បង្ហោះដោយប្រទេសចិន។

វីដេអូចាប់យកទិដ្ឋភាពដុំភ្លើងបង្កឱ្យមានការភ្ញាក់ផ្អើលពេញបណ្តាញសង្គមជប៉ុននៅយប់ថ្ងៃទី ១០ ខែឧសភា។ រូបភាព៖ PENTAROS29/Twitter

នៅយប់ថ្ងៃទី ១០ ខែឧសភា វីដេអូថតដុំភ្លើងបានបង្កឱ្យមានការភ្ញាក់ផ្អើលពេញបណ្តាញសង្គមជប៉ុន ដែលធ្វើឱ្យប្រជាពលរដ្ឋមានការសង្ស័យជាច្រើន។ សាខា Ishigaki នៅ Okinawa នៃក្រុមអង្កេតតារាសាស្ត្រជាតិ (NAOJ) បានសង្កេតឃើញដុំភ្លើងនៅម៉ោង ២០ៈ៣៣ នាទីយប់ថ្ងៃទី ១០ ខែឧសភា (ម៉ោងក្នុងតំបន់) នេះបើតាម AFP នាំពាក្យមន្រ្តីម្នាក់បានឱ្យដឹង។

យោងតាមមន្ត្រី NAOJ ម្នាក់ដែលមិនបញ្ចេញឈ្មោះបាននិយាយថា “ទាក់ទងនឹងព័ត៌មានដែលកំពុងត្រូវបានចែករំលែកយ៉ាងច្រើន យើងសន្មត់ថា វត្ថុដែលបានធ្លាក់មិនមែនជាដុំភ្លើងចេញពីអាចម៍ផ្កាយទេ ប៉ុន្តែជាបំណែកគ្រាប់រ៉ុក្កែត” ។

លោកបានបន្ថែមថា “ល្បឿនយឺត និងរបៀបដែលពន្លឺផ្លាស់ទី ស្ទ្រីមពន្លឺធ្វើដំណើរស្របគ្នា មើលទៅដូចជាការឈ្លានពានបរិយាកាសរបស់បំណែកគ្រាប់រ៉ុក្កែត” ។ លោកបានព្យាករណ៍ថា នោះប្រហែលជាបំណែកគ្រាប់រ៉ុក្កែតដែលចិនបាញ់បង្ហោះកាលពីខែវិច្ឆិកា ឆ្នាំ២០២២ ។

លោកនិយាយបន្តទៀតថា “ព័ត៌មានគ្រាប់រ៉ុក្កែតមួយផ្នែកត្រូវបានគេរំពឹងថានឹងត្រឡប់មកបរិយាកាសវិញ” ។

ក្រៅពីនេះ មន្ត្រីរូបនេះបាននិយាយថា បំណែកទំនងជាធ្លាក់ចូលសមុទ្រ ហើយមិនបង្កគ្រោះថ្នាក់នោះទេ ដោយផ្អែកលើការព្យាករណ៍ការផ្លាស់ទីរបស់វត្ថុនោះ។

អ្នកប្រើ Twitter ម្នាក់បានចែករំលែកថា “ពិតជាស្អាតណាស់ មើលទៅដូចជាផ្កាសាគូរ៉ាកំពុងស្រពោន ទោះជាយ៉ាងណា ល្អណាស់ដែលដឹងថាវាមិនមានគ្រោះថ្នាក់” ។

ប្រភព៖ Japan Times