បញ្ហាសង្គម​ដែល​ជប៉ុន​កំពុង​ជួប​ប្រទះ​គឺ​ចំនួន​កុមារ​បន្ត​ធ្លាក់​ចុះ​អំឡុង​ពេល ៤២ ឆ្នាំ​កន្លង​មក

តួលេខថ្មីដែលត្រូវបានប្រកាសនៅថ្ងៃបុណ្យជាតិរបស់​កុមារ​បានបង្ហាញ​ថា ចំនួនកុមារនៅក្នុងប្រទេសជប៉ុនបាន​ធ្លាក់​ចុះ​ជា​បន្ត​បន្ទាប់​រយៈពេល ៤២ ឆ្នាំកន្លងមក។

យោងតាមការប៉ាន់ប្រមាណគិតត្រឹមថ្ងៃទី ១ ខែមេសា ដោយក្រសួងកិច្ចការទូទៅជប៉ុន ចំនួនកុមារដែលមានអាយុ​ពី ១៤ ឆ្នាំ​ចុះ​ក្រោម​គឺ ១៤,៣៥ លាននាក់ ធ្លាក់ចុះចំនួន ៣០ ម៉ឺននាក់ បើធៀបនឹងឆ្នាំមុន ក្នុងចំណោមនោះកុមារា​មាន​ចំនួន ៧,៣៥ លាននាក់ និងកុមារីមានចំនួន ៧ លាននាក់។

ចំនួនកុមារនៅក្នុងប្រទេសជប៉ុនបានបន្តធ្លាក់ចុះចាប់តាំងពីឆ្នាំ ១៩៨២ ។

បច្ចុប្បន្ននេះ ចំនួនកុមារដែលមានអាយុចន្លោះពី ១២ ដល់ ១៤ ឆ្នាំមាន ៣,២១ លាននាក់ អាយុចន្លោះពី ៩ ដល់ ១១ ឆ្នាំមាន ៣,០៨ លាននាក់ អាយុចន្លោះពី ៦ ដល់ ៨ ឆ្នាំមាន ២,៩៦ លាននាក់ អាយុចន្លោះពី ៣ ដល់ ៥ ឆ្នាំមាន ២,៦៧ លាន​នាក់ និងអាយុពី ២ ឆ្នាំចុះក្រោមមាន ២,៤៣ លាននាក់។

អត្រាកុមារលើចំនួនប្រជាជនសរុបក៏បានធ្លាក់ចុះសល់ ១១,៥% ធ្លាក់ចុះអស់រយៈពេល ៤៩ ឆ្នាំជាប់ៗគ្នា។

គិតត្រឹមខែតុលាឆ្នាំមុន ខេត្តដែលមានអត្រាកុមារច្រើនជាងគេគឺ Okinawa ចំនួន ១៦,៣% បន្ទាប់មកគឺខេត្ត Shiga និង Saga សុទ្ធតែមានចំនួន ១៣,២% និងបន្តមកទៀតគឺខេត្ត Kumamoto មាន ១៣% ។

ចំនួនទាបបំផុតគឺខេត្ត Akita ដែលមានអត្រា ៩,៣% ។ បណ្តាខេត្ត Aomori និង Hokkaido មានចំនួន ១០,២% និង ១០,៣% ។

យោងតាមការប៉ាន់ប្រមាណរបស់វិទ្យាស្ថានស្រាវជ្រាវជាតិសម្រាប់ប្រជាជន និងសន្តិសុខសង្គម ចំនួនកុមារជប៉ុននឹងធ្លាក់ចុះក្រោម ១០ លាននាក់នៅឆ្នាំ ២០៥៣ ។ ការប៉ាន់ប្រមាណក៏បានបង្ហាញថា ចំនួននេះនឹងធ្លាក់ចុះសល់ ៧,៩៧ លាន​នាក់ ស្មើនឹង ៩,២% នៃចំនួនប្រជាជនសរុបនៅឆ្នាំ ២០៧០ ។

ជារៀងរាល់ឆ្នាំ នៅថ្ងៃទី ៥ ខែឧសភា ជាទិវាកុមារនៅប្រទេសជប៉ុន។

ប្រភព៖ NHK