ការវិលត្រឡប់មកវិញ​របស់​លោក​មហាសេដ្ឋី Jack Ma ក្នុង​នាម​ជាសាស្រ្តា​ចារ្យ​នៅមហា​វិទ្យា​ល័យ​តូក្យូ

ស្ថាបនិកសាជីវកម្ម Alibaba លោកមហាសេដ្ឋី Jack Ma ត្រូវបានអញ្ជើញឱ្យធ្វើជាសាស្រ្តាចារ្យនៅមហាវិទ្យាល័យតូក្យូ ជាស្ថាប័នថ្មីដែលគ្រប់គ្រងដោយសាកលវិទ្យាល័យតូក្យូ។

រូបភាព៖ BLOOMBERG

យោងតាមសារព័ត៌មាន Reuters សាកលវិទ្យាល័យតូក្យូបានឱ្យដឹងថា អំឡុងពេលចាត់តាំងអ្នកជំនួញដ៏ល្បីឈ្មោះបំផុត​នៅ​ប្រទេស​ចិន លោកមហាសេដ្ឋី Jack Ma នឹងបញ្ចប់នាចុងខែតុលា ប៉ុន្តែកិច្ចសន្យាអាចបន្តជារៀងរាល់ឆ្នាំ។

នៅមហាវិទ្យាល័យតូក្យូ លោក Ma នឹងចូលរួមខាងផ្នែកដូចជា ប្រឹក្សាលើប្រធានបទស្រាវជ្រាវសំខាន់ៗ និងបង្រៀន​​អំ​ពី​​ការ​​គ្រប់​គ្រង រួម​ទាំង​ការ​ចាប់ផ្តើមអាជីវកម្ម។

មហាវិទ្យាល័យតូក្យូត្រូវបានបង្កើតឡើងក្នុងឆ្នាំ ២០១៩ ជាអ្នកភ្ជាប់ទំនាក់ទំនងរវាងសាកលវិទ្យាល័យតូក្យូ និងអ្នកស្រាវ​ជ្រាវ ស្ថាប័ន​ស្រាវ​ជ្រាវ​ក្រៅ​ប្រទេស។

សេចក្តីជូនដំណឹងខាងលើត្រូវបានប្រកាស បន្ទាប់​ពី​មហាសេដ្ឋី Jack Ma បានត្រឡប់មកចិនដីគោកកាលពីខែមីនា។

ក្រោយពេលលាលែងពីតំណែងជាប្រធានប្រតិបត្តិ Alibaba នៅឆ្នាំ ២០១៩ លោក Ma បានធ្វើដំណើរទៅកាន់ប្រទេស​ជា​ច្រើន ដើម្បីស្វែងយល់អំពីបច្ចេកវិទ្យាកសិកម្ម។

ថ្វីត្បិតតែ លោក Jack Ma ហាក់ដូចជាមិនបង្ហាញខ្លួនជាសាធារណៈ ប៉ុន្តែយ៉ាងណាដំណើររបស់លោកនៅតែត្រូវបាន​តាមដានយ៉ាង​ដិត​ដល់ ជាពិសេសបន្ទាប់ពីក្រុមហ៊ុនដែលគាត់បានបង្កើត រួមទាំង Alibaba និងផ្នែកបច្ចេក​វិទ្យា​ហិរញ្ញវត្ថុ Ant Group ដែលស្ថិតក្រោមការត្រួតពិនិត្យរបស់ស្ថាប័នគ្រប់គ្រង ខណៈដែលទីក្រុងប៉េកាំង​រឹត​បន្តឹង​ការ​ត្រួត​ពិនិត្យពិនិត្យ​ខាង​បច្ចេក​វិទ្យា។

លោកធ្លាប់បានចែករំលែកថា គាត់ចង់ចំណាយពេលបន្ទាប់ពីចូលនិវត្តន៍សម្រាប់សកម្មភាពសប្បុរសធម៌ ការអប់រំនៅ​ជន​បទ និង​ការ​យក​ចិត្តទុកដាក់ស្តារតំបន់ជនបទនៃប្រទេសចិនឡើងវិញ។

ដោយបង្ហាញខ្លួនមិនច្រើន លោក Ma បានឃើញនៅអឺរ៉ុប ជប៉ុន និង​ចិន ក្នុង​ព្រឹត្តិការណ៍​អប់រំ និងកសិកម្ម។

កាលពីដើមឆ្នាំនេះ គេឃើញគាត់ធ្វើដំណើរទៅប្រទេសថៃ ដើម្បីស្រាវជ្រាវអំពីកសិកម្ម និងនេសាទ ក្រោយពេល ៣ ខែ​នៅ​ប្រទេស​ជប៉ុន ជាកន្លែងដែលគាត់ស្វែងយល់អំពីសកម្មភាព និងបច្ចេកវិទ្យានៃកសិដ្ឋានចិញ្ចឹមត្រី។

ប្រភព៖ Zing News